Aqil M.Quliyev: “Hazırda erməni xalqı ilə mübarizə aparmırıq, “erməni ideologiyası” ilə mübarizə aparırıq”

Məşhur aktyor və rejissor Aqil M.Quliyev müsahibə verib.

 

Müsahibəni təqdim edirik:

 

- Aqil bəy, cəbhədə baş verən hadisələri aktiv izləyirsinizmi?

 

- Təbii ki, aktiv şəkildə izləyirəm, lazım bildiyim informasiyaları sosial şəbəkədə paylaşıram. Amma çalışıram emosiyalarımıza sahib çıxaq. Çünki şükür Allaha, savaşda qələbə bizimdir. Bu, sadə problem deyil, 30 ildir həll edilmirdi. Hər bir prosesin arxasında ideoloji sistem var. Biz hazırda Ermənistan və erməni xalqı ilə mübarizə aparmırıq. Biz “erməni ideologiyası” ilə mübarizə aparırıq. Onları birləşdirən budur, dərinə getsək, elmi dildə ifadə eləsək, ultra-sağ millətçi ideologiya ilə üz-üzəyik. Vaxtilə Qaregin Njde və sirdaşları da bu ideologiya ilə silahlanıblar.

 

Məsələn, mən bir müddət bunu araşdırdım, vikipediyada məlumatlar ancaq rus və ingilis dillərindədir. Bunu bilərəkdən belə ediblər. Həmin mətnləri Azərbaycan və türk dillərinə çevirmək olmur. Bunları tərcümə edib, öyrənmək lazımdır. Konkret olaraq, bu, ən pis milliyyətçilikdir.

 

- Siz neonasizmdən danışırsınız?

 

- Mən hazırda erməni ideologiyasından danışıram. Onun kökü nədir? Nəyə görə neçə milyon insan buna aldanıb? Sadə bir fikrə on milyondan çox insan aldanmaz, ondan istifadə etməz. Əslində, problem budur.

 

- Gələcəkdə Vətən müharibəmizi ekranlaşdırmaq, tutalım, general Polad Həşimov, Milli qəhrəman Mübariz İbrahimovun həyatından film çəkmək istərdinizmi?

 

- Zənnimcə, bu, mənim yox, Mədəniyyət Nazirliyinin, Kinematoqrafçılar İttifaqının qarşısına qoyulan ilkin məqsədlərdən biri olmalıdır. Hazırda qalibiyyət ruhu daha güclüdür, biz hamımız bir bayraq altında birləşmişik. Təbii ki, bunu yaşadan filmlər çəkmək lazımdır. Bu, tək mənim fikrim deyil, Vətəni sevən hər rejissor, prodüser başa düşür ki, biz ali məqsədimizi, qələbə ruhumuzu filmlərdə, tamaşalarda, seriallarda, yazıçı və şairlərimiz isə ədəbiyyatda yaşatmalıyıq.

 

- Könüllü orduya yazılmısınız?

 

- Şükür Allaha, elə bir vəziyyətdəyik ki, buna ehtiyac yoxdur. Amma fikirləşirəm ki, hər insan öz sahəsində, bildiyi sahədə mübarizə aparmalıdır.

 

- Cəbhə bölgəsinə getmək istəyərsinizmi?

 

- Bu yaşda yararlı olacamsa, niyə də yox?!

 

- Prezident İlham Əliyevin qələbə xəbərlərini hər birimiz böyük məmnuniyyətlə gözləyirik. Sizin təəssüratlarınız necədir?

 

- Mənim anam Qarabağdan, Ağdərədən, atam isə Laçındandır. Anam bütün günü televizorun qarşısındadır. Xalalarım Tərtərdə yaşayır. Ona görə də bu, bizim üçün həssas məsələdir.

 

- Xəzər televiziyasında həmkarınız Kənan M.M ilə "Qayıdış" serialına çəkilirsiniz...

 

- Əvvəla deyim ki, "Qayıdış" serialının çəkilişi davam edir. Mənfi obraz canlandırıram. Kənan M.M gözəl rejissor və aktyordur. Bu işləri çox gözəl bacarır.

 

- 90-cı illərdən bu sahədəsiniz. Ümumiyyətlə, bu gün kino sahəsini necə qiymətləndirirsiniz? Dünya ilə ayaqlaşacaq vəziyyətə gələ bilərikmi?

 

- İnsanı hər şeydən fərqləndirən ideyaya uymaqdır. Hər bir toplumu müəyyən istiqamətə yönəltmək olar. İki ay əvvəl heç kim inanmazdı ki, biz bu günü yaşayacağıq. Mən özüm də inanmazdım ki, biz bir ideya ətrafında birləşib, nə isə edə bilərik. Bu baş verir.

 

Bizim kinoda da böyük dəyişikliklər baş verir, kadr dəyişikliyi var, "Azərbaycanfilm" kinostudiyasına gənc kadrlar təyin olunub. Çox inanıram ki, indi nə isə baş verəcək. Məsələn, "Vikinqlər" teleserialına iki ay əvvəl tamamilə fərqli hisslə, indi isə başqa duyğu ilə baxırıq. Qalibiyyət genə işləyəndə hər şeyi başqa cür qəbul edirsən.

 

Artıq bizdə hər şey dəyişəcək və dəyişməlidir. 30 il özünü uduzmuş hiss etmək pis haldır. Biz patriarxal cəmiyyətdə yaşayırıq.

 

- Sizin xarici ölkələrdə rejissor dostlarınız var. Onlardan hansı birisə ölkəmizə dəstək veribmi?

 

- Ukraynada dostlarım çoxdur. Eləcə də rus və yəhudi dostlarım var. Onlar açıq və şəxsi söhbətlərdə dəstək oldular. Təbii ki, susan da var. Amma mən gördüm ki, biz tək deyilik.

 

- Bir az öncə qeyd etdiniz ki, Vətən müharibəsindən bəhs edən film Mədəniyyət Nazirliyinin işi olmalıdır. Maraqlıdır, siz özünüz belə bir təşəbbüsünüzlə çıxış edərsinizmi?

 

- Özümüz 2010-cu ildən "Şaman" filmini çəkirik. Ekran əsərinə döyüş meydanından səhnələr əlavə edəcəyik. Və film döyüş meydanı ilə bitəcək.

 

- Filmdə mərhum Xalq artisti Amaliya Pənahova da oynayırdı...

 

- Bəli, filmdə xalq artistləri Amaliya Pənahova, Baliyev Yuri Nikolayeviç oynayıb. Ekran əsərində kifayət qədər tanınmış aktyorlar var. Biz filmə başlayanda ssenarinin kulminasiya nöqtəsinə özümüz də inanmırdıq. İndi o günə çatdıq, savaşımız başladı. Son baş verənlər bizə filmi bitirməyə imkan verir.

 

- Filmdə Amaliya xanımın obrazını necə tamamladınız?

 

- Elə yazılmış və çəkilmişdi ki, obrazı neytral və paralel gedir. İnşallah, filmin təqdimatı baş tutanda görərsiniz.

 

- Bir rejissor kimi işlərinizə çoxlu zaman sərf edir və təqdimata tələsmirsiz. Bu, nədən irəli gəlir?

 

- "Şaman" filmi on ildir çəkilir, bədii filmdir. Qədim türk mifologiyası üzərində qurulmuş bir ekran əsəridir. Bu film sifarişli deyil. Əgər sən nə isə yaratmaq istəyirsənsə, bütün gücünü, zamanını ona verməlisən. Səndən sonra yaratdıqların yaşamalıdır. "Şaman" filminə ssenari yazılır, inşallah, savaşa nöqtə qoyulsun və biz çəkilişlərə başlayaq. Bu, üç saatlıq film olacaq.

 

- Filmin çəkilişləri on il davam edibsə, iddiası nə qədərdir?

 

- Filmə iddiamız çox böyükdür. Film qədim türk mifologiyasından bəhs edir. Qədim türk tayfalarını Altaydan bu tərəfə gətirən bir ideologiyadır. Bizim əcdadlarımız hansı inanclarla bu qədər yol gəliblər, həmişə mənə maraqlı gəlib. Mifologiya haqqında ilk dəfə film çəkilir.

 

- Bir müddət əvvəl qısamüddətli həbs həyatı yaşadınız. O zaman yazılar yazmağa başladınız. Amma yazılanları görə bilmədik...

 

- İnşallah, görəcəksiniz. Kitab şəklində nəşr ediləcək. Zaman çox nisbi məfhumdur. Mən öz həyatımdan yazıram. Və bu yazıların kulminasiya nöqtəsini görmürəmsə, nəyəsə mühüm yanaşma gətirmirsə, bunu heç kim oxumasa yaxşıdır.

 

Ona görə həyatımda mühüm hadisəni yaradıram ki, yaşadıqlarım maraqlı olsun. Mən hansısa keçəl əminin həyatını niyə oxumalıyam? Maraqlı bir həyat yaşayıbsa, başqa məsələ...

 

- Kitabda həbsdə yaşadıqlarınızı, yoxsa ümumi həyatınızı qələmə alırsınız?

 

- Kitab yalnız həbs həyatından ibarət deyil, bioqrafikdir. Kiminsə avtobioqrafiyasını oxuyanda əvvəlcə düşünürəm ki, bu insan nə yaradıb, kitabda nə yazıb və mənə nə verəcək?

 

- İnandırıcı hadisə olmadığına görə kitabı üzə çıxarmırsınız?

 

- Həyatım davam edir. Və həyatım kifayət qədər maraqlı macəralardan ibarətdir.

 

- Aqil M.Quliyev bioqrafiyasının fərqi nədən olacaq?

 

- Onu gərək oxuyasınız...

 

- Kitabın adı?

 

- Yəqin ki, "Şaman" olacaq.

 

- Mistikaya o qədər inanırsınız?

 

- Mən mistikaya inanmıram, mən mistikanı bilirəm.

 

- Mistik qorxularınız varmı?

 

- Uşaqlıqda var idi. Qara basırdı, yuxumda çox şeylər görürdüm. İntellekt sayəsində onlar yox oldu. Atam məni bu barədə çox sərt tərbiyə edib. Uşaq vaxtı günə 150 səhifə kitab oxuyurdum. İntellekt sayəsində daxilimdəki qaranlıq qorxunu yenə bildim.

 

- Öldükdən sonra ikinci dünyanın var olduğuna inanırsınızmı?

 

- Bəli, bəşəriyyət ölümdən sonra nəyinsə baş verəcəyinə inanır. Əsas məsələ nə olacağıdı... Hamı bilir ki, nəsə bir qüvvə var. O qüvvəyə qoyulan ad, sitayiş formaları fərqlidir. Həyatda biz tək deyilik. Təbii, mən inanıram ki, o tərəfdə bir dünya var.

 

- Dindar insansınız?

 

- Dindar və inanclı olmaq tam fərqli məfhumlardır. İnam göydən gəlir, din isə insanların icad etdiyi strukturdur.

 

- Sizcə, Allah əvvəldən mövcud idi, yoxsa onu insanlar yaradıb?

 

- Mən düşünürəm ki, özümüz haqqında böyük fikirdəyik. Mən insan və bəşəriyyət haqqında yüksək fikirdə deyiləm.

 

- Sizin səsinizdə vətənpərvərlik ruhlu verilişlər təqdim etmək gözəl alınardı. Belə bir fikriniz varmı?

 

- Dəvət olsa, qəbul edərəm.

 

- Adətən, rejissorlar demokratik fikirli insanlar olur. Bu, nə dərəcədə doğru yanaşmadır?

 

- Mən deməzdim ki, rejissorlar demokratdırlar, bu belə deyil. Rejissorluqla demokratiya yaxın deyil.

 

- Səsinizdən söz düşmüşkən... Sizin səsinizdən xoşu gələn qadınlar çox olub?

 

- Olub, təbii... Kiminsə gözünə, saçına, mənim də səsimə aşiq olurlar. Qadınlar qeyri-obyektiv məxluqlardır. Xanımlar kişiləri başqa cür görürlər. Hərdən görürsən ki, gözəl qadındır, amma yanındakı çox çirkin kişi var. Deməli, qadın o kişidə nə isə tapıb. Kişilər sürətpərəstdirlər.

 

- Həbsdən sonrakı Aqil M.Quliyevin həyatında dəyişikliklər oldumu?

 

- Çox böyük fərq var. Həbs deyəndə ki, iş Apellyasiya Məhkəməsi ilə bağlandı.Teleqraf

Tarix: 29 Oktyabr 2020, 10:08   
Xəbər lenti
Çox oxunanlar

Ən son xəbərləri səhifəmizdən də izləyin