Kriminal avtoritet "Mayıl Naxçıvanski"ni öldürən şəxs: “Hadisənin təfərrüatlarını xatırlamağa başlamışam”

Ali Məhkəmədə kriminal avtoriteti qətlə yetirməkdə təqsirləndirilən Aslan Sadıqovun barəsindəki qərardan verilən kassasiya şikayətinin bəzi detalları məlum olub.

Pravda.az-ın əldə etdiyi məlumata görə, hakim İlkin Rəcəbovun sədrliyi ilə keçirilən prosesdə elan olunub ki, birinci instansiya məhkəməsinin hökmündən məhkum tərəfindən 01 iyul 2025-ci il tarixdə apellyasiya şikayəti, həmçinin apellyasiya şikayətinin verilməsi üçün nəzərdə tutulmuş müddətin bərpa edilməsinə dair vəsatət təqdim edilib.

Bakı Ağır Cinayətlər Məhkəməsinin 29 iyul 2025-ci il tarixli qərarı ilə Aslan Sadıqovun hökmdən apellyasiya şikayətinin verilməsi üçün qanunla müəyyən edilmiş müddətin bərpasına dair verdiyi vəsatət təmin edilməyib. Həmin qərardan narazı qalan təqsirləndirilən şəxs apellyasiya şikayəti ilə çıxış edərək, qərarın ləğv edilməsini və apellyasiya şikayətinin verilməsi üçün müəyyən edilmiş müddətin bərpa olunmasını xahiş edib.

Aslan Sadıqov apellyasiya şikayətini onunla əsaslandırıb ki, cinayət işinin ibtidai istintaqı dövründə, eləcə də məhkəmə baxışı zamanı əziyyət çəkdiyi ruhi xəstəliklər və yaddaş pozuntuları səbəbindən özünü lazımi qaydada müdafiə etmək imkanından məhrum olub. O, həmçinin bildirib ki, məhz bu səbəbdən barəsində çıxarılmış ittihamedici hökmdən vaxtında apellyasiya şikayəti verə bilməyib. Məhkum qeyd edib ki, son illərdə yaddaşının bərpa olunması nəticəsində hadisənin təfərrüatlarını xatırlamağa başlayıb və bu səbəbdən apellyasiya şikayətini gecikmə ilə təqdim edib.

Lakin Bakı Apellyasiya Məhkəməsinin 18 sentyabr 2025-ci il tarixli qərarı ilə apellyasiya şikayəti təmin edilməyib, Bakı Ağır Cinayətlər Məhkəməsinin 29 iyul 2025-ci il tarixli qərarı isə dəyişdirilmədən saxlanılıb.

Apellyasiya instansiyası məhkəməsinin bu qərarından sonra Aslan Sadıqov kassasiya şikayəti verib. Kassasiya şikayətində o, apellyasiya instansiyası məhkəməsində irəli sürdüyü arqumentləri təkrarlayaraq, Bakı Apellyasiya Məhkəməsinin qərarının ləğv edilməsini, habelə apellyasiya şikayətinin verilməsi üçün müəyyən edilmiş müddətin bərpa olunmasını xahiş edib.

Qərara əsasən, kassasiya şikayəti təmin edilməyib.

Qeyd: Hadisə 2020-ci il iyulun 2-də Suraxanı rayonu Hövsan qəsəbəsində qeydə alınıb. Qəsəbə ərazisində 1979-cu il təvəllüdlü Mail Mustafayevin bıçaqlanaraq öldürülməsi barədə daxil olan məlumat əsasında prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib.

Faktla bağlı Suraxanı Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib.

İstintaqla hadisənin zərərçəkmişin tanışı, 1989-cu il təvəllüdlü Aslan Sadıqov tərəfindən şəxsi münasibətlər zəminində aralarında yaranmış münaqişə zamanı törədilməsinə əsaslı şübhələr müəyyən edilib.

Qətlə yetirilən Mail Mustafayev kriminal aləmdə “Hövsanlı Mayıl”, “Mayıl Naxçıvanski” kimi tanınıb. O, əvvəllər dəfələrlə məhkumluq həyatı yaşayıb. Mail Mustafayevin mərhum “qanuni oğru” “Rövşən Lənkəranski”nin yaxın adamlarından olduğu bildirilir.

Bakı Ağır Cinayətlər Məhkəməsinin hökmü ilə Aslan Sadıqov 18 il azadlıqdan məhrum edilib.

Kamal Məmmədov

Tarix: 11 Fevral 2026, 08:52

Xəbər lenti