Bəhruz Məhərrəmov: “Kütləvi məzarlıqlara görə erməni caniləri layiqli cəzalarını alacaqlar”

“Fevralın əvvəllərində Fransa Prezidentinin təşəbbüsü ilə Makronun özünün, Avropa İttifaqı Şurasının Prezidenti Şarl Mişelin və Nikol Paşinyanın iştirakı ilə videoformatda keçirilən görüşdə Prezident İlham Əliyev Birinci Qarabağ müharibəsi zamanı 4 minə yaxın Azərbaycan vətəndaşının itkin düşməsi məsələsini xüsusi qabartdı və kütləvi məzarlıqların yerinin müəyyənləşdirilməsini şərt kimi irəli sürdü. Sonrakı dövr ərzində İrəvan nəinki kütləvi məzarlıqların koordinatlarını Azərbaycana vermədi, əksinə ən yüksək səviyyədə bu kimi məlumatları təkzib etməyə çalışdı. Lakin Prezident İlham Əliyevin real faktlara, beynəlxalq hüquqa və ədalətə əsaslanan hücum siyasəti doktrinasına uyğun olaraq rəsmi Bakı bu istiqamətdə həmlələrini davam etdirir”.

Bunu Pravda.az-a açıqlamasında Milli Məclisin deputatı Bəhruz Məhərrəmov deyib.

Deputat qeyd edib ki, bu məsələ həm Prezident İlham Əliyev və hörmətli Mehriban xanım Əliyeva, həm də digər dövlət rəsmiləri səviyyəsində gündəmdə saxlanılır: “Ötən gün MDB PA iclasında spiker Sahibə Qafarova da məsələni gündəmə gətirərək rəsmi Bakının mövqeyini bir daha ifadə etdi. Bu gün Ermənilər hələ də cinayət faktlarını gizlətməklə, yeni cinayətlər törətməkdə davam etsələr də, işğaldan azad olunmuş ərazilərin qarışında təhlükəsizlik tədbirlərinin görüldüyü və bərpa prosesinin aparıldığı üçün, mütəmadi olaraq, kütləvi məzarlıqlar aşkar edirik. Bilirsiniz ki, fevralın sonunda Xocavəndin Edilli kəndində kütləvi məzarlıq aşkarlandı. Eyni zamanda, araşdırmalar zaman məlum olub ki, işğaldan azad edilən Ağdam, Füzuli, Xocavənd və Şuşa şəhərinin ətraflarında da belə məzarlıqlar mövcuddur. Yəni, İrəvanın qaçmağa yeri yoxdur və hər bir cinayətə görə icraçılarla yanaşı, cinayətin təhrikçi, təşkilatçı və köməkçiləri də məsuliyyətə cəlb olunmalıdır. Nəzərə alsaq ki, bu əməllər Ermənistanda dövlət siyasətinin tərkib hissəsi kimi törədilib, dövlət tərəfindən dəstəklənib, deməli, Ermənistan dövləti və o dövrkü hakimiyyət, eləcə də, bu əməllərə hələ də haqq qazandıraraq hüquqi qiymət verməkdən yayınan sonrakı bütün erməni iqtidarları da bu vəhşiliklərə görə məsuliyyət daşıyırlar”.

B.Məhərrəmov, həmçinin, vurğulayıb ki, Fərrux kəndində tapılan insan qalıqları da Ermənistanın dövlət səviyyəsində törətdiyi cinayətlərin tərkib hissəsidir: “Ortada çox ciddi insanlıq əleyhinə və müharibə cinayətləri var, soyqırımı cinayətinin qarşısının alınması və cəzalandırılması haqqında Konvensiyanın müddəalarının köklü və mübahisəsiz pozuntuları var. Lakin təəssüf doğuran haldır ki, 71-i uşaq, 267-si qadın və 326-sı ahıl olmaqla, ümumilikdə 3890 insanın taleyi dünya ictimaiyyətini maraqlandırmır. İki gün əvvələ qədər beynəlxalq hüquqa zidd olaraq bizimlə Fərrux davası aparan, qanunsuz silahlı dəstələri açıq müdafiə edən dövlətlər azərbaycanlı olduğuna görə qətl edilən, yaxud taleyi naməlum qalan 4 min insanın məruz qaldığı cinayətə göz yumur. Təbii ki, bu hal müasir beynəlxalq hüquq adına rüsvayçılıqdır. Amma bu riyakar davranışla qarşılaşmaq bizim üçün yenilik deyil, 30 il ərzində biz bu iki üzlülüyün şahidi olmuşuq və son nəticədə dünyanın etməli olduğunu özümüz edərək BMT-nin qətnamələrini yerinə yetirdiyimiz kimi qətliamlara və kütləvi məzarlıqlara görə də Ermənistanın və erməni canilərin hüquq müstəvisində layiqli cəzasını alması da tərəfimizdən təmin olunacaq”.

Nəzrin Cavid

Tarix: 30 Mart 2022, 15:52

Xəbər lenti