"“Azərsu” məcburdur ki, suyu saatlarla versin" - Eyyub Hüseynov

“İstehlakçıların hüquqlarını müdafiəsi haqqında qanunda göstərilib ki, bazarda inhisarçı mövqe tutan qurum istehlakçını fasiləsiz və keyfiyyətli xidmətlə təmin etməlidir. Yəni, bu qanun “Azərsu”ya da aiddir”.

Pravda.az xəbər verir ki, bunu Bakı və Bakı ətrafı ərazilərə suyun verilməsində yaranan problemlərdən danışarkən Azad İstehlakçılar Birliyinin sədri Eyyub Hüseynov deyib.

Eyyub Hüseynovun sözlərinə görə, istehlakçıların hüquqlarının müdafiəsinə dair BMT-nin rəhbər prinsiplər sənədində qeyd olunur ki, dövlətlər istehlakçıları bərabər şərtlərlə xidmətlərə, mallara əlçatanlığını təmin etməlidir:

“Yəni, ədalətli şəkildə insanların əlçatanlığı olmalıdır. Lakin onu da nəzərə almalıyıq ki, dünyada baş verən su qıtlığı məsələsi Azərbaycandan da yan keçməyib”.

Eyyub Hüseynov əlavə edib ki, bu şəraitdə digər vətəndaşların da suya əlçatanlığını təmin etmək üçün “Azərsu” bunları etməyə məcburdur:

“Bu zərurətdən doğan bir məsələdir. Biz bilməliyik ki, təbiətin yaratdığı qıtlıqdır. “Azərsu” da məcburdur ki, suyu saatlarla versin. Bu tələbat və vəziyyətdən irəli gəlir. Lakin alternativ kimi bəzi ixtisarlar etməklə bunun qarşısını almaq olar. Ona görə də alternativ su mənbələri yaradılmalıdır”.

Birlik rəhbəri düşünür ki, hökumət bu sahədə müəyyən işlər aparmalıdır:

“İlham Əliyev bu yaxınlarda dəniz suyundan istifadə ilə bağlı sənəd imzaladı. Və yaxud yağış suları toplanmalı, texniki su mənbələri yaradılmalıdır. Azərbaycanda texniki su mənbələri yoxdur. Bakı ətrafı ərazilərdə yerləşən bağlar içməli su ilə sulanır. Məsələn, Yeni Zellandiya kimi su ilə zəngin olan bir ölkədə yağış suyundan çox səmərəli istifadə olunur”.

Eyyub Hüseynovun sözlərinə görə, əhali də su qıtlığının qarşısının alınmasına kömək etməlidir:

“İnsanlar da bu işdə dövlət qurumlarına dəstək olmalıdır. Sudan səmərəli istifadə etməlidir. Məsələn, mən 10 il əvvəl Dünya Su Konqresində iştirak etmişəm və konqresdən gələndən sonra avtomobilimi içməli su ilə yuduzdurmamışam. Əgər Azərbaycan vətəndaşı avtomobilini günaşırı içməli su ilə yuduzdurursa, nəticəsi belə olmalıdır. Bizdə avtoyuma məntəqələri digər ölkələrlə müqayisədə 20 dəfə çoxdur. Bu anormal haldır. Mən dəfələrdə “Azərsu”da İctimai Şuranın iclasında çıxışım zamanı bildirmişəm ki, avtomobil məntəqələri yağış suyunda istifadə etməli və ya sudan təkrar istifadə etmə prinsipinə keçməlidir".

Qeyd edək ki, “Azərsu” Bakının bəzi ərazilərində suyun verilmə qrafikində dəyişiklik edib. Yeni qrafikə görə, su artıq günün müəyyən saatlarında deyil, bir gündən bir veriləcək./Kommersant.az

Tarix: 27 Aprel 2023, 16:53

Xəbər lenti