Deputat: “Uşağı ilk növbədə başa salarlar, əməl etməzsə, cəzalandırarlar, lakin şiddətin əleyhinəyəm”

“Uşaq hüquqlarının müdafiəsi son zamanlar geniş müzakirə mövzusudur. Millət olaraq milli-mənəvi dəyərlərimizi özündə əks etdirən, min illərə söykənən tərbiyə metodumuz var. Uşaqlarımızı hər zaman milli dəyərlərimizə, mənəviyyatımıza uyğun tərbiyə etməyə çalışmışıq. Hər xalqın öz mədəniyyəti, keçmişdən bəri qorunub saxlanılan adət-ənənəsi var. Uşaqları ənənələrə, milli-mənəvi dəyərlərə hörmətlə böyütməyin tərəfdarıyam. Uşaqlar böyüyün, kiçiyin yerini bilməlidirlər. Böyüklərin qarşısında hörmətsizlik, kobud şəkildə desək, tərbiyəsizlik etməməlidirlər. Bizə bunu öyrədiblər, biz də övladlarımıza öyrətmişik. Bu tərbiyə metodu çox normaldır”.

Bu sözləri Prada.az-a açıqlamasında Milli Məclisin deputatı Tənzilə Rüstəmxanlı deyib.

Deputatın sözlərinə görə, uşağı ilk növbədə başa salarlar, əməl etməzsə, cəzalandırarlar: “Lakin uşaqlara qarşı şiddətin əleyhinəyəm. Böyük sevgi ilə övladlarımızı böyütməli, yetişdirməliyik. Amma valideyn tərəfindən bəzi qadağalar mütləq qoyulmalıdır. Buna görə valideyni cərimələmək... Bir atadan, bir andan daha yaxşı uşağı kim sevə bilər? Kim onu tərbiyə edə bilər? Yaxşı olardı ki, valideyn himayəsindən məhrum qalmış, uşaq evlərində böyüyən uşaqlara şiddətə qarşı sərt qanunlar tətbiq edilsin. Düşünmürəm ki, ata-ana öz uşağını ciddi şəkildə döyər... Valideyn uşağa yüngül xəbərdarlıq edə bilər. Məncə, buna görə valideynlərin cəzalandırılması ən son hadisədir. Əlbəttə, uşaqlara şiddət göstərilməsinə, zorakılığa qarşı olmaq lazımdır. Övladlarımızı mühitdən, virtual dünyadan, sosial mediadan, birinci növbədə zorakılığa aparan yollardan qorumalıyıq. Dünyamızda nələr baş verir, görürsünüz. Okeanın o başından necə görüntülər yayılır... Görün nə iyrəncliklər var... Övladlarımızı bu mühitlərdən qorumaq lazımdır. Yoxsa valideynləri cəzalandırmaqla... Hər bir millətin öz mədəniyyəti var. Biz türk milləti olaraq övlad yetişdirmə təcrübəmiz digər millətlərdən daha üstün və daha düzgündür”.

Qeyd: Milli Məclisdə İnzibati Xətalar Məcəlləsinə təklif olunan dəyişikliklə bağlı qanun layihəsi müzakirə yaradıb. Layihəyə əsasən, valideynlər (onları əvəz edən şəxslər), uşaqlara nəzarəti həyata keçirmək vəzifəsini daşıyan təhsil, tibb, sosial xidmət, idman, mədəniyyət, istirahət müəssisələrinin və penitensiar müəssisələrin işçiləri tərəfindən uşağa qarşı cismani cəzanın tətbiqinə, yəni tərbiyə etmək məqsədilə və ya intizam tədbiri kimi uşağa qarşı fiziki və (və ya) psixoloji zorakılığın törədilməsinə görə iki yüz manat məbləğində cərimə tətbiq olunacaqlar.

Aytəkin Qardaşova

Tarix: 16 Mart 2026, 08:46

Xəbər lenti