BURADA REKLAMINIZ OLA
BİLƏR

Bir ailənin 3 üzvünü qətlə yetirməkdə, 1 nəfəri yaralamaqda təqsirləndirilən şəxsə ömürlük cəza istənildi

Bir ailənin 3 üzvünü qətlə yetirməkdə, bir nəfəri isə yaralanaqda təqsirləndirilən Nofəl Səfərovun cinayət işi üzrə növbəti məhkəmə prosesi keçirilib.

 

Bu gün Bakı Ağır Cinayətlər Məhkəməsində hakim Leyla Əsgərovanın sədrliyi ilə keçirilən prosesdə şahid Arif Ağalarov ifadə verib. O, ifadəsində Nofəl Səfərovla 10-15 ildir əlaqəsinin olmadığını bildirib: "Hadisə barədə məlumatım olmayıb. Oğlum Elbrus mənə zəng etdi. Dedi ki, babamgili öldürüblər. Nofəl mənim bacanağımdır. Nofəl bu ailə ilə məndən qabaq qohum olub. Ölən onun xalasıdır. Nofəlin qəddarlığını görməmişəm".

 

Daha sonra məhkəmə istintaqı yekunlaşıb və dövlət ittihamçısı çıxış edib.

 

Dövlət ittihamçısı təqsirləndirilən Nofəl Səfərovun ömürlük azadlıqdan məhrum edilməsini istəyib.

 

Növbəti məhkəmə prosesi martın 4-nə təyin edilib.

 

Xatırladaq ki, hadisə ötən il noyabrın 29-da Xəzər rayonu, Buzovna qəsəbəsində baş verib. Həmin gün saat 20 radələrində Buzovna qəsəbəsində 1939-cu il təvəllüdlü Elbrus Muradov, oğlu 1971-ci il təvəllüdlü Rahil Muradov, həyat yoldaşı 1945-ci il təvəllüdlü Şahirə Muradova naməlum şəxs tərəfindən kəsici alətlə qətlə yetirilib, nəvəsi 1997-ci il təvəllüdlü Elbrus Ağalarov isə bədən xəsarəti alıb.

 

Faktla bağlı rayon prokurorluğunda Cinayət Məcəlləsinin 120.2.4 (xüsusi amansızlıqla və ya ümumi təhlükəli üsulla adam öldürmə), 120.2.9( təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə), 120.2.7 (iki və ya daha çox şəxsi öldürmə), 120.2.11-ci (quldurluq, hədə-qorxu ilə tələb etmə, terrorçuluq və ya banditizmlə əlaqədar adam öldürmə) və 181.3.3 (Quldurluq - zərərçəkmiş şəxsin sağlamlığına ağır zərər vurulmaqla törədildikdə) madələri ilə cinayət işi başlanılıb.

 

Aparılan araşdırmalarla ailənin keçmiş kürəkəni, 1976-cı il təvəllüdlü Nofəl Səfərovun şəxsi münasibətlər zəminində aralarında yaranan mübahisə zamanı onları qəsdən öldürməsinə əsaslı şübhələr müəyyən edilib.

 

Polis əməkdaşlarının keçirdikləri əməliyyat-axtarış tədbirləri nəticəsində N.Səfərov şübhəli şəxs qismində tutularaq istintaqa təhvil verilib.

 

APA

Tarix: 26 Fevral 2024, 16:39   
Xəbər lenti
Çox oxunanlar

Ən son xəbərləri səhifəmizdən də izləyin