“O adamlar dünən Əli Həsənovla şəkil üçün növbəyə durduqları kimi indi də…”

“Yaman basabas salıblar. Bu Əli Həsənovu söymək üçün növbəyə duranları deyirəm. Baxıram, aralarında şəxsən məndən bir vaxtlar Əli Həsənovla şəkil çəkdirmək üçün vasitəçi olmağı xahiş edənlər də var. Sayları da N qədər. Hələ aralarında biri də var, yadımdadır, Əli Həsənov vəzifədən çıxan kimi Facebook-da onunla olan şəkillərini sildi. Heç bir gün də gözləmədi. Halbuki o adam hər gün məndən xahiş edirdi ki, “müəllimlə görüş təşkil elə”. Mən də deyirdim ki, “müəllimlə görüş” mənlik məsələ deyil. Üstəlik, bu adam elə müəllimin sayəsində sayt işlədirdi. İndi də işlədir. Sadəcə “müəllimini” dəyişib. Mən isə... Mən isə necə ki, o vaxtlar mütəvazi yaşayırdım, elə indi də eyni qaydada yaşayıram. Baxmayaraq ki, Əli Həsənova çıxışım da vardı, söz də deyə bilərdim. Lakin o, mənim üçün deyil, bu gün onu söyənlər üçün nələr etmədi daha? Bizi yandıran heç o da deyil. Əsas dərdimiz odur ki, həmin adamlar üçün dövlətin böyük pulları xərclənirdi, saytlar qurulur, onlara verilir və kim bilir nə qədər vəsait ayrılırdı. (Elə indi də fərqli deyil...) Lakin o saytların tamamı Azər Həsrətin bir köşə yazısı qədər səs gətirmirdi. Yaxud da o imtiyazlıların səsi bir dəfə də olsun Azər Həsrət kimi beynəlxalq platformalardan eşidilmədi. Amma aralarında ehtiyacları olmadan belə dövlətdən ev alanları da az deyildi. Məhz Əli Həsənovun lütfü sayəsində”.

 

Pravda.az-ın xəbərinə görə, bunu jurnalist Azər Həsrət deyib

 

A.Həsrət qeyd edib: “İndi baxıram, o adamlar dünən Əli Həsənovla şəkil üçün növbəyə durduqları kimi indi də yeni kadrlara növbəyə durublar. Və ən acınacaqlısı da odur ki, yenilər də onları həvəslə qəbul edir, yuxarı başa keçirir. Daha anlamırlar ki, bu gün Əli Həsənova arxa çevirənlər bir balaca durum dəyişən kimi onlara da ilk zərbəni vuracaqlar. Nə deyim? Görünür, belə adamlar daha “gərəklidirlər”. Xeyirlisi deyib keçirəm. Lakin əlavə də edirəm: biz bütün şərtlərdə dövlətimizə, prezidentimizə sadiq qaldıq, qalmağa da davam edəcəyik! Kim olur olsun, kim gəlir gəlsin, bizi əsəbləşdirib prezidentlə üz-üzə qoya bilməyəcək!”

Tarix: 19 Yanvar 2021, 15:08   
Xəbər lenti
Çox oxunanlar

Ən son xəbərləri səhifəmizdən də izləyin