Deputat: "Baydenin nəbz yoxlayan bəyanatı ciddi təsirə malik olmayacaq"

"Co Bayden ABŞ Prezidenti seçilməmişdən əvvəl verilən proqnozlar özünü doğruldur. ABŞ-da hakimiyyətə gələn yeni adminstrasiyanı ən ermənipərəst adminstrasiyalardan biri olduğunu desək, yanılmarıq. Lakin həmin bəyanatı ermənilərlə birbaşa əlaqələndirmirəm. Onu yalnız Türkiyə əleyhinə verilmiş bəyanat kimi qiymətləndirirəm".

Bunu Pravda.az-a açıqlamasında Milli Məclisin deputatı Müşfiq Cəfərov deyib.

Deputat qeyd edib ki, Ağ Ev Türkiyənin nüfuzunun güclənməsindən tarix boyu ehtiyat olub: "1915-ci il hadisələri isə sırf əldə tutulmuş şüardır, çünki bu məsələ Türkiyənin ən həssas olduğu nöqtələrindən biridir. ABŞ-ın əvvəlki prezidentlərinin dövründə Türkiyə ilə münasibətlər prezidentlərin şəxsi münasibəti kimi səciyyələndirilirdi. Yəni, prezidentlərin bir-birinə olan münasibəti siyasətdə də özünü göstərirdi. Lakin yenə də hansısa prizmadan asılı olmayaraq ABŞ-Türkiyə münasibətləri adətən gərginliklərlə dolu olub. Bunun bir neçə səbəbi var, Ağ Evin Suriyadakı kürdləri dəstəkləməsi, Fəttulah Gülənə Amerikada sığınacaq verilməsi kimi məsələlər münasibətləri daim gərgin fazada saxlayır. Ən böyük səbəb isə Türkiyənin F-35 hərbi təyyarə proqramından çıxarılmasıdır. Qardaş ölkə F-35-lərin istehsalçısı olacaq 9 dövlətdən biri kimi namizəd olsa da, bu, Türkiyənin silah istehsalı həcminin artırılmasından ehtiyatlanmaqdan irəli gələn qərar idi. Sözsüz ki, ABŞ demokratlarının Türkiyəyə münasibəti heç də isti deyil. İstənilən halda, münasibətlərin gedişində ciddi böhran olacağını düşünmürəm. Sadəcə deyə bilərik ki, Bayden hakimiyyəti Türkiyə-ABŞ münasibətlərinin istiqamətini ciddi şəkildə dəyişəcək, amma bu, mənfi mənada olmayacaq. Çünki dünya ölkələrinin siyasi xəttinin gedişi Türkiyənin ehtiyac duyulacaq bir güc olacağına zəmanət verir. Qarşıdakı illərdə əksər dünya gücləri qardaş ölkənin nüfuzunun artdığını qəbul edəcək və güclərin müttəfiqliyi yaranacaq".

M.Cəfərovun sözlərinə görə, Türkiyə dünya üçün təhlükəli güc olmadığı üçün Baydenin nəbz yoxlayan bəyanatı da ciddi təsirə malik olmayacaq: "Demokratlar üçün erməni icması Türkiyə qədər vacib deyil. Bayden seçildiyi gündən qeyd etdiyi kimi, Amerika qayıdır və bu qayıdışda Türkiyəyə ciddi zərurət var. Hər iki ölkənin prezidentləri praqmatik siyasətçilər olduğundan münasibətlərin bir müddət enişli-yoxuşlu olacağı ehtimal edilir. Digər tərəfdən də, qeyd edildiyi kimi Ermənistan hazırda Türkiyə və Azərbaycanla münasibətəri normalaşdırıb, düşdüyü blokada şəraitindən çıxmağa çalışır. Ona görə də erməni cəmiyyətinin belə çıxışlara ümid etməsi normaldır, lakin Ermənistan üçün yenə də başqa şans yoxdur. Bu, gec-tez reallaşacaq. Sadəcə olaraq, türkü uzun müddət özünə düşmən bilən cəmiyyətə bunu qəbul etdirmək çətindir. Görünən odur ki, Ermənistan hakimiyyəti də cəmiyyətin bu reallığı dərk etməsini istəyir. Hər-halda keçən zaman məhz Ermənistanın əleyhinə işləyir".

Qeyd: ABŞ Prezidenti Co Bayden səsləndirdiyi bəyanatında növbəti dəfə 1915-ci il hadisələri ilə bağlı tarixi həqiqətləri təhrif edib.

Nəzrin Cavid

Tarix: 25 Aprel 2022, 14:02

Xəbər lenti