Azərbaycan-İran münasibətləri çox yaxşı səviyyələrə gəlib çıxacaq - RƏY

“İran-Azərbaycan münasibətlərini gərginləşdirmək və çətin vəziyyətə salmaq istəyən qüvvələr həmişə olub, indi də var. Şükürlər olsun ki, hal-hazırda əvvəlki dövrlərdəki kimi münasibətlərin yaxşı olduğu məcrasına qaytarmaq iradəsi ortaya qoyulub. İranın yeni Prezidentinin Azərbaycana səfəri zamanı bu mesajları gördük. Həqiqətən də, Azərbaycanın bu günə qədər səbirlə münasibətləri qoruyub-saxlaması, gərginləşmənin qarşısının alınması üçün atdığı addımları müsbət qiymətləndiririk. İran tərəfi də artıq bunu anlayır. Xüsusilə, Azərbaycanın regionda artan gücünün və yaratdığı yeni reallıqları İran tərəfi də qəbul etməyə başlayıb. Azərbaycanın Tehrandakı səfirliyində törədilən terror aktının araşdırılması, hadisənin törədilməsində əsas iştirakçı olan Yasin Hüseynzadənin bu gün edam edilməsi münasibətlərdə artıq real addımlar atıldığını göstərir. İnanırıq ki, bu cür xoşagəlməz hallar bir daha təkrarlanmayacaq”.

Bu sözləri Pravda.az-a açıqlamasında Milli Məclisin deputatı Naqif Həmzəyev deyib.

O bildirib ki, İran hökuməti Azərbaycanla münasibətləri yaxşılaşdırmağa və gücləndirməyə real töhfələr verəcək: “Bu günə qədər belə addımları daha çox Azərbaycan atırdı, neytrallığı qorumağa cəhdlər edirdi. İndi isə İran tərəfindən də müsbət addımlar görürük. Ümid edirik ki, zaman-zaman Azərbaycan əleyhinə həqiqəti əks etdirməyən mesajlar verən, Azərbaycanla İran münasibətlərini gərginləşdirməyə çalışan İran daxilində və xaricində olan qüvvələri də Tehran özü susdura biləcək. Bir daha imkan verməyəcək ki, münasibətləri pisləşdirməyə hesablanmış açıqlamalar verilsin. Faktiki olaraq iki qonşu ölkə münasibətlərinin normal olacağı təqdirdə proseslərdən hər iki tərəf qazanclı çıxacaq. Xüsusilə, İranda 40 milyondan çox Azərbaycan türkünün yaşaması deməyə imkan verir ki, İranla münasibətlərimiz ən yüksək səviyyədə olmalıdır və ola bilər. Çünki Türkiyədə də qardaşlarımız yaşayır, Türkiyə ilə də münasibətlərimiz ən yüksək səviyyədədir. İranda da Azərbaycana qarşı səmimi münasibət sərgilənərsə, iki ölkə arasında hərtərəfli münasibətlərin inkişafına şahidlik edə bilərik. Xüsusilə, iqtisadi zəmində çox böyük layihələr reallaşdırılıb. Hazırda da yeni layihələr üzərində iş gedir. Bu da imkan verir ki, qarşılıqlı iqtisadi maraqlar nəticə etibarilə digər sahələrdə də əməkdaşlığımızı gücləndirsin. Bir sözlə, son dövrdə baş verən prosesləri müsbət dəyərləndiririk. Ümid edirik, Azərbaycan-İran münasibətləri çox yaxşı səviyyələrə gəlib çıxacaq. Hər iki dövlətin ərazisində yaşayan insanlarımız bu münasibətlərdən faydalana biləcəklər”.

Aytəkin Qardaşova

Tarix: 21 May 2025, 14:06

Xəbər lenti