Arvadını döyən şəxs: “Mənə və valideynlərimə kobud davranırdı”

Şəmkir Rayon Məhkəməsində işgəncə vermədə təqsirləndirilən Qasım Qasımovun (ad, soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Həvayət Məhəmmədinin sədrliyi ilə keçirilən prosesdə hökm oxunub.

Məhkəmənin hökmü təqsirləndirilən şəxs Cinayət Məcəlləsinin 128-ci (qəsdən sağlamlığa yüngül zərər vurma) maddəsində nəzərdə tutulan cinayət əməlini törətməkdə təqsirli bilinib və o, cinayət məsuliyyətindən azad edilib. Qasım Qasımovun barəsində cinayət təqibinə və hazırkı cinayət işi üzrə icraata xitam verilib. Təqsirləndirilən şəxs barəsində seçilmiş polisin nəzarəti altına vermə qətimkan tədbiri ləğv edilib.

İttihama görə, hadisə 21 mart 2024-cü il tarixdə, saat 17:00 radələrində Şəmkir rayonu ərazisində qeydə alınıb.

Belə ki, Qasım Qasımov arvadı, zərərçəkmiş Maya Qasımova (ad, soyadı şərtidir) ilə mübahisə edib. Buna səbəb qadının ona və valideynlərinə kobud davranılması olub. Bundan əsəbiləşən təqsirləndirilən şəxs onu itələyib. Nəticədə qadının sağlamlığa yüngül zərər vuran xəsarətlər olduqları üçün ağırlıq dərəcələri təyin edilməyən xəsarətlər yetirib.

Hadisədən sonra Qasım Qasımov saxlanılaraq cinayət məsuliyyətinə cəlb edilib.

Məhkəmə iclasında o, özünü irəli sürülmüş Cinayət Məcəlləsinin 133.2.6-cı maddəsində təqsirli bilməyib. Qeyd edib ki, Maya ilə ailə həyatı qurduqdan təxminən 3 ay sonra arvadı onun valideynlərinə laqeyd münasibət bəsləyib, cavab qaytarıb və onun sözlərinə qulaq asmayıb:

“Bu səbəblərindən də aramızda narazılıqlar yaranmağa başladı. Dəfələrlə mübahisələrimiz, söz-söhbətlərimiz olurdu. 21 mart 2024-cü il tarixdə, saat təxminən 17 radələrində yaşadığımız evdə olanda anamla Mayanın mübahisə etmələrini eşitdim və onların yanına getdim. Bu zaman arvadımın boğazından tutub itələdim və o, sobaya dəydi. Sonra qayınatama zəng etdim. O da bir saat ərzində gəlib arvadım və qızımı götürüb getdilər. Qeyd olunan tarixlərdə Mayanı vurmamışam, ona heç bir xəsarət yetirməmişəm. Onun aldığı xəsarətlər gözünün zəif görməsinə görə özünü masanın, çarpayının iti künclərinə çırpması və bu kimi başqa öz ehtiyatsızlığı nəticəsində aldığı xəsarətlərdir”.

Məhkəmə iclasında zərərçəkmiş Maya Qasımova dindirilərkən deyib ki, hadisədən əvvəl qayınanası onun gördüyü ev işlərini bəyənməyib və hər bir adi məsələyə görə mübahisə edib, onu danlayıb:

“Həmçinin qayınanam məndən ərimə də şikayət edirdi. Bunun nəticəsində Qasımla aramızda mübahisələr baş verdi. Sonuncu dəfə qayınanamla mübahisə edərkən Qasım mətbəxə gəldi və mənim boğazımdan tutaraq itələdi. Mən də sobanın üzərinə yıxıldım. Onlar mütəmadi olaraq məni döyməyibdir”.

O, sonda vurğulayıb ki, əri ilə barışıb, ondan heç bir şikayət və tələbi yoxdur.

Kamal Məmmədov

Tarix: 21 May 2025, 08:05

Xəbər lenti