Samir Vəliyev: “Azərbaycanda buraxılış imtahanlarının tam ləğvi real görünmür”

Azərbaycanda dələduzluq edən stomatoloqa 6 il 6 ay HƏBS CƏZASI

Bakı Apellyasiya Məhkəməsində dələduzluqda təqsirləndirilən Elşən Həsənovun (soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.

Pravda.az-ın əldə etdiyi məlumata görə, hakim Habil Məmmədovun sədrliyi ilə keçirilən prosesdə qərar elan edilib.

Qərara əsasən, apellyasiya şikayəti təmin edilməyib.

İttihama görə, Elşən Həsənov qulluq mövqeyindən istifadə etməklə aldatma və etibardan sui-istifadə yolu ilə özgənin əmlakını ələ keçirərək zərərçəkmiş şəxs Cəmil Bəşirova (adı, soyadı şərtidir) külli miqdarda maddi ziyan vurmaqda təqsirli bilinib.

Məlumata görə, Elşən Həsənov Bakı şəhərində yerləşən “EMV Dent” klinikasında stomatoloq həkim kimi çalışarkən müalicə etdiyi zərərçəkmiş şəxslə yaxın münasibətlər quraraq onun etibarını qazanıb. O, özünü klinikanın sahibi kimi təqdim edərək implant, “Skaner Catcam” və “Ponarama” markalı rentgen aparatlarının alınmasına birgə vəsait qoyulacağı təqdirdə yüksək qazanc əldə ediləcəyinə dair yalan məlumatlar verib.

İstintaqla müəyyən edilib ki, təqsirləndirilən şəxs 29 noyabr 2023-cü il tarixdə implantların alınıb-satılması adı altında Cəmil Bəşirovdan həmin dövrün valyuta məzənnəsi ilə 51 min manat təşkil edən 30 min ABŞ dollarını, daha sonra “Skaner Catcam” aparatının alınması üçün 35 min manat, 3 dekabr 2023-cü ildə isə “Ponarama” markalı rentgen aparatı adı ilə 65 min manat pulu ələ keçirib. O, kommersiya fəaliyyəti görüntüsü yaratmaq məqsədilə klinikanın öz vəsaiti hesabına alınmış və quraşdırılmış tibbi avadanlıqları zərərçəkmiş şəxsə onun vəsaiti hesabına alındığı kimi təqdim edib.

Beləliklə, Elşən Həsənov vahid niyyətlə ümumilikdə 151 000 manat pul vəsaitini dələduzluq yolu ilə ələ keçirərək Cəmil Bəşirova külli miqdarda maddi ziyan vurub.

Bakı Ağır Cinayətlər Məhkəməsinin hökmü ilə Elşən Həsənov 6 il 6 ay müddətinə azadlıqdan məhrum edilib. Hökmlə yanaşı, mülki iddia qismən təmin olunaraq zərərçəkmiş şəxsə dəymiş 151 000 manat maddi ziyanın və 444 manat dövlət rüsumunun təqsirləndirilən şəxsdən tutulması qərara alınıb.

Hökmdən narazı qalan məhkumun müdafiəçisi apellyasiya şikayəti verərək hökmün ləğv edilməsini və ona bəraət verilməsini xahiş edib. Apellyasiya şikayətində qeyd olunub ki, Elşən Həsənovun hərəkətləri cinayət deyil, kommersiya münasibətləri çərçivəsində baş verib. Müdafiə tərəfinin mövqeyinə görə, pul vəsaiti investisiya məqsədilə verilib, tibbi avadanlıqlar faktiki alınıb və zərər uğursuz ticarət əməliyyatı nəticəsində yaranıb. Bildirilib ki, aldatma və əvvəlcədən cinayət niyyəti sübuta yetirilməyib, təqsirləndirilən şəxs öhdəliklərini ondan asılı olmayan səbəblərdən yerinə yetirə bilməyib.

Kamal Məmmədov

Tarix: 9 Fevral 2026, 08:30

Xəbər lenti