“Azərbaycan Ordusu Aprel döyüşlərində tarix yazdı və Vətən müharibəsində qələbə üçün əsl zəmin yaratdı” - RƏY

2016-cı il aprelin əvvəllərində Azərbaycanın ön xətt mövqeləri və yaşayış məntəqələri Ermənistan silahlı qüvvələrinin intensiv artilleriya atəşinə məruz qalıb və ordumuzun bölmələri əks-həmlə ilə təxribatların qarşısını alıb. Dörd gün davam edən həmin hadisə Azərbaycan tarixinə Aprel döyüşləri kimi düşüb. Azərbaycan Silahlı Qüvvələrinin qələbəsi ilə nəticələnmiş döyüşlərdə Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi, Tərtər rayonunun Qazaxlar kəndi və Suqovuşan kəndi istiqamətində yollar düşməndən azad olunub. Əlbəttə ki, Aprel döyüşləri 2020-ci ilin sentyabrın 27-də başlayan Vətən müharibəsində Azərbaycan Ordusunun zəfərinə zəmin yaradan və xalqa inam verən böyük tarixi hadisədir.

Bu gün Aprel döyüşləri zəfərindən 6 il ötür...

Mövzu ilə bağlı Pravda.az-a danışan Xüsusi Təyinatlı Qüvvələrin ehtiyatda olan baş leytenantı, Aprel döyüşləri iştirakçısı, Böyük Qayıdış Gənclər Təşkilatının İdarə Heyətinin üzvü Əhliyət Mehdiyev deyib ki, Aprel döyüşləri Azərbaycanın böyük qələbəsinin başlanğıcıdır:

“Lələtəpənin azad edilməsi Böyük Qayıdışın başlanğıcıdır” - Aprel qazisi

“Aprel döyüşləri zamanı xalqımız 22 ildən sonra ilk qələbə sevincini yaşadı və xalqın orduya olan inamı daha da yüksəldi. Aprel döyüşlərində Azərbaycan Ordusu qürurla döyüşür, bölmələrimiz düşmənə ağır zərbələr endirirdi. Mən Tərtər-Goranboy, Talış kəndi istiqamətində döyüşdürdüm, həmin vaxt çox qısa müddətdə düşmənin 21 postunu darmadağın etmişdik. Biz dörd günlük döyüşlərdə şahidi olduq ki, Azərbaycan Ordusunun bütün şəxsi heyəti döyüşlərə böyük ruhla qatılır. Aprel döyüşlərində düşmənin səngərlərinə daxil olduq və aydın oldu ki, düşmən illərdir, möhkəmləndikləri səngərlərdən qaçırmışlar. Onlar, hətta silah-sursatlarını, yaralı və həlak olmuş yoldaşlarını da orada qoyub səngərləri tərk edirdilər. Azərbaycan tərəfdə isə tamamilə əksi idi. Həmişə olduğu kimi həmin vaxtda xalqın ürəyi Qarabağla döyünürdü, hər kəs cismən olmasa da, ruhən öz əsgərinin yanında, cəbhədə döyüşürdü. Təsadüfi deyil ki, Aprel döyüşlərində 10 minlərlə Azərbaycan gənci cəbhəyə yollamaq üçün səfərbərlik xidmətinə müraciət etmişdi. Yəni, Aprel döyüşləri ölkədə dövlət, ordu və xalq vəhdətinin necə möhkəm olduğunun sübutu idi. Təbii ki, biz Aprel zəfərinin qəhrəman qardaşlarımıza, eyni zamanda, bizə “irəli” yox, “ardımca” deməyi bacaran komandirlərə, o cümlədən Raquf Orucov, Murad Mirzəyev, Rasim Məmmədov, Elnur Əliyev, Vüqar Yusubov, Samid İmanov və başqalarına borcluyuq. Sözsüz ki, Azərbaycan Ordusu Aprel döyüşlərində tarix yazdı və Vətən müharibəsində qələbə üçün əsl zəmin yaratdı".

Nəzrin Cavid

Tarix: 4 Aprel 2022, 12:53

Xəbər lenti