Vətən müharibəsinin 1 ili: Cənab İlham Əliyev qalib xalqın Prezidenti kim erməni yalanlarını ifşa edir - RƏY

"Azərbaycan xalqı Vətən müharibəsindəki qələbənin bir illiyini qeyd edir. 2020-ci ilin sentyabrın 27-də Azərbaycan Ordusu ərazi bütövlüyünü bərpa etmək üçün əks-hücum əməliyyatına başladı. Ermənilər hələ iyulda başlatdığı təxribatları sentyabrın 27-də də davam etdirdilər və növbəti hərbi cinayət törətdilər. Azərbaycan bu təxribatların qarşısını ciddi şəkildə alaraq qələbəsini təmin etdi. İndi cənab İlham Əliyev qalib xalqın Prezidenti kimi mötəbər tədbirlərdə Azərbaycan xalqının qəhrəmanlığından danışır, erməni yalanlarını ifşa edir".

Bunu Pravda.az-a açıqlamasında Milli Məclisin deputatı Ceyhun Məmmədov deyib.

O bildirib ki, Zəfər nəticəsində Azərbaycan xalqı öz tarixinin ən şanlı və şərəfli səhifələrini yazıb: "30 ilə yaxın müddətdə bizim səbirsizliklə gözlədiyimiz gün nəhayət gəlib çatdı. Rəşadətli Azərbaycan ordusu Prezident İlham Əliyevin həyata keçirdiyi uğurlu siyasət nəticəsində torpaqlarımızı işğaldan azad etdi. Son 200 ildə ilk dəfə Azərbaycan torpaq itirmədi, əksinə itirilmiş torpaqlarını geri qaytardı. Bu, Azərbaycan xalqının qüdrətli və qələbəyə layiq xalq olduğunu sübut etdi. Prezident də öz çıxışlarında bu məsələni hər zaman xüsusilə qabardır. Qalib xalqın Prezidenti kimi İlham Əliyev indi mötəbər tədbirlərdə Azərbaycan xalqının qəhrəmanlığından bəhs edir, erməni yalanlarını ifşa edir. Son 1 ildə dövlətimiz qələbəmizin möhkəmləndirilməsi üçün işğaldan azad edilmiş bölgələrin tez bir zamanda bərpası üçün ardıcıl və məqsədyönlü tədbirlər həyata keçirir. Böyük işlərin reallaşdırıldığının şahidi olduruq. Həm Şuşada və Ağdamda, həm də digər ərazilərdə ciddi tədbirlər həyata keçirilir və bu gün bizim qarşımızda böyük missiya və hədəf var. Çalışmalıyıq ki, qələbəmizi, birlik və həmrəyliyimizi daha da möhkəmləndirək. Azərbaycanın qələbəsində bir çox amillər ciddi rol oynayıb. Xalqın birlik və həmrəyliyini bu mənada xüsusi qeyd etmək lazımdır. Həmrəylik qələbəyə gedən yolda bizə böyük dəstək oldu. Təxribatlar davam etdiyi üçün müharibə bitsə də, bizim mübarizəmiz də davam edir. Çünki təxribatların qarşısını almalı və informasiya müharibəsində də hər zaman qələbə çalmalıyıq. İnanırıq ki, bu hədəf və məqsədlərə də tez bir zamanda nail olmağa müvəffəq olacağıq. Azərbaycan bunun üçün lazım olan bütün addımları atır, hər zaman da atacaq. Burada, əlbəttə ki, həm dövlətin, həm də media və QHT-lərin üzərinə, hətta sıravi vətəndaşların üzərinə də böyük məsuliyyət düşür. Biz daha ayıq-sayıq olmalıyıq ki, xüsusilə də xaricdən törədilən təxribatların qarsını ala bilək. Xalq olaraq bütün gücümüzlə çalışsaq, Prezident İlham Əliyevin rəhbərliyi ilə qarşımıza qoyulan bütün hədəflərə tezliklə nail olarıq".

Nəzrin Cavid

Tarix: 25 Sentyabr 2021, 11:49

Xəbər lenti