“FHN yanğın təhlükəsizliyi ilə bağlı düzgün iş qura bilmir…”

“İlin başlanğıcında paytaxtda artıq bir neçə yanğın hadisəsi baş verib. Bu, ölkədə yanğın təhlükəsizliyi ilə bağlı vəziyyətin heç də ürəkaçan olmadığını deməyə əsas verir. Hər belə bədbəxt hadisədən sonra araşdırma aparıldığı deyilsə də problemlər kökündən həll edilmir, səbəblərin ortadan qaldırılması gecikir.

Hüquqi və Demokratik İslahatlar Mərkəzinin sədr müavini, sosioloq Elçin Bayramlı yanğınların bir çox səbəbdən qaynaqlandığını deyib:

“Tikinti normalarının pozulmasından tutmuş, yanğın təhlükəsizliyi qaydalarına riayət olunmaması, elektrik avadanlıqları və cihazlardan düzgün istifadə edilməməsi, cavabdeh qurumların etinasızlığı, daimi nəzarətin olmaması hadisələrin kökündə dayanan səbəblər sırasındadır. Bir çox binalarda, obyektlərdə yanğın balonları qoyulub, amma çoxunun istifadə müddəti bitib, demək ki lazımı anda işləməyəcək. Həmin binalarda yaşayanların əksəriyyəti həmin balonları heç işlədə bilmir, istifadəsinə dair məlumatsızdırlar.

Yanğın baş verir, amma balon yerində qalır. Ən azından ilkin müdaxilə olunsa, yanğının böyüməsinin qarşısını almaq, vaxtında söndürmək mümkün olar. Qeyri-standart elektrik naqilləri və cihazlarından istifadə olunur. Ölkədə bunları yoxlayan bir orqan yoxdur ki, xaricdən gələn məhsulların standartlara cavab verib-vermədiyini qiymətləndirib daha sonra bazara buraxsın. Naqillər, avadanlıqlar da keyfiyyətsiz olduğu üçün qısaqapanma verir”.

Ekspert Demokrat.az-a açıqlamasında onu da vurğulayıb ki, müvafiq dövlət orqanları işini düzgün aparmalıdır:

“Fövqəladə Hallar Nazirliyi öz təlimatına uyğun olaraq yoxlamalar barədə sənədlərdə bütün göstəriciləri qeyd edir, periodik nəzarət, yoxlamalar - hər şey kağız üzərində əksini tapır. Əraziyə məsul idarələr ayda, ildə bir dəfə yoxlama-nəzarət funksiyalarını yerinə yetirir, təhlükəsizliklə bağlı vəziyyətdən illərlə xəbərdar olmur.

Bundan başqa bir-birinə sıx inşa edilmiş tikililər, xaotik çəkilmiş naqillər, yanğın çıxışlarının bəzi yerlərdə qarşısının kəsilməsi, yanğınsöndürən maşınların yaxınlaşa bilməməsi də yanğınların qarşısının alınmasında çətinliklər yaradır.

Sovet dövründə bütün yaşayış yerlərinin yanında su çənləri, yeraltı, yerüstü hovuzlar var idi, yanğınsöndürən maşınlar yaxınlıqdan su götürüb, yanğını təcili söndürə bilirdi. Amma indi bu qurğular çox az yerdə qalıb. 4 ədəd yanğınsöndürən maşın gəlir, suyu qurtarır, əlavə yardım gələnə qədər yanğının miqyası da böyüyür. Səbəblər kompleks şəkildə aradan qaldırılmasa, təəssüf ki, belə bədbəxt hadisələrin çox şahidi olacağıq”.

Tarix: 17 Yanvar 2024, 15:23

Xəbər lenti