Cavid Osmanov: “Aprel döyüşlərindən sonra Ermənistan silahlı qüvvələrində çaxnaşma yarandı”

“2016-cı il aprel ayının ilk günlərində Azərbaycan Ordusunun mövqeləri və yaşayış məntəqələri Ermənistan silahlı qüvvələri tərəfindən intensiv artilleriya atəşinə məruz qalanda ordumuzun bölmələri əks-həmlə ilə təxribatların qarşısını aldı. Tarixə Aprel döyüşləri kimi düşən bu döyüşlər Azərbaycan ordusunun qələbəsi ilə bitdi. Altı il əvvəl baş vermiş dördgünlük bu müharibədə rəşadətli Azərbaycan Ordusu təcavüzkar Ermənistan ordusuna ağır zərbələr endirərək 2 min hektardan artıq ərazini işğaldan azad etdi. Talış kəndi ətrafındakı yüksəkliklər, eləcə də Seysulan məntəqəsinin düşmən qüvvələrindən tam azad edilməsi Goranboy rayonu və Naftalan şəhəri üçün mövcud olan təhlükəni aradan qaldırımışdır. Bundan əlavə, Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən strateji əhəmiyyətli “Lələ təpə” yüksəkliyinə üçrəngli bayrağımız sancılıb. Bu döyüşlər nəticəsində Erməni silahlı qüvvələri böyük itkilərə məruz qalmış, 500-dən çox hərbçisi məhv edilmiş, 30-dək tankı və digər zirehli texnikası, 25-dən artıq artilleriya qurğusu sıradan çıxarılıb. Aprel döyüşləri Azərbaycanın öz torpaqlarını işğalçı qoşunlardan təmizləmək qüdrətində olduğunu sübuta yetirdi və xalqımızın erməni işğalı altında olan torpaqların hərbi yolla azad edə bilmək inamını daha da möhkəmləndirdi”.

Pravda.az-ın xəbərinə görə, bunu Milli Məclisin deputatı Cavid Osmanov bildirib.

C.Osmanov qeyd edib ki, həmin döyüşlərdən sonra Ermənistan silahlı qüvvələrində çaxnaşma yarandı, işğalçı ordunun rəhbərləri işdən qovuldu, daha sonra isə müharibə caniləri – Sarqsyan öz dəstəsi ilə birlikdə hakimiyyəti itirdi: “Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin prinsipial, qətiyyətli siyasəti sayəsində Azərbaycanın ardıcıl şəkildə qazandığı diplomatik uğurlar hər zaman Ermənistanı çətin vəziyyətə salmış və işğalçı ölkə beynəlxalq iqtisadi layihələrdən kənarda qalmışdır. Aprel qələbəsinin ildönümü ilə əlaqədar bir qrup hərbçi ilə görüşdə cənab Prezident, Müzəffər Ali Baş Komandan İlham Əliyev, “Aprel döyüşləri bizim şanlı hərbi qələbəmizdir, dövlətimizin, xalqımızın, ordumuzun gücünü göstərən qələbədir”, deyə qeyd edib. Aprel döyüşləri bir daha göstərdi ki,Azərbaycan xalqı və dövləti işğalla barışmır və öz ərazi bütövlüyünü azad etmək iqtidarındadır. Həqiqətən də belə oldu. Aprel döyüşlərindən cəmi dörd il sonra Müzəffər Ali Baş Komandan İlham Əliyevin rəhbərliyi və xalqın yekdil həmrəyliyi ilə rəşadətli Azərbaycan Ordusu torpaqlarımızı düşmən tapdağından azad etdi, ərazi bötüvlüyümüzü təmin etdi. 44 günlük hərbi əməliyyatlar zamanı qazandığımız möhtəşəm Zəfərin başlanğıcı isə məhz Aprel döyüşləri oldu”.

Kənan Mirzəyev

Tarix: 5 Aprel 2022, 10:12

Xəbər lenti