İlqar Altay Naxçıvandan danışdı: “Dövlətçiliyə, Konstitusiya və qanunlara qarşı ciddi, ağır pozuntulara güzəşt ola bilməz”

“Naxçıvan və onun xalqı vətənimiz Azərbaycanın strateji cəhətdən çox vacib, dəyərli və əziz parçasıdır. Ona görə orada baş verənlərə çox həssas, obyektiv, həm də mülahizəsiz, yəni, faktlar üzrə fikir bildirməklə yanaşmalıyıq. Fakt budur ki, son dövrlər Bakıdan - mərkəzdən Naxçıvanda korrupsiyaya qarşı iri çaplı məmurların mənimsəmə və digər ciddi qayda-qanun pozuntuları, özbaşınalıqları üzrə həbs səviyyəsində əməliyyatlar aparılır. Digər tərəfdən, Azərbaycan dövlət rəhbərliyinin qərar, sərəncamları ilə orada bir sıra Muxtar Respublika səviyyəli icra orqanları ləğv edilir. Yerində birbaşa Bakıya, ölkənin mərkəzi icra orqanlarına tabe edilən, düşünürəm, vilayət səviyyəli idarələr yaradılır. Bütün strateji vacib strukturlarda sürətlə kadr dəyişiklikləri aparılır, rəhbər vəzəfələrə yeni kadrlar göndərilir. Bu dəyişikliklər Naxçıvanın rəhbərliyindən, Ali Məclisin sədri Vasif Talıbovdan da ötməyib, istefası baş verib və MR-in idarəçiliyi ölkə Prezidentinin Bakıdan göndərilən nümayəndəsinə müvəqqəti həvalə edilib. Faktlar budur…”

Bu sözləri Pravda.az-a açıqlamasında hüquqşünas-kriminalist İlqar Altay deyib.

O bildirib ki, nəticə etibarilə Naxçıvanda həm yüksək rütbəli kadrların korrupsiya cinayətkarlığına qarşı sərt tədbirlər, həm indiyədək görünməmiş struktur və kadr dəyişikliyi, həm də uzun müddət Naxcıvana rəhbərlik edən şəxsin vəzifədən alınması tədbirləri baş verib: “Bunun üzərində isə artıq dəqiq deyə bilərik ki, Naxçıvanda xeyli müddət Bakıdan - mərkəzdən yayınma xassəli özbaşına və hətta dövlətçiliyə zidd "mərkəzdənqaçma" halları baş verirmiş. Bunun da əsasında orada ümumi ölkədən fərqli xüsusi yerli bürokratik qayda-qanunlar, yerli əhaliyə qarşı sərt rejim, xüsusilə azğın məmur özbaşınalıqları, dövlətin büdcədən Naxçıvana ayırdığı külli miqdar vəsaitin mınimsənilməsi, yerli əhalinin rüşvətlə soyulması və s. pozuntular olub. Bölgədə Bakıdan - mərkəzdən dövlətin apardığı araşdırma və islahat prosesləri davam edir. Ola bilsin, hələ bu gedişlə xeyli digər daha ciddi pozuntular ortaya çıxsın. Hətta, belə mərkəzdən yayınma şəraitində bu illərdə dövlət təhlükəsizliyi və regional təhlükəsizliyə qarşı pozucu, yəni ümumi dövlətçiliyə qarşı ziyanlı əməllərin ortaya çıxması da istisna oluna bilməz. Hər şeyi gedişat və zaman göstərəcək. Naxçıvanın sabiq rəhbəri Vasif Tallbovun dövlət və qanun qarşısında cavabdehliyi və məsuliyyəti də, aparılan bu araşdırma proseslərinin nəticəsindən, yəni onun bu vəzifədə yol verib-vermədiyi pozuntu əməllərindən asılı olmalıdır. Dövlətçiliyə, Konstitusiya və qanunlara qarşı ciddi, ağır pozuntulara güzəşt ola bilməz. Sonrakı gedişatın və nəticənin necə olacağı barədə isə hələlik bir şey demək olmaz, yəni bir hüquqşünas kimi ancaq aydın olan faktlar üzərində əsaslı fikrimi qura bilərəm…”

Aytəkin Qardaşova

Tarix: 30 Dekabr 2022, 10:29

Xəbər lenti