“Xəstəxanada deyil, yoxlanıb, gəlib” - "İdrak" liseyinin direktoru

Fevralın 6-da Bakının Binəqədi rayonunda yerləşən özəl “İdrak” liseyinin şagirdi müəllimi güllələyib. Şagird atasına məxsus ov silahı ilə təhsil müəssisəsinə gələrək orada riyaziyyat müəllimi işləyən 1997-ci il təvəllüdlü Şəhla Kamilovaya atəş açıb. Güllə yarası alan müəllim xəstəxanaya yerləşdirilib. Bu saata qədər üç dövlət qurumu hadisə ilə bağlı rəsmi məlumat yayıb. Daxili İşlər Nazirliyi, Baş Prokurorluq faktı təsdiqləyib, şagirdin saxlanıldığını, cinayət işinin başlandığını açıqlayıb.

Kliniki Tibbi Mərkəz isə xəsarət alan müəllimin durumu barədə məlumat yayıb: “Odlu silahdan açılan atəşlə zədələnmə diaqnozu təyin edilən pasiyentə zəruri tibbi xidmətlər göstərilib, müvafiq laborator və instrumental müayinələr aparılıb. Hazırda onun müalicəsi Cərrahiyyə şöbəsində davam etdirilir, vəziyyəti orta ağırdır”.

Bütün bunlara baxmayaraq, “İdrak” liseyinin təsisçisi, professor Mönsüm Alışov hadisəni təkzib etmək niyyətinə düşüb. Pravda.az “Yeni Sabah”-a istinadla müsahibəni təqdim edir:

- Hadisə ilə bağlı hansı məlumatlarınız var? İnsident necə baş verib?

- Panika yayıblar ki, liseyə silahlı hücum olub. Vallah, hamısı yalandır. Tədris olduğu yerdən davam edir. Valideynlər arasında bir az narahatlıq var. Polislər gəlmişdi. Onlar da bilməyiblər. Allaha and olsun, heç bir silahlı hücum olmayıb. Panikadır. Hər şey yaxşıdır, Allaha şükür.

- Bəs baş verən nədir? Bu gün sizin liseydə hansısa hadisə olub?

- Heç nə. Bir az uşaqlarda narahatlıq olub. Uşaq xəstə kimidir. Əslində xəstə deyil, yeniyetməlik dövrü ilə əlaqəlidir. Heç bir narahatlıq yoxdur.

- Bir az açıq danışa bilərsiniz? Deyirsiniz ki, yeniyetməlik çağıdır, uşaqda narahatlıq olub. Buradan davam etsək, sonra nə baş verib?

- Bu barədə heç bir şey lazım deyil. Əslində belə bir şey yoxdur. Xahiş edirəm ki, siz də bu dezinformasiyanı təkzib edəsiniz.

- Axı Daxili İşlər Nazirliyinin, Baş Prokurorluğun rəsmi açıqlamaları var. Hər iki qurumdan bildirilib ki, belə hadisə olub.

- Başqa bir şeydir. Yüngül hadisədir. Xəsarət də yoxdur.

- Hadisə olan otaqda kamera var?

- Hər şey var. Elə bir hadisə olmayıb. Narahatlıq olmasın. Əsas məsələ odur ki, panika yayırlar ki, silahlı hücum olub. Belə şeylər yoxdur, olmayıb. Otaqlarda tədris gedir.

- Sizin liseyin neçə şagirdi var?

- Burada 400-500-ə qədər şagird təhsil alır.

- Hadisəni törədən şagirdin valideynlərini tanıyırsınız?

- Mən bütün valideynlərlə tanışam. Elə bir ciddi məsələ yoxdur. Sizdən xahişim odur ki, bu hadisəni şişirtməyin. Araşdırma gedir. Konkret cavabı dövlət qurumları verəcək.

- Yaralanan müəllimin son durumu necədir? Əməliyyat olunub?

- Heç bir problem yoxdur.

- Əməliyyat olunub?

- Xeyr.

- Xəsarət hansı nahiyəsindəndir?

- Xəsarəti bilmirəm, görməmişəm. Elə bir ciddi xəsarət də yoxdur.

- Xəsarət alan müəllimin fəaliyyətindən razısınız?

- Əlbəttə. Uşaqlarda da elə bir problem olmayıb.

- Müəllimin yanına, xəstəxanaya getmisiniz?

- Xəstəxanada deyil. Yoxlanıb, gəlib.

Tarix: 6 Fevral 2026, 15:10

Xəbər lenti