Deputat: “Aprel döyüşləri hər zaman şanlı qələbəmiz kimi qeyd ediləcək”

“Aprel döyüşləri dedikdə gözümüzün önündə böyük qələbə canlanır. Aydındır ki, istənilən əhəmiyyətli hadisənin müjdəsi və müjdəçisi olur. Sözsüz ki, Azərbaycanın 44 günlük Vətən müharibəsindəki qələbəsinin müjdəçisi də məhz Aprel zəfəri olub. Məlum olduğu kimi, Azərbaycan Ordusu ölkəmizin müstəqillik illərində, daha dəqiq desək, Ulu Öndər Heydər Əliyevin 1993-cü ilin iyununda xalqın təkidli tələbi ilə siyasi hakimiyyətə qayıdışından sonra həyata keçirilən siyasət nəticəsində uğurla inkişaf edib. Xalqımızın ümummilli lideri Heydər Əliyevin əsasını qoyduğu və Silahlı Qüvvələrin Ali Baş Komandanı, Prezident İlham Əliyevin uğurla davam etdirdiyi ordu quruculuğu siyasəti nəticəsində Azərbaycan Ordusu bu gün dünyada 50 ən güclü ordu sırasındadır”.

Bunu Pravda.az-a açıqlamasında Milli Məclisin deputatı Vüqar İskəndərov deyib.

Deputat qeyd edib ki, xüsusi diqqət və qayğının nəticəsini əvvəlcə 2016-ci ilin Aprel döyüşlərində, daha sonra isə 2020-ci ildə 44 günlük Vətən müharibəsində müşahidə edildi: "Ordu quruculuğunda, hərbi hissələrin tikintisində tətbiq olunan Azərbaycan standartları ən yüksək qiymətə layiqdir. Dövlət başçısının göstərişi ilə bütün hərbi hissələrimiz, şəhərciklərimiz, hərbi bazalarımız, faktiki olaraq, yenidən qurulub. Həmçinin, ordu üçün ən müasir silah-sursat, döyüş texnikaları alınır. Bundan başqa, hərbçilərin sosial şəraitinin yaxşılaşdırılması daim dövlətin və şəxsən Prezdent İlham Əliyevin diqqət mərkəzindədir.

2016-cı il aprelin 2-də Ermənistan silahlı qüvvələrinin təxribatlarına cavab olaraq, Azərbaycan Ordusu sürətli əks-hücum əməliyyatı ilə düşməni ağır məğlubiyyətə uğradaraq, Füzuli, Cəbrayıl və Ağdərə rayonlarının işğal altındakı ərazilərinin 2 min hektardan çox hissəsini azad edib. Həmçinin, minlərlə hektar ərazi Azərbaycan Ordusunun tam nəzarətinə keçib. Həmin döyüşlər zamanı Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən olduqca strateji əhəmiyyətli Lələtəpə yüksəkliyi azad edilib”.

Aprel döyüşlərindəki qələbəmizi Vətən müharibəsindəki Zəfərin başlanğıcı kimi dəyərləndirən V.İskəndərov deyib ki, bu döyüşlər Azərbaycan xalqının və Ordusunun torpaqlarımızın işğaldan azad edilməsi üçün hər cür fədakarlığa və hərbi qüdrətə hazır olduğunu nümayiş etdirdi: “Bütün dünya bildi ki, Azərbaycan bu işğalla heç zaman barışmayacaq. Lakin təəssüflər olsun ki, nə işğalçı Ermənistan, nə də onun havadarları bundan nəticə çıxarmadı. Sonda isə 2016-ci ilin aprelində əsası qoyulan hərbi uğurlarımız 2020-ci il 44 günlük Vətən müharibəsində tarixi qələbəmizlə yekunlaşdı. Əlbəttə ki, Azərbaycan xalqı durduqca Aprel döyüşləri də hər zaman şanlı qələbəmiz kimi qeyd ediləcək. İllər keçsə də, xalqımızın hər bir nümayəndəsi hər dəfə aprel ayında zəfərimizi xatırlayacaq və həmin döyüşlərdə iştirak edən, şəhid olan qəhrəmanlarımızın xatirəsini hörmətlə anacaq”.

Nəzrin Cavid

Tarix: 4 Aprel 2022, 13:58

Xəbər lenti