Zahid Oruc: “Prezident İlham Əliyev hərb meydanında olduğu kimi, diplomatik məkanda da Ermənistanı məğlub edir”

“Avropa birliyi Vətən müharibəsindən sonra Cənubi Qafqazdakı proseslərdə aktiv rol almağa çalışır və Azərbaycan Prezidenti İlham Əliyev tərəfindən bu təşəbbüslərə yüksək qiymət verilir. Avropa İttifaqının Prezidenti Şarl Mişel ilə Prezident İlham Əliyev arasında formalaşmış yüksək səviyyəli şəxsi münasibətin önəmi böyükdür. Nəzərə almaq lazımdır ki, Qərb məkanında siyasi münasibətlərdə müxtəlif sanksiyalar və ciddi qarşıdurmalar fonunda belə əməkdaşlığa nail olmaq asan deyil. Təsadüfi deyil ki, Şarl Mişel və onun administrasiyası Azərbaycan dövlətinin regiondakı rolunu yüksək qiymətləndirir. Ona görə də Şarl Mişel ötən dəfə də Prezident İlham Əliyev və Ermənistanın Baş naziri Nikol Paşinyanla görüşdə iştirak edib və söhbətin sonunda pauza verərək tərəfləri baş-başa buraxmağa çalışmışdı. Yəni, Avropa İttifaqı sonrakı mərhələlərdə Azərbaycan və Ermənistanın müəyyən prosesləri vasitəçilər olmadan təkbaşına həll etmələrinə müsbət yanaşır”.

Bunu Pravda.az-a açıqlamasında Milli Məclisin İnsan hüquqları komitəsinin sədri, Sosial Tədqiqatlar Mərkəzinin İdarə Heyətinin sədri Zahid Oruc deyib.

Deputat qeyd edib ki, aprelin 6-na təyin edilmiş üçtərəfli görüşdə Qarabağda yaşanan son gərginliklər müzakirə edilə bilər: “Digər tərəfdən, görüşdən sonra Rusiya-Ukrayna savaşı fonunda Avropa İttifaqının Cənubi Qafqazdakı rolunun daha da artacağı ehtimal edilir. Qərb institutları regionda 44 günlük Vətən müharibəsindən sonra dəyişmiş geopolitik situasiyanı öz xeyirlərinə çevirmək niyyətindədirlər. Məlumdur ki, Ermənistana 2.6 milyard avro yardım göndərildikdən sonra, paralel olaraq, Azərbaycana verilən yardımın da 2 milyard avroya çatdırılmasında məqsəd bölgənin qazanılmasıdır. Odur ki, görüş çərçivəsində hər üç tərəf maraqlarını dilə gətirəcək. Bu görüş ölkə rəhbərliyi tərəfindən müsbət qiymətləndirilib. Prezident bildirib ki, bu danışıqlara ümidlə yanaşır və hesab edir ki, görüşün nəticəsi olaraq, müəyyən məsələlərdə razılaşma əldə oluna bilər. Yekun olaraq, Ermənistan tərəfinin Qarabağda hansısa lokal toqquşmalar yaratmasının məqsədi Azərbaycanın müəyyən prinsipial tezislərini əlindən almaqdır. Ermənilər Azərbaycanın “Qarabağ Azərbaycanın sadəcə ərazi inzibati vahididir, Qarabağ münaqişəsi bitib” kimi tezislərini zədələmək istəyirlər. Ermənistan, həmçinin, Azərbaycanla sülh müqaviləsi imzalanacağı və diplomatik tanıma baş verəcəyi halda, Qarabağla bağlı hansısa müddəaları qazanmaq istəyir. Onların əleyhimizə yönəltdiyi propaqanda maşını, lobbiçilik institutları, müxtəlif parlamentarilər və siyasətçilərinin başlıca niyyəti budur. Lakin istənilən halda, Prezident İlham Əliyev hərb meydanında olduğu kimi, diplomatik məkanda da Ermənistanı məğlub edir”.

Nəzrin Cavid

Tarix: 1 Aprel 2022, 13:38

Xəbər lenti