“Ermənilər peşman olacaqlar” – Deputat

2020-ci il Azərbaycan üçün böyük uğurlarla yadda qaldı. Xalqımız sentyabr 27-dən noyabr ayının 10-dək ərazi bütövlüyünün bərpası uğrunda Vətən müharibəsi apardı. 44 günlük müharibədə Müzəffər Ali Baş Komandanın rəhbərliyi Ordumuz düşmənə sarsıdıcı zərbə vurdu. İşğalçı Ermənistan ağır məğlubiyyətə uğradı. Ermənistan noyabrın 10-da onun üçün kapitulyasiya aktı sayılan üçtərəfli bəyanata imza attdı. Bu sənədə əsasən 2020-ci ilin dekabrın 1-dək Ağdam, Kəlbəcər və Laçın rayonlarını döyüşsüz təhvil verildi. Bununla da, 30 il ərzində həllini tapmayan Dağlıq Qarabağ münaqişəsinə son qoyuldu. Ölkəmizin ərazi bütövlüyü tam təmin olundu.

Bu fikirləri Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.

Millət vəkili Vətən müharibəsində qazanılan şanlı qələbənin ölkəmiz və xalqımız üçün əhəmiyyətindən bəhs edib:

“Prezident İlham Əliyevin yanvarın 6-da 2020-ci ilin yekunlarına həsr olunmuş videoformatda keçirilən müşavirədə qeyd etdiyi kimi: "Bu Qələbə tarixdə əbədi qalacaq". Hazırda qarşıda duran vəzifə Vətən müharibəsində qazanılan şanlı qələbəni siyasi yolla möhkəmləndirməkdir. Regionda erməni faşizminin baş qaldırmasına imkan verməmək başlıca şərtdir. Keçmiş münaqişənin reallıqları, dağıdılmış ərazilər haqqında beynəlxalq ictimaiyyətə ətraflı məlumatlar çatdırılmalıdır. Ermənistanın revanşist cəhdlərinin və təxribatlarının qarşısının alınması vacib məsələlər sırasındadır”.

Deputatın sözlərinə görə, dövlətimizin prinsipial mövqeyi noyabrın 10-da imzalanmış üçtərəfli bəyanata əsaslanır:

“Bu sənəddə təsbit olunmamış heç bir fəaliyyət həyata keçirilə bilməz. Azərbaycanın buna prinsipial icazəsi olmalıdır. Hümanitar məsələlərin həllinə razılıq verilib. Bundan sui-istifadə yolverilməzdir. Görünən odur ki, sarsıdıcı məğlubiyyətə uğrayan Ermənistanda müəyyən revanşist fikirlər var”.

Sevinc Fətəliyeva Azərbaycanın icazəsi olmadan xarici ölkə vətəndaşlarının ölkə ərazisinə daxil olmasının yolverilməz olduğunu qeyd edib:

“Rəsmi şəxslərin, Fransa parlamentarilərinin, Ermənistan XİN rəhbərinin Dağlıq Qarabağa səfərləri narahatlıq doğurur. Belə təhrikedici hərəkətlər yolverilməzdir. Təxribatçı addımlar gələcəkdə də davam edəcəksə, Azərbaycan sərt cavab vermək məcburiyyətində qalacaq. Cənab Prezident qarşı tərəfə bu barədə sərt xəbərdarlıq edib. Onlar yenə də peşman olacaqlar. Hazırda işğaldan azad olunmuş ərazilərimizdə quruculuq işlərinə başlanıb. Qarabağ regionunun gözəl gələcəyi var. Azərbaycan dövləti bu əraziləri dünyanın ən gözəl məkanlarından birinə çevirəcək”.Teleqraf.com

Tarix: 11 Yanvar 2021, 14:50

Xəbər lenti