Peyvənd imtinası təhlükəli nəticələr doğura bilər - XƏBƏRDARLIQ

Uşaqlarda güclü immun sisteminin təməli körpəlik dövründə qoyulur. Ana südü, vaxtında verilən əlavə qidalar və düzgün tətbiq olunan peyvəndlər bu təməli formalaşdırmaqda böyük rol oynayır. Bu üç faktor bir-birini tamamlayır, hər hansı birinin çatışmazlığı uşağın infeksiyalara qarşı müdafiəsini zəiflədə bilər. Ana südü ilə qidalanan körpələrin infeksiyalara yoluxma riski daha azdır, lakin təkcə ana südü yoluxucu xəstəliklərə qarşı kifayət qədər qoruyucu deyil.

Pravda.az bildirir ki, yoluxucu xəstəliklərin yaratdığı ölüm və əlilliyin qarşısını almaqda peyvəndin mühüm rolu var.

Peyvənd yalnız xəstəliklərdən qorumur, eyni zamanda epidemiyanın qarşısını alır

Körpə və uşaqları xəstəliklərdən və müxtəlif infeksiyalardan qorumağın ən təsirli yollarından biri peyvənddir. Üstəlik, peyvənd yalnız fərdi qoruma təmin etmir, həm də cəmiyyətdə yoluxucu xəstəliklərin yayılmasının qarşısını alır. Buna baxmayaraq, hər il dünyada peyvəndlə qarşısı alına bilən xəstəliklərdən təxminən 1 milyon 700 min insan həyatını itirir. Peyvəndlə qorunan uşaqlarda xəstəlik, əlillik və ölüm halları minimuma enir. Tüberküloz, difteriya, tetanus, poliomielit, qızılca və Hepatit B kimi xəstəliklərə qarşı peyvəndlərin vaxtında və düzgün tətbiqi bu təhlükələrin qarşısını alır.

Körpənin ən böyük müdafiəsi: ana südü və peyvənd

Yeni doğulmuş körpələr doğuş zamanı analarından aldıqları antikorlarla bir müddət qorunurlar. Lakin bu passiv immunitet zamanla azalır və tamamilə yox olur.

“Yoluxucu xəstəliklər ölümcül deyil, peyvəndə ehtiyac yoxdur” fikri təhlükəlidir

Son illərdə həm Azərbaycanda, həm də dünyada peyvəndə qarşı yanlış düşüncələr artır. Əksər yoluxucu xəstəliklər bəzi hallarda ölümə səbəb ola bilər. Araşdırmalar göstərir ki, son 10 ildə valideynlərin yanlış peyvənd qərarları səbəbindən yoluxucu xəstəliklərə tutulan uşaqların sayı artmaqdadır. Valideynlər bilməlidirlər ki, peyvəndin məqsədi orqanizmə xəstəlik törədicisinin zəiflədilmiş və ya ölü forması verilərək, immunitetin onu tanımasını və gələcəkdə qoruyucu reaksiya göstərməsini təmin etməkdir. Xəstəliklər tam yoxa çıxmadığı müddətcə peyvənddən imtina etmək həm səhv, həm də təhlükəli yanaşmadır.

Azərbaycan üzrə uşaq peyvənd təqvimi

Doğumdan dərhal sonra (ilk 12 saat ərzində):

Hepatit B (Hep B1) – Qaraciyər infeksiyalarına qarşı qoruyucu peyvənd.

4–7-ci günlərdə:

BCG (verem peyvəndi) – Sol çiyin dərialtı.

OPV (oral poliomielit peyvəndi) – Ağızdan tətbiq olunur.

2 aylıqda:

HİB (Beşli peyvənd – difteriya, tetanus, boğmaca, hepatit B, hemofil infeksiyası)

OPV (poliomielit)

Pnevmokok (PKV1) – Pnevmokok infeksiyalarına qarşı.

3 aylıqda:

Beşli peyvəndin təkrarı (HİB 2)