“Zəngəzur dəhlizi qlobal güc mərkəzlərinin diqqətində olan nəqliyyat-logistika xətlərinin əsas halqasına çevrilmək potensialına malikdir” - Deputat

“Zəngəzur dəhlizinin açılması Ermənistanın öhdəliyi olsa da, rəsmi İrəvan indiyədək bu öhdəliyə əməl etmir. Bu məsələ hələ 2020-ci ilin noyabrında imzalanmış üçtərəfli bəyanatda öz əksini tapıb. Tərəflər arasında aparılan danışıqlarda kommunikasiyaların açılması hər zaman müzakirə mövzusudur. ABŞ-nin Türkiyədəki səfirinin açıqlaması təsdiqləyir ki, Birləşmiş Ştatlar Zəngəzur dəhlizinin idarəçiliyini öz üzərinə götürmək üçün tərəflərə təklif verib. Yəqin bu təklifin bütün detalları hökumətlərə təqdim olunub. Əslində, bu fakt Zəngəzur dəhlizinin dünya üçün nə qədər strateji bir layihə olduğunu təsdiqləyir. ABŞ-ın təklifinə hökumətlər qərar verəcək. Azərbayanın isə Zəngəzur dəhlizi ilə bağlı mövqeyi məlumdur. Bu da ondan ibarətdir ki, Naxçıvanla maneəsiz gediş-gəliş təmin olunmalı, təhlükəsizlik zəmanəti verilməlidir”.

Bu fikirləri Pravda.az-a açıqlamasında Milli Məclisin deputatı Samir Vəliyev deyib.

Deputat bildirib ki, Zəngəzur dəhlizi yalnız iqtisadi layihə deyil, dəhlizin açılması regionda sülh və əməkdaşlıq mühitinin formalaşmasına da əhəmiyyətli təsir göstərəcək: “Azərbaycan Ermənistan tərəfindən işğal olunmuş ərazilərini azad etdikdən sonra müharibə səhifəsinin bağlanmasını, Cənubi Qafqazın sülh və əməkdaşlıq məkanına çevrilməsini təşviq edir. Regionumuzun sülh və əməkdaşlıq məkanına çevrilməsi üçün Zəngəzur dəhlizinin açılması həyati əhəmiyyət kəsb edir. Zəngəzur dəhlizi təkcə Azərbaycanın deyil, bütövlükdə regionun gələcək təhlükəsizliyi, iqtisadi inteqrasiyası və geosiyasi balansı baxımından son dərəcə əhəmiyyətli bir layihədir. Ötən ay müşahidə olunan İsrail–İran qarşıdurması bir daha sübut etdi ki, dayanıqlı sülhə və alternativ marşrutlara ehtiyac heç zaman bu qədər aktuallaşmayıb. Zəngəzur dəhlizi bu gün qlobal güc mərkəzlərinin diqqətində olan nəqliyyat-logistika xətlərinin əsas halqasına çevrilmək potensialına malikdir. Dünyada, o cümlədən yaxın regionlarda baş verən toqquşmalar enerji və ticarət yollarının təhlükəsizliyinin təmin olunması baxımından bu dəhlizin alternativinin olmadığını göstərir. Dəhlizin reallaşması regionda gərginliklərin azalmasına, dövlətlərarası münasibətlərin normallaşmasına və sülhə xidmət edən yeni əməkdaşlıq platformasının formalaşmasına imkan yaradacaq. Zəngəzur dəhlizinin açılması həm Azərbaycanın əsas hissəsi ilə Naxçıvan bölgəsi arasında quru bağlantının bərpası, həm də Türk dünyasının fiziki inteqrasiyası baxımından mühüm addımdır. Bu dəhliz eyni zamanda Avropa ilə Asiyanı birləşdirən alternativ və sabit marşrut rolunu oynayacaq”.

Aytəkin Qardaşova

Tarix: 15 İyul 2025, 14:03

Xəbər lenti