Adam oğurlayan dəstə üzvləri qərardan narazıdırlar

Bakıda adam oğurluğunda təqsirləndirilən Vidadi Məlikov, Rəşad Hüseynov və Zamin Hüseynov, Şahnaz İbrahimova, Mirməhəmməd Qədirov və Elçin Babayevin barəsindəki qərardan yenidən kassasiya şikayəti verilib.

Pravda.az-ın əldə etdiyi məlumata görə, Ali Məhkəmədə keçiriləcək ilkin hazırlıq iclası mayın 24-nə təyin edilib.

Şikayət hakim Hafiz Nəsibovun sədrliyi ilə araşdırılacaq.

Xatırlarma: Bakı Ağır Cinayətlər Məhkəməsinin hökmü ilə Vidadi Məlikov 14 il, Rəşad Hüseynov və Zamin Hüseynov 11 il, Şahnaz İbrahimova 10 il, Mirməhəmməd Qədirov və Elçin Babayev isə 9 il azadlıqdan məhrum ediliblər. Ali Məhkəmə də şikayəti təmin etməyib.

İttihama görə, həmin şəxslər Cinayət Məcəlləsinin adam oğurluğu, quldurluq, hədə-qorxu ilə tələb etmə, oğurluq, qanunsuz silah saxlama, qanunsuz azadlıqdan məhrumetmə maddələri ilə təqsirli biliniblər. Araşdırmalar zamanı məlum olub ki, qrup üzvləri 2021-ci ilin fevral ayında mənzildən xeyli miqdarda pul və qızıl oğurladıqdan sonra başqa cinayət planlaşdırıblar.

Onlar əvvəlcədən izlədikləri və Şahnaz İbrahimova vasitəsilə barəsində məlumat topladıqları Bakıdakı məşhur masaj salonlarından birinin icarədarının həyat yoldaşını oğurlamaq qərarına gəliblər.

Bu məqsədlə həmin şəxslər Babək prospektindəki masaj salonundan çıxıb Binəqədidə yerləşən evinə gedən A.Şamirovanı izləyiblər. Həmin il fevralın 3-də saat 22 radələrində qadın taksidən düşdükdən sonra yaxınlaşaraq özlərini polis əməkdaşı kimi təqdim edən qrupun 2 üzvü əməliyyat keçirdiklərini və birgə idarəyə getməli olduğunu bildiriblər. Onlar A.Şamirovanı zorla avtomobilə apararaq başına torba keçiriblər və Masazır qəsəbəsi Atçılıq yaşayış massivində əvvəlcədən kirayə tutduqları evə gətirərək otağa salıblar. Qrup üzvləri yolda olarkən, evdə və digər danışıqlar vaxtı DİN və DTX əməkdaşları olduqlarını, paytaxtda əxlaqsızlıq yuvalarına qarşı əməliyyat keçirdiklərini deyiblər. Onlar tez-tez “rəis, məruzə, raport, Seyid, müavin, komandir” və sair kimi sözlərdən istifadə edərək oğurladıqları qadını həqiqətən hüquq-mühafizə orqanlarının əməkdaşı olduqlarına inandırmağa çalışıblar. Daha sonra qrup üzvləri masaj salonunu işlədən, həmçinin girov saxladıqları qadının əri ilə əlaqəyə keçərək ondan məsələnin həll olunması üçün 30 min manat tələb ediblər. Əks halda hər ikisinin məsuliyyətə cəlb ediləcəyini bildiriblər.

A.Şamirovanın ərinin hüquq-mühafizə orqanlarına müraciətindən sonra xüsusi əməliyyat keçirilib və adam oğurluğu, quldurluq və sair kimi cinayətlərdə şübhəli bilinən qrup üzvləri tutulub.

Kamal Məmmədov

Tarix: 21 May 2024, 09:09

Xəbər lenti