Tahir Kərimli: “Generallarımızı sanksiya siyahısına daxil etmək istəyirlər, Azərbaycan da Amerika rəsmilərinə qarşı...”

“ABŞ Azərbaycan məmurlarını sanksiya ilə hədələməklə öz ayağına balta vurur. Sanksiya məsələsi çox ciddi müzakirəyə səbəb olacaq. Çünki bu, Konqresdə Nümayəndələr Palatasının Xarici əlaqələr komitəsində müzakirə olunmalı, sonda isə Prezident təsdiq etməlidir. Uzun bir prosesdir. Olub-olmayacağını Allah bilir. General-leytenant Hikmət Mirzəyevin, general-polkovnik Əli Nağıyevin siyahıya daxil edilməsinə nə ad vermək olar? Bu şəxslərin insan hüquqları ilə nə bağlılıqları var? Deməli, burada məsələ yalnız erməni terrorçularının DTX tərəfindən tutulub gətirilməsidir, yaxud Hikmət Mirzəyevin çox fəal, bacarıqlı hərbi qabiliyyətləri bunların gözünü deşir və generallarımızı sanksiya siyahısına daxil etmək istəyirlər. Düşünürəm ki, Azərbaycan tərəfi adekvat addımlar ata bilər. Məsələn, Amerika şirkətlərinə və rəsmi şəxslərinə qarşı”.

Bu sözləri Pravda.az-a açıqlamasında Milli Məclisin İnsan hüquqları komitəsinin sədr müavini Tahir Kərimli deyib.

Deputat bildirib ki, Azərbaycanda kasıblarla varlılar arasında min dəfə fərq varsa, ABŞ-nin özündə milyon dəfə fərq var: “Gedib bunun dərdini çəksinlər ki, insan haqlarını pozurlar. Dünyanı idarə edirlər, istədikləri ölkəyə gedib kəsib-doğrayırlar... Amerika dövləti məhkəmənin qərarı olmadan "terrorçu" adı qoyub insanları öldürür, özbaşına hərəkətlər edir. Çin də artıq insan haqlarının pozulması ilə bağlı Amerikadakı nöqsanları görə bilir. Biz də hər halda öz növbəmizdə müəyyən reaksiyalar verməliyik. Zahirən belə görünür ki, Azərbaycanda inan hüquqlarının pozulması ilə bağlı ABŞ Konqresi 40 Azərbaycan rəsmisi haqqında sanksiya qərarı üçün layihə təqdim edib. Amma qəribə bir məsələ var, bunun müəllifi kimdir? Dina Titus? Bəs o kimdir? Amerika-erməni icmasının fəal üzvü. Erməni icmasının iki gün öncə keçirilən iclasında Titus açıq şəkildə bildirib ki, biz "Dağlıq" Qarabağda ermənilərin Azərbaycan hakimiyyəti tərəfindən sıxışdırılmasının cəzasını verəcəyik, onlara sanksiya tətbiq edəcəyik. Xüsusilə "erməni soyqırımı" ərəfəsində bunun tətbiqi göstərir ki, Titus erməni maraqlarını müdafiə edir, erməni icmasının göstərişlərini həyata keçirir. Çünki dünyada insan haqları pozulan o qədər dövlətlər var ki, ABŞ onlarla cani-qəlblə dostluq edir, heç birinə sanksiya tətbiq etmir. Deməli, əsas məqsəd insan hüquqlarının pozulması deyil, bu bəhanədir. Ən əsas Azərbaycan Respublikasının öz torpaqlarını azad etməsi, sülh istiqamətində addımları, ikitərəfli razılaşmalar və sairədir. ABŞ qıcıq yaradır ki, Rusiya Azərbaycan ərazisində hərbi iştirakdan imtina edir, yaxşı münasibətlər yaranır... Azərbaycanın balanslı müstəqil siyasəti Amerikanın heç cür xoşuna gəlmir”.

Aytəkin Qardaşova

Tarix: 24 Aprel 2024, 13:43

Xəbər lenti