"Qəhrəmanlarımızın böyüdüyü gecəqonduların fotolarını çəkib dövlətin şəhidə və qaziyə münasibəti kimi sərgilənməsi halları artıb"

"Təəssüflər olsun ki, son dövrlər sosial mediada elə əvvəlcədən aztəminatlı ailələrdən olan müharibə qəhrəmanlarımızın doğulduğu, böyüdüyü gecəqonduların fotolarını, videolarını çəkib dövlətin şəhidə və qaziyə münasibəti kimi sərgilənməsi halları artmaqdadır. Mən bəzi vətəndaşlarımızın bu paylaşımları ürək yanğısı ilə etdiyinə inanıram, lakin özünü böyük siyasətdə sayanlar, hakimiyyətə gəlməkdə iddialı olanların bu cür ucuz metodlara əl atması, şəhid və qazilərimizi kənardan idarə olunan ucuz antimilli siyasətə alət edilməsinə imkan vermək olmaz".

Pravda.az xəbər verir ki, bunu Milli Məcclisin deputatı Bəhruz Məhərrəmov parlamentin bu gün keçirilən plenar iclasında çıxışı zamanı deyib.

Deputat bildirib ki, zamanında işğala zəmin yaradanların torpaq azad edənlərə, həm də Ağdam, Kəlbəcər və Laçın kimi alınmaz qalaları şəhid vermədən, bir güllə atmadan azad edənlərə şəhid və qazi taleyi ilə bağlı dərs keçməyə mənəvi haqları yoxdur: "Əlbəttə, ölkədə hər kəs bərabər yaşamır. O cümlədən də şəhid ailələri və qazilərimizin də bəziləri müharibəyə qədər aztəminatlı insanlar olub və onların əvvəldən də mənzil şəraitləri o qədər də yaxşı olmayıb. Təbii ki, bu gün bizim öncəliyimiz həmin insanlar olmalıdır. Heç şübhəsiz ki, şəhid ailələri və qazilər bu ölkədə hər kəsdən daha yaxşı mənzil və ev şəraitinə layiqdir və dövlət başçısının iradəsi də bu yöndədir. Bilirsiniz, ilin əvvəlində müvafiq Sərəncam imzalandı və 2025-ci ilədək bu təbəqədən olan bütün vətəndaşlar yeni mənzil və evlərlə təmin ediləcək. Sadəcə, qəbul edək ki, müharibə 7 aydır bitib, qısa müddətdə bunların hamısını çatdırmaq qeyri mümkündür, amma hər kəs əmin ola bilər ki, həmin soydaşlarımızın mənzil təminatı dövlət üçün prioritet məsələdir. Təssüflər olsun ki, son dövrlər sosial mediada əvvəldən aztəminatlı ailələrdən olan müharibə qəhrəmanlarımızın doğulduğu, böyüdüyü gecəqonduların fotolarını, videolarını çəkib dövlətin şəhidə və qaziyə münasibəti kimi sərgiləməsi halları artmaqdadır. Mən inanıram ki, bəzi vətəndaşlarımız bu paylaşımları ürək yanğısı ilə edir, lakin, özünü böyük siyasətdə sayanlar, hakimiyyətə gəlməkdə iddialı olanların bu cür ucuz metodlara əl atması, şəhid və qazilərimizi kənardan idarə olunan ucuz antimilli siyasətə alət edilməsinə imkan vermək olmaz".

B.Məhərrəmov həmçinin məhkəmə-hüquq sistemindəki inkişaf və problemlərdən də söz açıb.

Deputat qeyd edib ki, pandemiya dönəmində vəkillərə bir sıra güzəştlərin olunması arzuolunandır: "Ötən həftə Suraxanı Rayon Məhkəməsinin yeni inzibati binasının istifadəyə verilməsi məhkəmə-hüquq sistemi adına mühim addım oldu. Əlbəttə, biz bu məsələyə texniki tərəfdən baxmamalıyıq, bu məsələ ölkədə güclü və ədalətli məhkəmə sisteminin formalaşdırılmasında ali siyasi iradənin mövcudluğunun göstəricisidir. Hesab edirəm ki, belə bir yüksək iradənin mövcudluğu şəraitində məhkəmə-hüquq sisteminin ayrılmaz həqləsi olan müstəqil vəkillik institunun inkişafı istiqamətində də addımlarımızı intensivləşdirməliyik. Əlbəttə, son dövrlər ciddi işlər görülüb, xüsusən cənab Prezidentin 22 fevral 2018-ci il Sərəncamından sonra, bu səhədə dəyişiklər göz önündədir. Mən Kollegiya rəhbərliyinin cənab Prezidentin Sərəncamda nəzərdə tutulmuş tövsiyyələrinə uyğun fəaliyyətini yüksək qiymətləndirirəm. Eyni zamanda, hesab edirəm ki, biz bu Sərəncama əsasən yol xəritəsi kimi baxıb daha da ciddi addımlar atmalıyıq. Məsələn, dövlət hesabına hüquqi yardıma ayrılan məbləğ artırılmalıdır. Habelə, bu gün Azərbaycanda vəkilin vergisi də, sosial ödənişi də əksər peşə sahiblərindən daha çoxdur ki, bu məsələyə də diqqət etməliyik. indi hökumətin maliyyə bloku burdadır, mən onlardan bu məsələləri nəzarətə götürməyi xahiş edirəm. Çünki cəmi 2000-dən bir qədər çox vəkil var, onların artıq vergi və sosial ödənişi büdcə üçün bir əhəmiyyət daşımır, əksinə pandemiya sonrası vəkillər üçün müəyyən güzəştlər vacibdir".

Tarix: 31 May 2021, 12:17

Xəbər lenti