“Ağzına su alıb susmur, nəsə deyir…”

“Brüssel görüşündən bir gün sonra nəticələri ilə bağlı telefonda iki qardaş və müttəfiq dövlətin başçıları-cənab İlham Əliyevlə cənab Rəcəb Tayyib Ərdoğan arasında fikir bölüşməsi oldu. Daha sonra isə Rusiya Prezidentiylə telefon danışığı haqda xəbər yayıldı. Cənab İlham Əliyevdən öncə Paşinyan da Putinə zəng etmişdi. Azərbaycan Prezidentinin Mətbuat Xidmətinin bununla bağlı yaydığı xəbərdə bildirilir ki, həmin danışıq zamanı cənab İlham Əliyev Ermənistanla dövlətlərarası münasibətlərin qurulması üçün irəli sürdüyümüz beş prinsipdən ibarət sənədi qarşı tərəfin “qəbul etdiyini xatırladıb”. Niyə məhz xatırladıb? Paşinyan yenə də öz ampluasındadır, yəqin o səbəbdən. Onun Putinlə telefon danışığı haqda Ermənistan tərəfin yaydığı məlumatda qeyd edilir ki, orada Azərbaycan ordusunun Fərruxdan çıxarılması məsələsinə toxunulub. Ona görə də cənab Putinə də xatırlatmaq lazım gəlir ki, Brüssel görüşündə sərhədlərin delimitasiyasına, kommunkasiyaların açıqlmasına, sülh danışıqlarına - bir sözlə, iki ölkə arasında dövlətlərarası əlaqələrin qurulması üçün Azərbaycanın irəli sürdüyü 5 prinsipə razılıq verən Ermənistanın bizim ordunun öz torpağımızda-Qarabağımızda hansısa mövqe dəyişikliyi etməsinə qarışması nala-mıxa vurmaq və həddini aşmaqdır. Eyni məntiqlə Azərbayan da Rusiyanı Ermənistan ordusunun Gümrüdə mövqe dəyişməsinə maneçilik törətməyə çağıra bilər. Görünür, elə bu səbəbdən də Kremlin Paşinyanın Putinə zəngindən bəhs edən açıqlamasında o haqda bir kəlmə də yoxdur”.

Pravda.az-ın xəbərinə görə, bunu deputat Sahib Alıyev bildirib.

“Rusiya dövlət başçısının Azərbaycan Prezidentiylə telefon danşığı haqda xəbərdə olduğu kimi orada da "2020-ci il 10 noyabr, 2021-ci il 11 yanvar və 26 noyabr tarixli üçtərəfli razılaşmalarının yerinə yetirilməsi qabardılır. Fərq sadəcə ondadır ki, Ermənistan baş nazirinin Putinə zəngi haqdakı xəbərdə həmən razılaşmaların “ardıcıl olaraq”, Azərbayan Prezidentiylə telefon danışığıdan bəhs ediləndə isə “tam şəkildə” həllinin önəmliliyi vurğulanır. Kremlin hər iki telefon zəngiylə bağlı açıqlamasında Azərbaycanla Ermənistan arasında sərhədlərin delimitasiyası, kommunikasiyaların açılması və sülh danışıqlarına da toxunulduğu, Moskvanın həmən məsələlərlə bağlı dəstəyini əsirgəməyəcəyi diqqətə çatdırılır ki, Brüssel danışıqlarının da predmeti elə bunlar idi. Beləliklə, Kremlin Rusiya Prezidentinin Azərbaycan və Ermənistan dövlətinin başçılarıyla telefon danışğı haqda yaydığı xəbərdən də göründyü kimi orada Brüssel danışıqarının nəticələri Moskvanın moderatorluğuyla baş tutmuş üçtərəfli razılaşmaların davamı kimi təqdim edilir. Lap yaxşı, edilsin. Əsas odur ki, həmin razılaşmalarda da, Brüssel görüşündə də Azərbaycanın diqtə etdikləri keçib. Ola bilər ki, Ermənistan baş naziri status və Minsk qrupu məsələsini yenə qaldırıb, amma necə ağzından vurulubsa, Brüssellə Moskva keçirilən görüş və edilən zənglərin nəticəsi haqda açıqlamlarında bu haqda susmağı üstün tutublar. Azərbaycanın həmən məsələlərlə bağlı qəti mövqeyini və yeni geosiyasi reallığı görüb onlar da anlayırlar ki, status və Minsk üçlüyünü gündəmə gətirməyin indi heç bir perspektivi yoxdur. Əlbəttə, Paşinyan da bunun yaxşı fərqindədir. Amma ölkəsindəkilərə, ilk növbədə də onların revanşizmə köklənən hissəsinə göstərmək lazımdır axı o, ağzına su alıb susmur, nəsə deyir” – deputat qeyd edib.

Tarix: 10 Aprel 2022, 09:52

Xəbər lenti