İnsanlar niyə “iPhone”nun bahalı versiyasını almağa çalışırlar? – "Onlar “xəstəliyə” daha meyilli olurlar"

“İnsanların “iPhone” belə maraq göstərməsi günümüzün acınacaqlı vəziyyətidir. Bunu nəinki ayfon 13 üzərindən, bir çox sahədə, istər geyim, istər əşya, istər qida və s. marka, brend asılılığı olaraq dəyərləndirə bilərik”.

Bunu Pravda.az-a “Park Bulvar”da bloger Hüseyn Həsənovun hədiyyə olaraq “iPhone” markalı mobil telefon payladığına görə yaranan izdihama münasibət bildirən klinik psixoloq, Narınc Psixologiya Mərkəzinin rəhbəri Narınc Rüstəmova bildirib.

Onun sözlərinə görə, brendlərə maraq göstərmək, sevdiyin xüsusi bir markanın, brendin olması, onlardan istifadəyə üstünlük normal bir haldır: “Bu, insanlarda gücləri, maddi imkanları çatmadığı, əslində böyük bir ehtiyacları olmadığı halda, əldə etmək istədikləri zaman düzgün olmayan, patoloji bir hal olaraq dəyərləndirilir. Belə hal daha çox həyatda natamamlıq kompleksi yaşayan, evdə, ailədə, işdə, sosial cəmiyyətdə özünü aktuallaşdıra bilməyən, istədiyi mövqeni tapa bilməyən, özgüvəni zəif insanlar bu “xəstəliyə” daha meyilli olurlar. Çünki brend geyinmək, brend əşyalardan istifadə ilə özlərini insanlar arasında sanki təsdiq etmiş, nüfuz qazanmış, ön plana çıxarmış kimi hiss edirlər.

Bu baxımdan xüsusən yeniyetməlik yaş mərhələsində olan uşaqlar daha çox risk qrupu altındadırlar. Bu, onların hər hansı bir qrupa aid olma, özünü tapma və təsdiq etmə ehtiyacları ilə bağlıdır. Bugün insanların ən böyük səhvlərindən biri ətrafdakı şəxslərin fikirlərinə çox ciddi yanaşmaqdır. Belə ki, insanlar həyat tərzini müəyyən edərkən, öz xasiyyətlərinə, ehtiyaclarına, yaşadığı ailənin olar-olmazlarına deyil, daha çox ətraflarından gələn şərhlərə və seçimlərə görə hərəkət edirlər. Daim kimlərsə tərəfindən bəyənilmək, xoş sözlər eşitmək, qəbul edilmək üçün çalışırlar. Övladlarımızı bu cür vəziyyətdən xilas etmək, qorumaq üçün ilk növbədə onları özünə inamı yüksək olan fərdlər kimi yetişdirilməliyik. Özünə inamı yüksək olan insanlar xarici görünüşə deyil, daxili xüsusiyyətlərə önəm verirlər. Onları formallıqdan uzaq tutmalıyıq. Görünüşlər çox vaxt aldadıcı ola bilər. Geyimin səliqəli və gözəl olması önəmlidir, amma bu görüntünü brend geyinməyərək də əldə edə bilərik. Brend paltar geyinən, əşya istifdə edən insanlar heç də həmişə düzgün istiqamətdə getməyə bilər. Bu onların intellek, ağıl yaşının göstəricisi deyil. Bunu onlara başa salmaq, aşılamaq lazımdır. Hər kəsin sözünə uyğun hərəkət etmək əvəzinə, doğru olanı seçib, həmin vəziyyətə görə hərəkət edən insanlar daha uğurlu və sağlam həyata namizəddirlər”.

Leyla

Tarix: 20 Aprel 2022, 15:04

Xəbər lenti