“Məhəllə uşağından pul almısan” mübahisəsi qanlı insidentlə nəticələndi – MƏHKƏMƏ

Bakı Ağır Cinayətlər Məhkəməsində xuliqanlıq niyyətilə qəsdən sağlamlığa ağır zərər vurmada təqsirləndirilən Həsən Məlikovun (soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Namiq Kərimovun sədrliyi ilə keçirilən prosesdə hökm oxunub.

Məhkəmənin hökmü ona şərti cəza təyin edilib.

Qeyd: İbtidai araşdırma orqanı tərəfindən təqsirləndirilən şəxs barəsində Cinayət Məcəlləsinin 126.2.4-cü (xuliqanlıq niyyətilə qəsdən sağlamlığa ağır zərər vurma) maddəsi ilə ittiham irəli sürülüb.

İttihama əsasən, hadisə 2025-ci ildə paytaxtın Sabunçu rayonu ərazisində axşam saatlarında baş verib. Həsən Məlikov saat 19:30–20:00 radələrində tanışı, zərərçəkmiş Məhəmməd Hümbətovla (soyadı şərtidir) görüşüb. Görüş zamanı tərəflər arasında bundan bir qədər əvvəl baş vermiş hadisə ilə bağlı mübahisə yaranıb.

Belə ki, zərərçəkmiş şəxsin məhəllədə yaşayan və onlardan yaşca kiçik olan şəxslərdən pul alması barədə həqiqətə uyğun olmayan məlumat yaydığı qeyd edilib. Təqsirləndirilən şəxs bu məsələ ilə bağlı ona iradını bildirib.

Mübahisə zamanı Həsən üzərində gəzdirdiyi, istintaqla müəyyən olunmayan kəsici-deşici alətdən – bıçaqdan istifadə edib. O, heç bir əsaslı səbəb olmadan Məhəmmədin bud və kürək nahiyələrinə ümumilikdə iki zərbə vurub. Nəticədə zərərçəkmiş şəxsin sol bud nahiyəsində bir ədəd deşilmiş-kəsilmiş yara, eləcə də döş qəfəsinin sol yarısının arxa divarında sol plevra boşluğuna nüfuz edən deşilmiş-kəsilmiş yara əmələ gəlib.

Ekspertiza nəticələrinə əsasən, sol bud nahiyəsindəki xəsarət sağlamlığın qısa müddətə pozulmasına səbəb olan sağlamlığa yüngül zərərvurmaya aid edilib.

Beləliklə, təqsirləndirilən şəxsin hərəkətləri nəticəsində zərərçəkmiş şəxsə həm qəsdən yüngül, həm də qəsdən ağır zərər vurulduğu bildirilib.

Məhkəmə iclasında qanuni nümayəndəsinin iştirakı ilə dindirilən Həsən Məlikov ona Cinayət Məcəlləsinin 126.2.4-cü maddəsi ilə elan edilmiş ittiham üzrə özünü təqsirli bilib.

O, ibtidai istintaq zamanı verdiyi ifadəsini də təsdiqləyib.

Həsənin sözlərinə görə, hadisə günü evdə olub. Həmin vaxt Məhəmməd ona zəng edərək yaşadığı məhəlləyə gəlməsini istəyib. Ora getdikdən sonra Məhəmməd ona məhəllədə yaşayan bir şəxsi sıxışdıraraq pulunu aldığını deyib. Təqsirləndirilən şəxs isə bu məlumatın doğru olmadığını bildirib. Məhəmməd dediklərini təkrarlayıb və tərəflər arasında mübahisə yaranıb. Bundan sonra o, hadisə yerindən ayrılaraq evinə gedib.

Təqsirləndirilən şəxs bildirib ki, həmin gün Məhəmmədlə yenidən görüşüb. Bu dəfə Məhəmmədin yanında dostu, onun isə öz dostları olub. Məqsədi dostlarının onun həmin şəxsdən pul almadığını təsdiqləməsi olub. Lakin görüş zamanı tərəflər arasında yenidən mübahisə yaranıb və təqsirləndirilən şəxs zərərçəkmişə bıçaqla xəsarət yetirib.

Həsən daha sonra Məhəmmədin dostu ilə birlikdə onu döydüyünü də bildirib.

Məhkəmədə təqsirləndirilən şəxs törətdiyi əməldən peşman olduğunu söuləyib. O, bir daha belə hərəkət etməyəcəyini deyərək məhkəmədən barəsində yüngül cəza təyin edilməsini xahiş edib.

Kamal Məmmədov

Tarix: 11 Avqust 2026, 10:31

Xəbər lenti