"Prezident İlham Əliyevin rəhbərliyi ilə beynəlxalq platformada Azərbaycan mövqeyini daha da gücləndirdi" - Deputat

"Azərbaycan Prezidenti İlham Əliyev və Ermənistanın baş naziri Nikol Paşinyan arasında Avropa Şurasının Prezidenti Şarl Mişelin vasitəçiliyi ilə Brüsseldə keçirilən görüş uğurla başa çatdı. Paşinyan aprelin 6-da baş tutan görüş zamanı da zərbə aldı. Paşinyan bilməlidir ki, bütün müqavimət cəhdləri növbəti yeni zərbə ilə nəticələnəcək. Ermənistan bunu nə qədər tez anlasa, bir o qədər yaxşı olar. Əgər Ermənistan bunu danışıqlar yolu ilə dərk etməsə, "dəmir yumruq" yenidən işə düşə bilər".

Bunu Pravda.az-a açıqlamasında Milli Məclisin deputatı Ceyhun Məmmədov deyib.

Deputat qeyd edib ki, görüş nəticəsində Ermənistan bütün cəhdlərinə və təxribatlarına baxmayaraq növbəti zərbəni aldı və ümidləri puça çıxdı: "Görüşə qədər olan dövrdə Azərbaycan konstruktiv mövqe nümayiş etdirərək Ermənistana münasibətlərin normallaşdırılmasına hesablanmış 5 bənddən ibarət sənəd təqdim etmişdi. Ermənistan isə daha çox təxribatlar törədərək Azərbaycanı beynəlxalq qurumlara şikayət yolu seçmişdi. Onu da qeyd edək ki, aprelin 5-də İrəvanda müxalifətin mitinqi Brüssel görüşü ərəfəsində Paşinyan hakimiyyəti tərəfindən təşkil edilmiş növbəti tamaşa idi. Burada belə bir haqlı sual yaranır ki, "Niyə bu mitinqlər bu günə kimi keçirilmirdi?", "Sözügedən mitinq nə üçün Brüssel görüşündən bir gün əvvəl keçirildi?" "Ermənistan hakimiyyəti kimin başını aldatmaq istəyirdi?". Heç şübhəsiz ki, bu mitinqlər ictimai rəyə əsaslanaraq danışıqlar zamanı Paşinayanın özünü mümkün ssenarilərdən sığortalaması məqsədi daşıyırdı. Məlumdur ki, Ermənistanda bütün rəhbərliklər dövründə danışıqlar prosesini durdurmaq və zaman udmaq üçün bu kimi metodlardan geniş istifadə olunub. Bu, bir daha onu göstərir ki, Ermənistanın əsas məqsədi danışıqlar prosesini pozmaq, sülh müqaviləsini imzalamaqdan imtina etməkdir. Bu yanaşma artıq Ermənistanın dövlət siyasətinə çevrilib".

C.Məmmədov vurğulayıb ki, Brüssel görüşü Paşinyan və onun Qərbdəki havadarlarının Qarabağ probleminin həll olunduğunu, geriyə yol qalmadığını və əlavə şərtlər irəli sürmək cəhdlərinin heç bir səmərəsi olmayacağını çox yaxşı bildiklərini sübut etdi: "Gec-tez, sülh müqaviləsi, sərhədlərin delimitasiyası, kommunikasiyaların açılması və digər məsələlərin həlli üzərində işə başlanılacaq. Bu, nə qədər tez olsa, Ermənistan üçün bir o qədər yaxşıdır. Azərbaycan heç zaman öz haqlı mövqeyindən bir addım da geri çəkilməyəcək. Ermənistan 44 günlük müharibədə baş verənlərdən ciddi nəticə çıxarmalıdır. Əlbəttə ki, Ermənistanın Brüssel görüşünə bəslədiyi növbəti ümidi də puça çıxdı. Həm görüşlərdə, həm də Avropa Şurasının Prezidenti Şarl Mişelin mətbuata açıqlamasında Azərbaycanın mövqeyini dəstəkləyən fikirlər səsləndirildi. Beləliklə, Prezident İlham Əliyevin rəhbərliyi ilə beynəlxalq platformada Azərbaycan mövqeyini növbəti dəfə daha da gücləndirdi".

Nəzrin Cavid

Tarix: 7 Aprel 2022, 11:42

Xəbər lenti