Deputat: “Saxta sənədlərlə Avropaya gedərək Azərbaycana qarşı şər-böhtan kampaniyası aparanlar ölkəyə gətirilməlidir"

“Avropada bəzi qüvvələr çalışırlar ki, Azərbaycana hansısa yolla təsir göstərsinlər, ölkəni nüfuzdan salsınlar, ayrı-ayrı ictimai xadimlərin şəxsi həyatlarına müdaxilə etsinlər. İlk növbədə, həmin prosesin iştirakçılarını deportasiya edib Azərbaycana göndərmək lazımdır”.

Bunu Pravda.az-a açıqlamasında Milli Məclisin deputatı Cavid Osmanov deyib.

Deputat Avropadan deportasiya olunan azərbaycalıların məsələsinə münasibət bildirib: "Avropada yaşayan 26 nəfər azərbaycanlı deportasiya olunaraq Azərbaycana göndərilib. Belə situasiya ilə qarşılaşmağımız birinci dəfə deyil, əvvəllər də belə hallar olub. Həmin azərbaycanlıların hər biri ailəli-uşaqlı, çörək pulu üçün Avropaya üz tutmuş insanlardır. Deyilir ki, deportasiya olunanların sənədləşmə işlərində neqativ hallar müşahidə edilib. Yəni, onlar əslində Avropaya saxta yolla gediblər. Ona görə də oturum icazəsi ala bilməyiblər. Maraqlısı odur ki, bəziləri bugün Avropaya saxta sənədlə gedib, Azərbaycana qarşı qarayaxma kampaniyası aparırlar. Burada böhtan, təhqir və digər məsələlər də var. Bu insanların isə heç biri indiyə kimi Avropa ölkələrindən deportasiya olunmurlar. Mətbuatdan oxuduğum məlumata görə, Ramin Hacılı, Qənimət Zahid, Arif Hacılının, Müsavatın Avropa koordinasiya mərkəzinin adları Hollandiya Xarici İşlər Nazirliyinin 99 səhifəlik rəsmi sənədində hallandırılıb. Avropa gənclər hərəkatının rəhbəri Ramin Hacılının turistik agentliyi vasitəsilə 100-dən çox adamın turist adı ilə xaricə getdiyi, əslində isə Hacılının onlara orada miqrant kimi qalmağa kömək göstərdiyi yazılıb. Sənəddə 2015-ci ildən bəri müxalif Müsavat Partiyasının üzvlərinin üzvlük vəsiqələrinin və tövsiyə məktublarının qanunsuz hazırlanması və ya verilməsi barədə məlumatların yayılmasından bəhs edilir. Sığınacaq axtaranların Azərbaycan Xalq Cəbhəsi Partiyasının saxta sənədlərindən istifadə etdikləri yazılıb. Maraqlı dairələr var ki, ölkəni saxta sənədlərlə tərk edənlərin bəzilərini himayə edirlər və lazım olduqda müxtəlif yollarla onları Azərbaycana qarşı istifadə edirlər. Düşünürəm ki, ilk növbədə onların deportasiyası lazımdır, çünki hazırlanmış saxta sənədlərlə o ölkələrə gediblər və orada onlara oturum izni verilib. Orada yaşayaraq Azərbaycana qarşı şər, böhtan kampaniyası həyata keçirirlər. Belə anti-milli qüvvələr orada çox sərbəst şəkildə hərəkət edirlər. Bu istiqamətdə daha ciddi düşünmək lazımdır. Bununla bağlı hüquqi prosedurların başlanılmasına və tədbirlərin görülməsinə ehtiyac var", deyə C.Osmanov bildirib.

Nəzrin Cavid

Tarix: 18 Sentyabr 2021, 13:13

Xəbər lenti