“Şuşada Zeynəb Xanlarova Narui Alaverdiyanın sinəsindən itələyib dedi ki…”

Bunu Əməkdar artist Füruzə İbadova deyib.

Müğənni qələbə münasibətilə xalqımızı təbrik edib:

“Bu ərəfələrdə ölkədən kənarda da olsam, erməni vətəndə idi, tez-tez əlaqə saxlayırdıq, zəng edirdim. Xaricdə yaşayan soydaşlarımız da bu prosesləri diqqətlə izləyirdilər, ölkəmizə dəstək olurdular. Hər dəfə şəhid xəbəri gələndə ağlayırdılar. İndi görün bizim prezidentimiz, cənab Ali Baş Komandanımız, əvəzi olmayan liderimiz İlham Heydər oğlu Əliyev nə boyda səbirli və təmkinli idi. O, görün nə boyda güc sərf etdi ki, torpaqlarımız işğaldan azad edildi. Bir sözlə, bu bir möcüzə idi, mən elə bil sanki yuxudayam. Bizim cənab prezident 17 ildir ki, prezidentimizdir. Ondan öncə ulu öndərimiz Heydər Əliyev hakimiyyətə gəldi və bizi katastrofadan xilas etdi. 1993-cü ilə qədər Murovdağ bölgəsini, Zaur Rzayevlə, Amaliya Pənahovayla və Oqtay Kazımi ilə birlikdə gəzirdik. İndiki generalların çoxu onda leytenant, kapitan idi. Biz onda bilirdik ki, ermənilər Yevlağa və ordan da Bakıya gələcəklər. Bütün bunların qarşısını Heydər Əliyev aldı. Ondan sonra cənab İlham Əliyev görün 17 il ərzində ordunu necə formalaşdırdı”.

Sənətçi Cıdır düzündə illər öncə baş verən bir tarixi hadisəni də nəql edib:

“1980-ci ildə biz çox böyük heyətlə Şuşaya getdik. M.P.Vaqifin büstünün açılışı idi. Heyətin tərkibində Zakir Bağırov, Zeynəb Xanlarova, Rəşid Behbudov, Lütfiyar İmanov, Qəndam Quliyeva, Arif Babayev, Zaur Rzayev, Akif İslamzadə var idi. Mən onda Şövkət xanımın sinifində birinci kursda oxuyurdum. Hamı çıxış edəndən sonra Zeynəb xanım konserti bağlamalı idi. Vaqifin büstü açıldı və Amaliya Pənahova və Əlabbas Qədirov orda Səməd Vurğunun “Vaqif” pyesindən bir diplomat səhnəsini oynadılar və sonra məqam gəldi Zeynəb xanıma. Bir də gördük ki, səs-küy düşdü və Zeynəb xanım kiminsə sinəsindən itələdi. Gördüm ki, Ermənistanın Xalq artisti Narui Alaverdiyandır. O, Xankəndində yaşayırdı. Zeynəb xanım onu sinəsindən itələyib dedi ki, sən burda oxumayacaqsan. Allahverdiyan dedi ki, nə üçün? Zeynab xanım dedi ki, bura Vazgenin tədbiri deyil, Vaqifin tədbiridir və o, da azərbaycanlıdır. Zeynəb xanıma indi deyirəm ki, sizin əllərinizə qurban olum, nə yaxşı qoymadınız onu oxumağa. Onu demək istəyirəm ki, Cıdır düzünü mən onda görmüşdüm. İndi Qarabağ haqqında bir musiqi hazırlanır mənim üçün, onu oxuyacam. Gedib Şuşada Cıdır düzündə bu musiqini oxuyub, Allaha dua edəcəm. Şəhidlərimizin tökülən qanına qurban olum, onları dünyay gətirən anaların bir var əllərindən, mən onların ayağından öpürəm. Bu döyüşlərdə mənim əmim nəvəsi, üç bacının bir qardaşı şəhid oldu. Bir qardaşımın oğlu anasına deyib ki, guya mənə baş çəkməyə gəlir, amma birbaşa Füzuliyə getmişdi. O qardaşımgil İsraildə yaşayır. Elə oldu ki, qardaşım oğlu itkin düşmüşdü, amma sonra əlaqə saxlayıb dedi ki, yolu azmışdıq, qayıdıb gəldik, narahat olmayın. Əsgərlərimizin hamısı mənim balamdır. Mən jurnalistlərimizi də təbrik edirəm. Sizlərin də əməyi danılmazdır. Həmişə bu mövzuda yazırsınız. Bir daha gözlərimiz aydın olsun. Qarabağ Azərbaycandır!”Moderator

Tarix: 25 Noyabr 2020, 16:28

Xəbər lenti