Təqaüdçünün evinə silahlı basqın edərək 20 min manat tələb etdilər – HÖKM

Gəncə Ağır Cinayətlər Məhkəməsində quldurluqda təqsirləndirilən Cəsur Cəbiyev (soyadı şərtidir) və yetkinlik yaşına çatmayan E.İsgəndərovun cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Natiq Əliyevin sədrliyi ilə keçirilən prosesdə hökm oxunub.

Məhkəmənin hökmü ilə Cəsur Cəbiyev 9 il 6 ay və E.İsgəndərov isə 8 il 6 ay müddətə azadlıqdan məhrum edilib.

İttihama görə, 2007-ci il təvəllüdlü Cəsur Cəbiyev və 2010-cu il təvəllüdlü - yetkinlik yaşına çatmayan E.İsgəndərov qabaqcadan əlbir olaraq quldurluq məqsədilə zərərçəkmişin evinə daxil olub, zərərçəkmiş Rafiq Bədəlovu (soyadı şərtidir) öldürməklə hədələyərək pul və qiymətli əşyalarını ələ keçiriblər.

Hadisə 2025-ci ildə Şəmkir rayonunun Dəllər-Cəyir kəndində baş verib.

Belə ki, Cəsur Cəbiyevlə E.İsgəndərov qanunsuz yolla özgənin əmlakını ələ keçirmək məqsədilə əvvəlcədən cinayət planı hazırlayıblar. Onlar kənddə tənha yaşayan və qonşuları olan zərərçəkmiş şəxsin evinə basqın etmək barədə razılığa gəliblər.

E.İsgəndərov hadisədən əvvəl istintaqla müəyyən edilməyən bıçağı əldə edərək silahlanıb. Daha sonra hər iki şəxs gecə saatlarında birlikdə Dəllər-Cəyir kəndinə yollanıb. Onlar gecə saat 00:30 radələrində kəndə gəlib, təxminən bir saat ərzində Rafiq Bədəlovun yaşadığı evin ətrafında müşahidə aparıblar. Ətrafda heç kimin olmadığına əmin olduqdan sonra fərdi yaşayış evinə qanunsuz daxil olublar.

İlk olaraq yataq otağına keçən şəxslər zərərçəkmişə məxsus şalvarın cibindən 493 manat pul götürərək ələ keçiriblər. Lakin bununla kifayətlənməyən təqsirləndirilən şəxslər evdə daha çox pul və qızıl-zinət əşyaları axtarmağa davam ediblər. Onların hərəkətlərindən yaranan səsə oyanan Rafiq Bədəlov mətbəxdə işığı yandırıb. Bu zaman hər iki şəxs onun üzərinə gediblər.

Materiallarda qeyd olunur ki, E.İsgəndərov üzərində gizlətdiyi bıçağı çıxararaq silah qismində tətbiq edib. Onlar birlikdə zərərçəkmişi öldürməklə hədələyərək ondan 20 000 manat pul verməsini tələb ediblər.

Rafiq Bədəlov isə təqaüdçü olduğunu və bu qədər pulunun olmadığını bildirib.

Pul tapa bilməyən təqsirləndirilən şəxslər zərərçəkmişə məxsus 190 manat dəyərində "Philips Xenium" markalı mobil telefonu, eləcə də 45 manat dəyərində açarları açıq talama yolu ilə ələ keçiriblər.

İstintaqın qənaətinə görə, onların hərəkətləri hücuma məruz qalan şəxsin həyatı və sağlamlığı üçün təhlükəli zor tətbiq ediləcəyi hədəsi ilə müşayiət olunan basqın xarakteri daşıyıb və bu səbəbdən əməl quldurluq kimi qiymətləndirilib.

Toplanmış sübutlar əsasında təqsirləndirilən şəxslərə qabaqcadan əlbir olan bir qrup şəxs tərəfindən silah qismində istifadə olunan əşya tətbiq edilməklə quldurluq əməli törətmək ittihamı irəli sürülüb.

Kamal Məmmədov

Tarix: 7 Avqust 2026, 08:45

Xəbər lenti