“Günay Bank” xalis mənfəəti 43.5 faiz azalıb

“Günay Bank” 2023-cü ilə mənfi göstəricilərlə start verib. Bankın xalis mənfəəti ötən ilin sonu ilə müqayisədə 213 min manat və ya 43.46 faiz azlaraq 277 min manata düşüb. Əldə olunan mənfəət isə bankın yığılmış zərərindən silinib. Kommersant.az bankın maliyyə hesabatına istinadən xəbər verir ki, “Günay Bank”ın cəmi aktivləri 2022-ci ilin son rübü ilə müqayisədə 7 milyon 43 min manat azalaraq 274 milyon 274 min manata enib. Bu azalmanın əsas səbəbi bankın nağd pul vəsaitləri və ekvivalentləri, o cümlədən bloklaşdırılmış nağd vəsaitlərinin həcminin 4 milyon 814 min manat azalaraq 25 milyon 739 min manata düşməsidir. Digər səbəb isə banklar və digər maliyyə institutlarına verilən kreditlərin 5 milyon 66 min manat azalaraq 1 milyon 490 min manata enməsidir.

Bankın bzinesmenlərə verdiyi kreditlərin həcmi ötən ilin sonu ilə müqayisədə 363 min manat azalaraq 114 milyon 81 min manata düşüb. İstehlak kreditləri 1 milyon 237 min manat artaraq 3 milyon 894 min manata, ipoteka kreditləri isə 1 milyon 335 min manat artaraq 82 milyon 970 min manata yüksəlib. Nəticədə bankın sahib olduğu kredit portfeli 2 milyon 209 min manat artaraq 200 milyon 946 min manata yüksəlib.

Mümkün zərərlər üçün yaradılan məqsədli ehtiyatını 95 min manat artıraraq 19 milyon 130 min manata çatdırdığı üşün “Günay Bank”ın xalis kreditləri 2 milyon 115 min manat artaraq 181 milyon 816 min manata yüksəlib.

MÜŞTƏRİLƏR PULLARINI GERİ ÇƏKİB

Bankın cəmi öhdəlikləri 7 milyon 471 min manat azalaraq 206 milyon 295 min manata düşüb. Bu azalmada bankın depozit portfelinin payı 38 faiz olub.

“Günay Bank”ın fiziki şəxslərdən topladığı əmanətlərin həcmi 360 min manat azalaraq 73 milyon 481 min manata düşüb. Biznesmenlər bankdakı əmanətinin 2 milyon 479 min manatını geri çəkdikləri üçün bankın hüquqi şəxslərdən topladığı depozitlər 35 milyon 84 min manata enib. Buna görə də bankın depozit portfeli 108 milyon 566 min manat olub ki, bu da ötən ilin sonu ilə müqayisədə 2 milyon 839 min manat və ya 2.5 faiz azdır.

YIĞILMIŞ ZƏRƏRİNİ AZALDARAQ KAPİTALINI ARTIRIB

Səhmdar kapitalında dəyişiklik etməyən “Günay Bank” əldə etdiyi 277 min manatlıq xalis mənfəətini yığılmış zərərdən çıxaraq sözügedən zərərini azaldıb. Nəticədə bankın zərəri 883 min manata düşüb. Ümumi ehtiyatlarını isə 149 min manat artıraraq 3 milyon 951 min manat artırdığı üçün bankın cəmi kapitalı67 milyon 978 min manat olub. Bu da ötən ilin sonu ilə müqayisədə 427 min manat və ya 0.6 faiz çoxdur.

FAİZ GƏLİRLƏRİ ƏMƏLİYYAT MƏNFƏƏTİNİ AZALDIB

Bankın faizə gəlirləri 11 milyon 572 min manat azalaraq 3 milyon 268 min manata, faiz xərcləri isə 8 milyon 779 min manat azalaraq 2 milyon 725 min manata düşüb. Buna görə də bankın xalis faiz gəliri 2 milyon 793 min manat və ya 83.7 faiz azalaraq 543 min manata düşüb.

Bankın qeyri-faiz gəliri 6 milyon 862 min manat azalaraq 2 milyon 281 min manata, qeyri-faiz xərcləri isə 7 milyon 775 min manat azalaraq 2 milyon 480 min manata düşüb. Nəticədə bankın əməliyyat mənfəəti 344 min manat olub ki, bu da ötən ilin sonu ilə müqayisədə 1 milyon 880 min manat və ya 84.5 faiz azdır.

Bankın xalis mənfəəti 213 min manat və ya 43.5 faiz azalaraq 277 min manata endiyi üçün “Günay Bank”ın aktivlərinin və kapitalının gəlirliyi “əriyib”.

Belə ki, bankın aktivlərinin gəlirliyi (ROA) 0.07 faiz azalaraq 0.1 faizə enib. Kapitalının gəlirliyi (ROE) isə 0.32 faiz azalaraq 0.4 fazinə düşüb.

Qeyd edək ki, bankın məcmu kapitalı 602 min manat azalaraq 64 milyon 31 min manat olub.

Günay Bank	2023 (I Rüb)	2022 (IV Rüb)	Fərq
Cəmi Aktivlər	274.274	281.317	-7.043
Kredit	200.946	198.737	2.209
İstehlak kreditləri	3.894	2.657	1.237
Biznes kreditləri	114.081	114.444	-363
Daşınmaz əmlak kreditləri	82.970	81.635	1.335
Mümkün zərərlər üçün yaradılan məqsədli ehtiyat	19.130	19.035	95
Xalis Kreditlər	181.816	179.701	2.115
Cəmi Öhdəliklər	206.295	213.766	-7.471
Depozit	108.566	111.405	-2.839
Fiziki şəxslərin depozitləri	73.481	73.841	-360
Hüquqi şəxslərin depozitləri	35.084	37.563	-2.479
Cəmi Kapital	67.978	67.551	427
Səhmdar kapitalı	64.910	64.910	0
Səhmin qiymətinin dəyişməsindən gəlir (zərər)	-	-	-
Yığılmış zərər	-883	-1.160	-277
Ümumi ehtiyatlar	3.951	3.802	149
Faiz Gəliri	3.268	14.840	-11.572
Faiz Xərci	2.725	11.504	-8.779
Xalis Faiz Gəliri/Zərəri	543	3.336	-2.793
Qeyri-Faiz Gəliri	2.281	9.143	-6.862
Qeyri-Faiz Xərci	2.480	10.255	-7.775
Əməliyyat Mənfəəti (Zərəri)	344	2.224	-1.880
Xalis Mənfəət (Zərər)	277	490	-213
Məcmu Kapital	64.031	64.633	-602
ROA	0.1%	0.17%	-0.07%
ROE	0.4%	0.72%	-0.32%