Deputat Rüfət Səfərovun həbsindən danışdı: “Azərbaycanda siyasi məhbus yoxdur, ola da bilməz”

“Məlum olduğu kimi, Rüfət Səfərov konkret olaraq Cinayət Məcəlləsinin 221.1 (xuliqanlıq) və 178.3.2 (dələduzluq-külli miqdarda ziyan vurmaqla törədildikdə) maddələri ilə ittiham olunur. Gözlənilən baş verib. Bu ittihamın ardınca müxalifətdə yenə hay-küy kampaniyası başlanıb. İstəyirlər ki, növbəti bir “siyasi məhbus” formalaşdırsınlar. Demişik, bir daha deyirik ki, Azərbaycanda siyasi məhbus yoxdur, ola da bilməz”.

Bu sözləri Pravda.az-a açıqlamasında Milli Məclisin deputatı Elman Nəsirov deyib.

“Ulu öndər Heydər Əliyevin müəyyən etdiyi siyasi kurs demokratiya yoludur. Demokratiyada isə son mərhələ, hədd yoxdur, bu, bir prosesdir. Cənab İlham Əliyev də ulu öndər Heydər Əliyevin müəyyən etdiyi siyasi kursu davam etdirir. Biz demokratiya yolu ilə gedirik, insan hüquqlarını müdafiə edirik. Bizim üçün hüququn aliliyi əsas şərtdir. Sadəcə, insanlar var ki, onlar cinayət yolunu seçiblər. Bilirlər ki, bu yol gec-tez həbsxanaya aparır. Artıq həbsxanaya gedən məsafənin çox qısaldığını görəndə siyasi ritorikanı gücləndirməyə, siyasi baxımdan dövlət, dövlətçilik, hakimiyyət, iqtidar əleyhinə daha kəskin ifadələr səsləndirməyə başlayırlar. Həbs olunandan sonra isə deyirlər ki, mən filan mövqeyimə, filan siyasi baxışlarıma görə saxlanılmışam və ya həbs edilmişəm. Bir daha vurğulayırıq ki, Azərbaycanda heç kim siyasi baxışına, siyasi mövqeyinə görə həbs edilmir, edilə də bilməz. Bu, birmənalıdır. Konkret cinayət halına görə saxlanılanda, məhkəminin qərarı ilə sonradan həmin şəxs haqqında Cinayət Məcəlləsinin məlum bəndləri üzrə iş açılanda, məhkəmənin hökmü elan ediləndə yenə də “Azərbaycanda insan hüquqları pozuldu” deyərək əsassız ittihamlar irəli sürməyə başlayırlar. ABŞ-dən də müxtəlif səviyyələrdə - Dövlət Departamenti, maliyyəşdirdiyi QHT-lər səviyyəsində ittihamlara rəvac verilib. Avropa İttifaqı institutları bu prosesə qoşulub. Yəni koordinasya olunmuş bir fəaliyyət olur. Bunu xalqımız çox gözəl bilir. Dəfələrlə görmüşük. Məsələ bundadır ki, bu gün mahiyyət etibarilə çox unikal hadisə baş verdi. ABŞ-nin Prezidenti vəzifəsindən getməyə hazırlaşan Cozef Bayden hakimiyyətinin son günlərində öz oğlunun əfvi ilə bağlı qərar verdi. Həm də qeyd etdi ki, oğlunu məhz Prezidentin soyadını daşıdığı üçün həbs ediblər və bu həbs siyasi sifarişlidir. Nə baş verməkdədir? ABŞ-də siyasi sifariş əsasında həbslər olur və Bayden bunu etiraf edir? Həbs qərarını məhkəmə verir. Belə çıxır ki, ABŞ-də məhkəmələr siyasi sifariş yerinə yetirirlər? Baydenin məntiqinə görə, oğlu siyasi sifarişlə həbs edilibsə, deməli, o, siyasi məhbusdur. Donald Tramp da deyir ki, “2021-ci ilin 6 yanvarında respublikaçıların Konqresə yürüşü oldu, o zaman saxlanılanların hamısı siyasi məhbuslardır”. Fikir verirsiniz, artıq hakimiyyətdən getməyə hazırlaşan Bayden də, yeni Prezident Tramp da etiraf edir ki, ABŞ-də siyasi məhbus var. Halbuki ABŞ bir çox hallarda ayrı-ayrı ölkələri siyasi məhbusların olması ilə bağlı ittiham edir. Hətta sanksiyalar həyata keçirir. Buna amerikalılar demişkən, “no comments” deyirlər. Daha deməyə söz yoxdur, bu, reallıqdır. Hətta Azərbaycan belə ölkələr üçün bir nümunədir. Bu nümunəni həm polisimizin davranışı ilə, həm də qanunların aliliyi və onun icrası ilə bağlı göstəririk. Mən təsadüfən ABŞ-dən nümunə gətirmədim. Özünüz düşünün və nəticə çıxarın”, - E.Nəsirov bildirib.

Aytəkin Qardaşova

Tarix: 4 Dekabr 2024, 15:36