Bakıda kişi arvadının qabırğalarını sındırdı, ona işgəncə verdi

Bakı Ağır Cinayətlər Məhkəməsində arvadını döyməkdə və işgəncə verməkdə təqsirləndirilən Murad Abasovun cinayət işi üzrə məhkəmə iclası başa çatıb.

Pravda.az-ın əldə etdiyi məlumata görə, hakim Fikrət Qəribovun sədrliyi ilə keçiirlən prosesdə hökm oxunub.

Məhkəmənin hökmü ilə o, 7 il müddətinə azadlıqdan məhrum edilib.

İttihama aktına əsaəsn, hadisə 2021-ci il iyun ayının əvvəllərindən avqust ayının 9-dək olan müddət ərzində paytaxtın Sabunçu rayonu, Maştağa qəsəbəsində qeydə alınıb.

Belə ki, M.Abasovun qeyri-rəsmi nikahda (ər və arvad) yaşadığı Minəxanım Müzəffərova ilə aralarında qısqanclıq zəminində mübahisə yaranıb. Bu zaman o, qadını yumruq və təpiklə bədəninin müxtəlif nahiyələrinə qəsdən vurub. Daha sonra M.Abasov M.Müzəffərovanı mütəmadi olaraq döyüb və onun qabırğalarını sındırıb.

Bundan başqa, o, xüsusi amansızlıqla zərərçəkənə ağır iztirablar verib.

Cinayət materiallarında göstərilib ki, M.Müzəffərova ağrılara dözə bilməyib, dönə-dönə aman diləyib, sevgilisinə onu vurmamağı üçün yalvarıb. Lakin təqsirləndirilən şəxs qadının dediklərinə məhəl qoymayıb, ona işgəncə verib.

Məhkəmədə ifadə verən M.Abasov ona elan olunmuş ittiham üzrə özünü qismən təqsirli bilib.

M.Müzəffərov məhkəmədə dindirilən zaman deyib ki, M.Abasov onu öz ailəsinə də qisqanırmış:

“2021-ci ilin iyun ayının əvvəllərindən Murad yaşadığımız evin həyətyanı sahəsində məni döyüb başıma, bədənimin müxtəlif nahiyələrinə yumruq və təpiklə vurub, xəsarətlər yetirib. Murada məni döyməməsi üçün yalvarsam da, o, buna məhəl qoymadı. Sonuncu dəfə 27 iyul 2021-ci il tarixdə saat 18 radələrində Muradın yaşadığı evə gedərək onunla qalmaq istədiyimi bildirdim. O da etiraz etməyərək evə dəvət etdi. Həmin gün Muradla söhbət zamanı o, baş və bədənimin müxtəlif nahiyələrinə yumruq və təpiklə zərbələr endirərək döydü. Sonra isə həyətyanı sahədə yerləşən yarımtikilidə saxladı. Bundan sonra da Murad məni dəfələrlə döydü. Murad məni döysə də, əl-ayağını bağlamamışdır. Arabir yarımtikilidən çıxıb həyətdə gəzirdim. Orada qaldığım müddətdə Murad məni içki və qida ilə təmin edirdi, həmçinin gündəlik tələbatlarımı təmin etməkdə köməklik göstərirdi.

Düzdü, oradan getmək üçün şərait olurdu. Lakin Muraddan qorxduğum üçün getmirdim, ərim olduğu üçün ona qarşı çıxa bilmirdim. Həm də yaşadığımız qəsəbədə qadının ərindən ayrılması xoş qarşılanmır.

Sonra polis əməkdaşları gələrək qaldığımız yeri aşkar etdi, bölməyə apardılar. Murad məni sonuncu dəfə döyəndə barmaqlarımı, qabırğalarını sındırmışdı, başıma vurmağı nəticəsində qoyulmuş üç tikiş hələ də açılmayıb”.

Kamal Məmmədov

Tarix: 20 Aprel 2022, 21:02

Xəbər lenti