Müəllimi güllələyən şagirdlə bağlı yeni iddia - VİDEO

Tanışının maşını ilə piyadanı vuraraq hadisə yerindən qaçan sürücü həbsdə qaldı

Ali Məhkəmədə yol qəzası törədərək hadisə yerindən qaçmaqda təqsirləndirilən E.Əskərovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Ələsgər Novruzovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib.

Sürücülük hüququ olmadan qəza törədən və piyada ölümü ilə nəticələnən hadisədən qaçan şəxsə 7 il həbs verilib.

İttiham aktına görə, E.Əskərov Cinayət Məcəlləsinin 263-1.3 və 264-cü maddələrində nəzərdə tutulan cinayət əməllərini törətməkdə təqsirləndirilir. Belə ki, o, nəqliyyat vasitəsini idarə etmə hüququ olmadan avtomobil idarə edərək yol hərəkəti qaydalarını pozub, ehtiyatsızlıqdan zərərçəkmiş şəxs S.S-in (adı, soyadı şərtidir) ölümü ilə nəticələnən yol-nəqliyyat hadisəsi törədib və hadisə yerindən qaçıb.

Müəyyən edilib ki, məhkum 31 dekabr 2023-cü il tarixdə saat 22:46 radələrində sürücülük hüququ olmadan tanışına məxsus, texniki cəhətdən saz olan “Mercedes Benz A160” markalı avtomobillə Bakı şəhəri, Xəzər rayonu, Binə qəsəbəsi ərazisində Binə–Savxoz istiqamətində hərəkətdə olub. O, qanunun tələblərinə baxmayaraq, yol və hava şəraitini, görmə imkanlarını nəzərə almayıb, təhlükə yarandığı halda nəqliyyat vasitəsini tam dayandırmaq üçün zəruri tədbirlər görməyib. Yolu sağdan sola keçmək istəyən piyada – zərərçəkmiş S.S.-i gördüyü və avtomobili saxlamaq üçün texniki imkanı olduğu halda, nəqliyyat vasitəsini dayandırmayıb. Nəticədə piyada avtomobilin yan güzgüsünə dəyərək əks yola yıxılıb və əks istiqamətdə hərəkətdə olan T.T.-nin (adı, soyadı şərtidir) idarə etdiyi “Nissan Note” markalı maşının ön hissəsinə çırpılıb.

Hadisə nəticəsində zərərçəkmiş şəxs çoxsaylı, həyat üçün təhlükəli ağır bədən xəsarətləri alıb. Ekspertiza rəyinə görə, ona baş beynin əzilib-dağılması, kəllə sümüklərinin çoxsaylı açıq və qəlpəli sınıqları, üz-çənə sümüklərinin ağır travmaları, qabırğa, çanaq və onurğa sınıqları, bədənin müxtəlif nahiyələrində sıyrıq və əzilmələr yetirilib. Alınmış ağır travmalar nəticəsində zərərçəkmiş şəxs hadisə yerində həyatını itirib. E.Əskərov isə baş vermiş yol-nəqliyyat hadisəsi barədə polis orqanlarına məlumat vermədən, xəsarət alan şəxsə heç bir yardım göstərmədən hadisə yerindən qaçıb.

Bakı Ağır Cinayətlər Məhkəməsinin hökmü ilə E.Əskərova 7 il müddətinə azadlıqdan məhrumetmə cəzası təyin edilib. Hökmdən məhkum və onun müdafiəçisi tərəfindən apellyasiya şikayətləri verilib. Bakı Apellyasiya Məhkəməsinin qərarı ilə apellyasiya şikayətləri təmin edilməyib və birinci instansiya məhkəməsinin hökmünü dəyişdirilmədən qüvvədə saxlanılıb.

Kamal Məmmədov

Tarix: 19 Yanvar 2026, 08:20

Xəbər lenti