“Bu, prosesə vasitəçi qiyafəsində müdaxilə etmək niyyətinə düşənlərə ciddi ismarıcdır” - RƏY

“Ermənistan tərəfindən ötən həftə ümidverici bəyanatların ardınca İrəvanda başlanan aksiyalar fonunda, habelə, Paşinyanın Rusiya səfəri müddətində Avropa İttifaqının xüsusi nümayəndəsinin bölgəyə səfəri, Brüsseldə razılaşdırılmış məsələlərin həyata keçirilməsi və davam etdirilməsinin təmin olunması məqsədi ilə təmaslara başlanılması vacib siyasi hadisədir. Aydındır ki, İrəvan heç zaman vədinə sadiq qalmayıb, lakin bu dəfə artıq məğlub durumda olduğu və Azərbaycanla hesablaşmağa vadar qaldığı üçün yekun sülhə ciddi ümidlər var. Avropa İttifaqının Cənubi Qafqaz üzrə xüsusi nümayəndəsi Toivo Klaarın başçılıq etdiyi nümayəndə heyətini qəbul edən zaman Prezident İlham Əliyevin də ümumi gedişatdan razı görünməsi, hətta cənab İlham Əliyevin Ermənistanın Azərbaycanın irəli sürdüyü 5 prinsipi qəbul etməsinin prosesdə həqiqətən də daha bir dönüş nöqtəsi olduğunu deməsi ümumi situasiyanın müsbət ab-havasından xəbər verir”.

Bunu Pravda.az-a açıqlamasında Milli Məclisin deputatı Bəhruz Məhərrəmov deyib.

Deputat qeyd edib ki, Prezident İlham Əliyevin Avropa İttifaqı Şurası Prezidenti Şarl Mişelin səylərini və danışıqların mövcud formatını yüksək qiymətləndirməsi, Brüssel görüşünü “normallaşma prosesinin başlanğıcı ilə bağlı razılığa gəlmək imkanı verən nöqtə” adlandırması prosesə vasitəçi qiyafəsində müdaxilə etmək niyyətinə düşənlərə ciddi ismarıcdır.

B.Məhərrəmovun sözlərinə görə, Dövlət başçısının Avropa İttifaqının vasitəçiliyi ilə başlanmış prosesi çox konstruktiv, yaxşı nəticələri və nailiyyətləri olan təmaslar kimi qiymələndirməsi əlavə müdaxilələrə ehtiyacın olmağını, mövcud formatın yekun nəticəyə gətirib çıxara biləcəyinə ümidi ifadə edir.

“Təbii ki, Azərbaycanı qane etməyən məqamlar da var. Məsələn, Azərbaycanla və Naxçıvanı birləşdirən kommunikasiyalarla bağlı Ermənistanda işlərin ləngiməsi belə məqamlardandır. Cənab Prezident qeyd etdi ki, Azərbaycan dəmiryolun böyük hissəsini hazır etsə də, İrəvanda işin texniki-iqtisadi əsaslandırılmasına belə başlanılmayıb. Digər məqam isə Azərbaycandan Ermənistan sərhədinə gedəcək avtomagistralla bağlı İrəvanın coğrafi koordinatları hələ də verməməsi ilə bağlıdır. Lakin Prezident İlham Əliyev bu məsələlərə də pozitiv ruhda münasibət bildirdi və problemin həll ediləcəyinə inam ifadə etdi. Əlbəttə, əvvəlki dövrlərdə düyün nöqtəsi təşkil edən məsələlərlə müqayisə etsək, irəliləyiş aydın şəkildə görünür. Ən vacibi isə mövcud müstəvinin təşəbbüskarı olan Avropa İttifaqı bu prosesə və prosesin dəstəklənməsinə sadiqliyini bir daha ifadə edir. Xüsusi nümayəndə Toivo Klaarın da səfəri məhz normallaşma prosesini dəstəkləmək, əhatəli nizamlanma istiqamətində çalışmaq üçün əlavə alətlərin axtarışı ilə bağlıdır”, - deyə deputat vurğulayıb.

Nəzrin Cavid

Tarix: 19 Aprel 2022, 17:57

Xəbər lenti