Deputat: “Bunun səbəbi Rusiyanın media qurumlarına kifayət qədər erməninin nüfuz etməsidir”

“Rusiyanın dövlət televiziyasında yayımlanan “60 dəqiqə” proqramında Rusiya Dövlət Dumasının İqtisadi siyasət komitəsinin sədr müavini Mixail Delyaqin Azərbaycan əleyhinə məsuliyyətsiz fikirlər səsləndirib. Halbuki, həmin proqramın mövzusu Rusiya-Ukrayna müharibəsinə həsr olunmuşdu. Deputat isə diqqəti qəfildən Azərbaycan-Ermənistan məsələsinə çəkir və ölkəmizi təhdid edir. Onun sözlərinə görə, guya Azərbaycan və Ermənistan arasında razılaşdırılmış atəşkəs rejimi Azərbaycan tərəfindən davamlı olaraq pozulur. Həmçinin, o qeyd edib ki, bu məsələdə Azərbaycan və Türkiyə ortaq hərəkət edir”.

Bunu Pravda.az-a açıqlamasında Milli Məclisin deputatı Vüqar İskəndərov deyib.

Deputat vurğulayıb ki, Mixail Delyaqinin fikirləri absurddur: “Təəssüf ki, bu ağlasığmaz fantaziya məhsulu olan fikirlər Rusiya Dövlət Dumasının deputatına məxsusdur. Yəqin Delyaqin unudub ki, Azərbaycan və Rusiya münasibətləri müttəfiqlik səviyyəsinə yüksəlib. Bu münasibətlər hər iki dövlət liderinin imzası ilə müəyyən edilib. Delyaqin baş verən hadisələrdən ya məlumatsızdır və erməni lobbisinin təsiri altındadır, ya da həqiqəti bildiyi halda, təxribatla məşğuldur. Ümumiyyətlə, Azərbaycan-Rusiya münasibətləri strateji dostluq səviyyəsindədir, demək olar ki, bütün sferalarda münasibətlər normaldır. Müttəfiqlik haqqında bəyannamə isə iki dövlətin münasibətlərinin zirvəsi hesab edilə bilər. Təəssüf ki, belə beyanatlar Rusiyanın dövlət televiziyasında səsləndirilir. Bu, yolverilməzdir. Fikrimcə, dövlət orqanları məsələyə müdaxilə etməli və təxribatçı bəyanatların qarşısını almalıdır”.

V.İskəndərovun sözlərinə görə, müttəfiqlik haqqında bəyannamənin imzalanmasına baxmayaraq, Rusiyanın bir sıra media orqanlarında Azərbaycan haqqında yalan məlumatlar paylaşılması təəssüf doğurur, çünki Azərbaycan müttəfiqlərinə ziyanlı ola biləcək siyasətə heç bir halda yol vermir: “Azərbaycan Prezidenti İlham Əliyevin sözü ilə imzası eynidir. Prezident İlham Əliyevin necə ləyaqətli siyasətçi olduğunun bütün dünya şahididir. Rusiyada belə halların intensivləşməsinin bir səbəbi də onların media qurumlarına kifayət qədər erməninin nüfuz etməsi ilə bağlıdır. Beləliklə, ermənilərin təsiri altında olan siyasətçi və ekspertlər belə fikirlər səsləndirərək iki dövlət arasındakı münasibətlərə xələl gətirmək istəyirlər. Bundan başqa, Rusiyada Azərbaycan saytlarının bloklanması da xoşagələn hal deyil. Azərbaycanda media azaddır, televiziyalar və saytlar müxtəlif ekspertlərlə müzakirələr aparır və onların şərhlərini dərc edirlər. Yəni, müxtəlif ekspertlərin Rusiya-Ukrayna müharibəsi ilə bağlı rəyləri dövlətin mövqeyi deyil. Azad media, onsuz da, birbaşa Ukrayna tərəfindən çıxış etmir, sadəcə olaraq, baş verən hadisələri düzgün şəkildə qiymətləndirməyə çalışır. Burada hansısa ölkəyə qarşı qərəz müzakirə mövzusu deyil. Ona görə də Rusiyanın belə addımı təəssüf doğurur. İnanıram ki, Rusiya siyasiləri Azərbaycan əleyhinə lazımsız ittihamlar səsləndirənlərə öz yerini göstərəcəklər”.

Nəzrin Cavid

Tarix: 29 Mart 2022, 13:49

Xəbər lenti