"Bəzi hallarda vətəndaşlar qanunla müəyyən edilmiş əsaslar olmadan qeydiyyatdan çıxarılıb" - Ombudsman

Şəxsiyyət vəsiqəsi və ümumvətəndaş pasportu, habelə yaşayış yeri və olduğu yer üzrə qeydiyyatla bağlı Ombudsmanın ünvanına daxil olmuş müraciətlərin araşdırılması zamanı bir çox şikayətlərin Azərbaycan Respublikası Nazirlər Kabinetinin 2003-cü il 9 aprel tarixli, 55s nömrəli Sərəncamına əsasən, polis orqanlarının inzibati binalarının ünvanı üzrə qeydiyyatda olan şəxslərin qeydiyyatdan çıxarılması ilə bağlı olduğu müəyyən edilib.

Bu, Milli Məclisin İnsan hüquqları komitəsinin bu gün keçirilən iclasında müzakirəyə çıxarılan Azərbaycan Respublikasının İnsan Hüquqları üzrə Müvəkkilinin (Ombudsmanın) 2023-cü il üzrə məruzəsində əksini tapıb.

Qeyd edilib ki, Azərbaycan Respublikası Nazirlər Kabinetinin 2003-cü il 9 aprel tarixli, 55s nömrəli Sərəncamının 1-ci bəndində yaşayış yeri olmayan Azərbaycan Respublikası vətəndaşlarının Daxili İşlər Nazirliyinin şəxsiyyət vəsiqəsi verən müvafiq orqanının ünvanı üzrə qeydiyyatdan keçirilməsi və onlara şəxsiyyət vəsiqəsi fərdiləşdirilərkən şəxsiyyət vəsiqəsinin “yaşayış yeri” bölməsində həmin ünvanın şərti olaraq göstərilməsi nəzərdə tutulub.

“Yaşayış yeri və olduğu yer üzrə qeydiyyat haqqında” Azərbaycan Respublikası Qanununun 9-cu maddəsində şəxsin yaşayış yeri üzrə qeydiyyatdan çıxarılmasının əsasları göstərilib. Buna baxmayaraq, Ombudsmanın ünvanına daxil olmuş şikayətlərdən görünür ki, bir sıra hallarda vətəndaşlar qanunla müəyyən edilmiş əsaslar olmadan qeydiyyatdan çıxarılıb, şəxsiyyət vəsiqələri deaktiv edilib.

Bildirilib ki, bir sıra hallarda qeydiyyatdan çıxarılmış şəxslərin şəxsiyyət vəsiqələrinin etibarsız olması səbəbindən əmək müqavilələrinin bağlanması, icbari tibbi sığorta çərçivəsində xidmətlərdən yararlanması mümkün olmur, habelə həmin şəxslərin sosial təminat, təhsil və digər hüquqları məhdudlaşdırılır.

Həmçinin qeyd edilib ki, yaşayış yeri olmayan Azərbaycan Respublikası vətəndaşlarının Azərbaycan Respublikası Daxili İşlər Nazirliyinin şəxsiyyət vəsiqəsi verən müvafiq orqanının ünvanı üzrə qeydiyyatdan keçirilməsi və onlara şəxsiyyət vəsiqəsi fərdiləşdirilərkən şəxsiyyət vəsiqəsinin “yaşayış yeri” bölməsində həmin ünvanın şərti olaraq göstərilməsindən sonra yaranan riskli hallar nəzərə alınmaqla, Azərbaycan Respublikası Nazirlər Kabinetinin 2003-cü il 9 aprel tarixli, 55s nömrəli Sərəncamına əlavə və dəyişikliklərin edilməsi və nəticədə vətəndaşların qeydiyyat probleminin həlli çox mühümdür.

Ümumiyyətlə, istifadələrində qanunla müəyyən edilmiş qaydada sənədləşdirilməmiş yaşayış sahəsi olan şəxslərin həmin yaşayış yerləri üzrə qeydiyyata alınmaları ilə bağlı problemlərin aradan qaldırılması məqsədilə qanunvericiliklə müvafiq mexanizmin hazırlanması məqsədəmüvafiqdir.

Ombudsman yaşayış yeri olmayan Azərbaycan Respublikası vətəndaşlarının Azərbaycan Respublikası Daxili İşlər Nazirliyinin şəxsiyyət vəsiqəsi verən müvafiq orqanının ünvanı üzrə qeydiyyatdan keçirilməsi və onlara şəxsiyyət vəsiqəsi fərdiləşdirilərkən şəxsiyyət vəsiqəsinin “yaşayış yeri” bölməsində həmin ünvanın şərti olaraq göstərilməsindən sonra yaranan riskli hallar nəzərə alınmaqla, Azərbaycan Respublikası Nazirlər Kabinetinin 2003-cü il 9 aprel tarixli, 55s nömrəli Sərəncamına əlavə və dəyişikliklərin edilməsi və nəticədə vətəndaşların qeydiyyat probleminin həll olunması tövsiyə edib.

Tarix: 29 Fevral 2024, 11:15

Xəbər lenti