"Qar dizə çatandan sonra fəaliyyətə keçmək doğru yanaşma deyil" - Ekspert

“Bakı Şəhər İcra Hakimiyyəti əvvəlcədən elan etmişdi ki, qarlı-şaxtalı havalara hazırıq, qərargah yaratmışıq, filan-filan işlər görəcəyik və s. “Azərbaycan Avtomobil Yolları” Dövlət Agentliyi də daxil olmaqla aidiyyatı qurumlar bu cür açıqlamalar versələr də, nəticədə aydın olur ki, dediklərinin heç 50%-ni də yerinə yetirməyiblər”.

Bunu Pravda.az-a açıqlamasında nəqliyyat üzrə ekspert Elməddin Muradlı deyib.

O bildirib ki, ümumiyyətlə, bu qurumların sözləri ilə əməlləri bir birini tamamlamır: “Hər il Cənab Prezidentin göstərişi ilə bu qurumların fəaliyyəti üçün xeyli miqdarda maliyyə vəsaiti ayrılır, texniki avadanlıqlar alınır. Həmin texnikalardan isə, şahidi oluruq ki, sırf seçilmiş küçə və yolları təmizləmək üçün istifadə olunur. O yollar ki, oradan ölkə rəhbərliyi keçəcək. Yerdə qalan küçə və yollara isə diqqət ayırmırlar, sanki orada ümumən yaşayış yoxdur. Yol infrastrukturumuz nə qədər müasirləşdirilsə də, qarlı-şaxtalı, yağıntılı havalarda yolların hərəkəti məhdudlaşır və nəticədə, sürücülər əziyyət çəkirlər. Təssüflər olsun ki, bir sıra yollarda yağış barmaqlıqları olmadığına, yolun səthi düzgün hamarlanmadığına və istiqamətləndirilmədiyinə görə, yağış ya qar suyu yolun kənarına yığılmaq əvəzinə, yolun ortasında gölməçə şəklində qalır. Bunun digər bir səbəbi də odur ki, çökmüş yollar çoxdur və çöküntü yarandıqda təbii ki, su da axıb həmin çöküntüyə tökülür. Tutaq ki, asfaltlama zamanı yol kənarlarını maili etdikləri üçün yollarda su ortada yox, kənarlarda toplandı. Kənarlarda da əgər yağış barmaqlıqları və ya yağış sularını yönləndirmək üçün müəyyən kanallar yoxdursa, həmin su tez bir zamanda asfaltı yararsız vəziyyətə salacaq”.

Ekspert problemlərdən çıxış yolları barədə fikirlərini də bölüşüb. O qeyd edib ki, bu işlər problemin birdəfəlik həlli üçün yerli bələdiyyələrə həvalə olunmalıdır: “Maddi-texniki bazanı formalaşdırmaq üçün bələdiyyələrə imkan yaradılmalıdır və hər kəs də öz yaşadığı rayonun bələdiyyəsinə inam göstərməlidir. Beləliklə, hər rayon öz ərazisinin yol infrastrukturuna nəzarət etsə, diqqətdən kənarda qalan yollar olmaz. Amma məhz BŞİH və “Azərbaycan Avtomobil Yolları»nın nəzarətində qalanda, onlar konkret bir marşrutu təmizləyirlər, qalan yollar isə qalır Allahın ümidinə. Yanaşma bu cür olmamalıdır, ciddi işlər görülməlidir. Xəbərdarlıq olunanda əvvəlcədən yol kənarlarına qum topaları və ya duz yığılmalıdır: texnika olmasa bele canlı qüvvələr yaxınlaşıb “lapatka” ilə onu yola yaya bilsinlər ki, maşınlar rahat hərəkəti üçün şərait yaransın. Bu tədbir əvvəlcədən görülməlidir. Qar dizə çatandan sonra fəaliyyətə keçmək doğru yanaşma deyil, qabaqlayıcı tədbirlər vacib idi”.

Nəzrin Cavid

Tarix: 24 Fevral 2021, 11:09

Xəbər lenti