Elman Nəsirov: “Avropa Parlamentindəkilər proseslərə qanunun gözü ilə deyil, mədələrinin və ciblərinin gözü ilə baxırlar”

“Avropa Parlamenti Ermənistandan daxil olan məhsullara ticarət güzəştlərini tətbiq edən qanun layihəsini təsdiqləyib. Bu, özü də bir daha göstərir ki, Avropa Parlamentində əyləşən şəxslər bir çox hallarda hadisə və proseslərə qanunun gözü ilə deyil,mədələrinin və ciblərinin gözü ilə baxırlar. Buna başqa ad vermək mümkün deyil”.

Bu sözləri Pravda.az-a açıqlamasında Milli Məclisin deputatı Elman Nəsirov deyib.

E.Nəsirov qeyd edib ki, Azərbaycan Respublikasının Prezidenti cənab İlham Əliyev Türk Dövlətləri Təşkilatının (TDT) müsəlman dini liderlərini qəbul edərkən bir sıra strateji əhəmiyyətli tezislər irəli sürüb: “Onlardan biri də beynəlxalq hüququn işləməməsi, eyni zamanda beynəlxalq hüququn keşiyində dayanmalı olan beynəlxalq təşkilatların qeyri-adekvat davranışı ilə bağlıdır. Cənab Prezident Avropa Parlamentinin fəaliyyətinə də qiymət verib söylədi ki, bu qurum rüvşətxorlar yuvasına çevrilib. Bildirib ki, bu təşkilatın rəhbərliyi səviyyəsində korrupsiya baş alıb gedir və bu konteksdə həm də Avropa Parlamentinin vitse-prezidentlərindən birini, Yunanıstanı təmsil edən şəxsin də fəaliyyətinə toxunub, onun rüşvətxor və korrupsioner fəaliyyətinə diqqəti cəlb edib, həm də bəyan etdi ki, bütün rüşvət və korrupsiya faktları təsdiqlənsə belə həmin şəxs həbs edilməyib, azadlıqdadır. Bu konteksdə cənab Prezident eyni zamanda Avropa Şurasının anti-Azərbaycan və ermənipərəst siyasətinə də toxundu və bir daha vurğuladı ki, onlar birbaşa ermənispərəst siyasət yeridir və Ermənistanın hələ işğal dövründə siyasətinə göz yumur, bir çox hallarda açıq şəkildə Ermənistanın mövqeyini dəstəkləyib. İndi də həmin siyasəti görürük. Cənab Prezident vurğulayıb ki, 2023-cü ildə suverenliyimizi tam təmin etdikdən 4 ay sonra Avropa Şurası Parlament Assambleyası Azərbaycana qarşı sanksiya tətbiq edib, nümayəndələrimizin fəaliyyətinə qadağalar qoyub. Bütün bunlar göstərir ki, hər iki qurum ermənipərəst mövqedədir. Ayrı-ayrı elementləri görürük”.

Deputat vurğulayıb ki, Azərbaycanla heç kim təzyiq və təhdid dili ilə danışa bilməz: “Bizim işimiz haqq işidir və vasitəçilər olmadan Ermənistanla sülh prosesini və sülh gündəliyini irəli aparırıq və bu istiqamətdə tarixi nailiyyətlərə imza atmışıq. İstisna deyildi ki, 2027-ci il tarixə sülh ili kimi daxil olsun və 2027-ci il çərçivəsində nəhahət ki, Ermənistanla Azərbaycan arasında sülh müqaviləsi imzalansın. Amma təəssüf hissi ilə qeyd etməliyəm ki, sülh müqaviləsinin imzalanmasında maraqlı olmayan qurumların sırasında Avropa Parlamenti və AŞPA ön sırada dayanıb”.

Şəhanə Qədirli

Tarix: 16 Sentyabr 2026, 15:23

Xəbər lenti