Elmi-Tədqiqat Kardiologiya İnstitutu sağlamlığın keşiyində necə dayanır? - FOTO

Son illər fəaliyyətində çoxsaylı uğurlara imza atan Elmi Tədqiqat və Kardiologiya İnstitutu (ETKİ) tibb elminin inkişafına töhfələr verməkdə davam edir.

Pravda.az xəbər verir ki, bu il fevral ayında Səhiyyə Nazirliyinin ETKİ-nin direktoru, professor Gülnaz Dadaşovanın təşəbbüsü ilə Azərbaycanda ilk dəfə keçirilən Kardioonkologiya sahəsində beynəlxalq konfrans bu baxımdan xüsusi əhəmiyyət kəsb edir.

“Kardioonkologiya: problemə müasir baxışlar” mövzusunda Beynəlxalq elmi-praktik konfransda səhiyyə nazirinin müavini İlqar Qasımov, Milli Məclisin Səhiyyə komitəsinin sədri Əhliman Əmiraslanov, İTS üzrə Dövlət Agentliyinin Tibbi Planlama departamentinin rəhbəri Hikmət İbrahimli, Azərbaycan Tibb Universitetinin prorektoru Rauf Bəylərov, həmçinin Türkiyə və Azərbaycanın tanınmış elm xadimləri, millət vəkilləri və media nümayəndələri iştirak ediblər. Qürür verıcı haldır ki , “Heydər Əliyev ili” çərçivəsində ilin əvvəlində keçirilən ilk bu miqyasda tədbirdə kadioonkologiya sahəsində önəmli müzakirələr aparılıb, kardioloq, hematoloq, radioloq, terapevtler arasımda fikir mübadiləsi həyata keçirilib.

Xüsusilə tədbirdə Ulu Öndər Heydər Əliyevin tibb sahəsinə verdiyi töhfələrdən bəhs edən video çarx böyük maraqla izlənib. Həmçinin konfrans çərçivəsində “Kardiak anatomiya”, “EKQ”, “EXO KQ” və “CPR” kursları keçirilib.

Bundan başqa institutda aprel ayının 4-də “Arterial hipertenziyanın və ağırlaşmaların müalicəsində diqqət çəkən məqamlar” mövzusunda elmi-praktik konfrans keçirilib. Konfransda çıxışçılar arterial hipertenziyaya həsr olunmuş mövzularda çıxış ediblər, müasir yanaşmaların tətbiqindən danışıblar.

Bundan əlavə səhiyyə ocağının tanınmış həkim heyəti bir neçə konfransda iştirak edib və institutun tətbiq etdiyi yeni yanaşmalar barədə tibb ictimaiyyətini məlumatlandırıb.

Elmi-Tədqiqat Kardiologiya İnstitutu şəhid ailələri, qazilər və onların ailə üzvləri, ahıl insanlar, eləcə də uşaq sığınacaqlarının kimsəsiz balaca sakinlərinə xidməti də fəaliyyətinin əsas istiqamətindən birinə çevirib. Buna görə də institutun sosial aksiyalar çərçivəsində bu təbəqədən olan insanları müayinə və müalicəyə cəlb etməsi təşəbbüsü cəmiyyətdə böyük maraq və məmnunluqla qarşılanır.

Təkcə bu ilin aprel ayında Elmi-Tədqiqat Kardiologiya İnstitutunun təşəbbüsü ilə Bakı ilə yanaşı qərb, şimal və cənub bölgələrində şəhid ailəsi, qazi, onların ailə üzvlərini əhatə edən pulsuz tibbi xidmət aksiyasından 1000-ə yaxın şəxs yararlanıb. Səhiyyə ocağının təşəbbüsü ilə 1-2 aprel 2023-cü ildə Lənkəranda şəhid, qazi və onların ailə üzvlərinə iki gün müxtəlif xidmətlər göstərilib. 16 aprel 2023-cü ildə Tərtər rayon icra hakimiyyəti ilə birgə 30-a yaxın şəhid anaları çoxsaylı müayinələrdən keçirilib və nəticələrə uyğun tibbi göstərişlər verilib. Sosial tədbir Ramazan ayına təsadüf etdiyindən tədbirə qatılanlar üçün institut tərəfindən iftar süfrəsi də təşkil olunub.

Bakıda "Qocalar evi"nin sakinləri, uşaq sığınacaqlarındakı balacalar, həmçinin reabilitasiya mərkəzlərində dəstəyə ehtiyacı olan şəxslər də mütəmadi müayinə və tibb sahəsində məlumatlandırılma tədbirlərinə cəlb olunurlar. Aprelin 27-də isə Əmək və Əhalinin Sosial Müdafiəsi nazirliyinin tabeliyində Sosial Xidmətlər Agentliyinin ahıl şəxslər üçün Sosial Xidmət Müəssisəsində səyyar tibbi xidmətlər təşkil olunub. Aksiyadan 70 nəfər yararlanıb. İnstitutun ən diqqətçəkən tədbirlərindən biri də paytaxtın ticarət mərkəzlərində-insanların sıx toplaşdığı ərazilərdə həyata keçirdiyi maarifləndirmə aksiyalarıdır. Son olaraq keçirilən aksiya zamanı insanların xolesterin və təzyiqlərinin yoxlanaraq onlara tibbi tövsiyyələrin verilməsi, paytaxt sakinləri tərəfindən maraqla qarşılanıb.

Fotoları təqdim edirik