İcbari Tibbi Sığorta üzrə Dövlət Agentliyindən bildirilib ki, Azərbaycana bu günədək 319 410 doza “Pfizer- Biontech” vaksin dərman vasitəsi gətirilib. Ötən həftə isə daha 99 000 doza vaksin ölkəyə çatdırılıb.

Məlumdur ki, Bakıda olan “Pfizer” vaksinin 6 aylıq müddəti başa çatıb, amma Ümumdünya Səhiyyə Təşkilatı Avropa Dərman Agentliyi və ABŞ Qida və Dərman Administrasiyasının rəylərini nəzərə alaraq, COVİD-19 əleyhinə vaksinasiyada Pfizer/Biontech preparatından istifadə edən ölkələrə vaksinin istifadə müddətinin uzadılması ilə bağlı aidiyyəti qurumlara məktub göndərib. Məktuba əsasən Pfizer/Biontech preparatının istifadə müddəti 6 aydan 9 aya qədər uzadılıb. Bəs görəsən, yeni gətirilənlər də 6 ay əvvəlki istehsaldır, yoxsa...

Azərbaycanda qaydalara əməl olunmur, amma “yeni dalğa”, xəstəliklə bağlı ağırlaşmalar yüksək səviyyədə deyil. Qonşu ölkələrdə, Avropa ölkələrində isə epidemioloji vəziyyət ağır olaraq qalır. Bizdə vəziyyəti nəzarət altında saxlamağı hökumət necə bacardı? Nəzərə alınsa ki, sərt karantin rejimi  tətbiq edilmir, məktəblər, iri ticarət mərkəzləri açıqdır. Eyni zamanda ölkəyə xarici ölkələrdən gəliş-gediş də var. Ötən il belə bir vəziyyət yaransaydı, 4 mindən çox yoluxma sayı müşahidə edilərdi. Vaksin vurdurduq o səbəbdən, biz “koronaya dözümlü xalq” çıxdıq, yoxsa bunun başqa səbəb var? Bu və digər suallarla bağlı ekspertlərin fikirlərini öyrəndik. Səhiyyə Nazirliyinin İctimai Səhiyyə və İslahatlar Mərkəzinin mütəxəssisi Könül İsmayılova “Yeni Müsavat”a mövzunu belə şərh edib: “Vaksinlərin saxlanma şəraiti və yararlılıq müddəti ilə bağlı araşdırmalar Avropa Dərman Agentliyi EMA və Amerika Qida və Dərman Administrasiyası tərəfindən aparılır. Bununla bağlı tövsiyələr peyvəndin istifadəsi və saxlanmasına dair may ayında artıq verilmişdi. ÜST bu qurumların bəyanatlarını rəhbər tutaraq məktubda vaksinin istifadə müddətinin uzadılması ilə bağlı məlumat bildirib. Hazırda ölkəmizdə istifadə olunan peyvəndin yararlılıq müddəti 31 dekabr 2021-ci ilədək hesab olunur”.

K.İsmayılova əlavə edib ki, hazırda koronavirusla bağlı epidemioloji vəziyyət ölkəmiz üçün stabil hesab oluna bilər: “Lakin yanaşı olaraq mövsümi infeksiya halları da izlənir. Qəfil və kəskin iqlim dəyişikliyi də buna öz növbəsində təkan verən amillər sırasındadır. Mutasiya etmək viruslara xas xüsusiyyətdir, bu, əhalidə narahatlıq doğurmalı deyil, sadəcə olaraq, qorunma tədbirlərinə əməl etmək yetərlidir. Hazırda dünyada ən çox ölüm sayı Rusiyada izlənilir, bu isə onlarda vaksinasiya olunmuş əhalinin sayının azlığı ilə əlaqələndirilir. Azərbaycanda hazırda buster doza alan şəxslər kifayət saydadır”.

Bu arada, Britaniya alimləri Botsvanada COVİD-19-un bütün digər variantlarından potensial olaraq daha təhlükəli ola biləcək yeni bir koronavirus ştammının ortaya çıxması barədə xəbərdarlıq ediblər. Məlumata görə, B.1.1.529 elmi adı olan ştamın tərkibində 32 mutasiya var ki, onların da bir çoxu onun yüksək ötürücülük qabiliyyətini və vaksinlərə qarşı müqavimətini göstərir. Nəşrin məlumatına görə, indiyədək Botsvana, Cənubi Afrika və Honq Konqda bu ştammın on halı müəyyən edilib.

Ümumiyyətlə, bəzi ekspertlər hesab edirlər ki, bu yeni virus infeksiyaları, mutasiyalar süni olaraq ona görə yaradılır ki, dünya əhalisinin sayı azalsın. Bu doğrudurmu? Azərbaycan Həkimləri İctimai Birliyinin təsisçilərindən biri, həkim-radioloq Aydın Əliyev də mövzu ilə bağlı fikirlərini bildirib: “Yoluxma sayı çox olan ölkələrlə müqayisə etsək, məsələn, Rusiyada peyvəndləmə bizdəki kimi deyil, orada azdır. Rusiyada antipeyvənd kampaniyası çox aparıldı. Ona görə də virus səbəbindən xəstələnənlərin və ölənlərin sayı çoxdur. Almaniyada əhalinin sayı bizim ölkə ilə müqayisədə çoxdur. Amma Almaniyada peyvəndləmə yaxşı aparılır. Ona görə düşünmürəm ki, Almaniyada təhlükəli vəziyyət yaransın. Bizim ölkədə də vaksinasiya kifayət qədər aparılıb. Həm də yoluxub sağalanlar çoxdur. Qeydiyyata düşməyin yoluxub sağalanlar da var. Onlarda da davamlı immunitet əmələ gəlib. Yoluxanların da əksəriyyəti təkrar yoluxanlar və peyvənd olunanlar xəstəliyi yüngül keçirirlər. Ona görə mən düşünmürəm ki, bizdə təhlükəli vəziyyət yaranıb. Fikrimcə, yaza qədər pandemiya bizdə tamamilə yekunlaşacaq”.

Həkim “viruslar insanların sayının azaldılması məqsədilə yaradılıbmı” sualına da cavan verib: “Qətiyyən razı deyiləm, bunlar hamısı cəfəngiyyatdır. Bizim marketdən alıb yediklərimiz, aldıqlarımız, telefonlarımız kifayət edir, bizi öldürmək istəsələr heç əlavə virusa ehtiyac olmaz. İnsanların sayını azaltmaq üçün vasitələr çoxdur... Ona görə də belə cəfəng söhbətlərə inanmaq lazım deyil”.

Paytaxtdakı 155 və 193 nömrəli tam orta məktəblərdə əyani dərslər bərpa edilib. Bakı Şəhəri üzrə Təhsil idarəsindən  verilən məlumata görə, hər iki məktəbin kontingenti üçün Gigiyena və Epidemiologiya Mərkəzinin rəyi əsasında müəyyənləşdirilmiş karantin müddəti başa çatıb. Təhsil müəssisələrində koronavirus infeksiyasına qarşı şagirdlərin və məktəbin pedaqoji heyətinin daha etibarlı qorunması üçün sanitar-epidemioloji vəziyyətdən irəli gələn tələblərə ciddi əməl olunur. Tədrisin fasiləsiz təşkili diqqət mərkəzində saxlanılır, mütəmadi olaraq monitorinqlər aparılır.