Bəşər Əsədə qarşı döyüşən azərbaycanlı: "Cəbhətül Nüsra”ya əsir düşdük”

Sumqayıt Apellyasiya Məhkəməsi Suriyada döyüşməkdə təqsirləndirilən azərbaycanlı - Mirəhəd Mirismayıllının barəsində olan hökmdən verilən apellyasiya şikayətinə baxılıb.

Pravda.az-ın əldə etdiyi məlumata görə, hakim Vidadi Cəfərovun sədrliyi ilə keçirilən prosesdə qərar elan olunub.

Qərara əsasən, onun apellyasiya şikayəti təmin edilməyib.

Belə ki, birinci instansiya məhkəməsinin çıxardığı hökm dəyişdirilmədən saxlanılıb.

Qeyd edək ki, Dövlət Təhlükəsizliyi Xidmətinin (DTX) 2021-ci il iyunun 18-də yaydığı məlumata görə, DTX-nin Ukrayna xüsusi xidmət orqanları ilə birgə keçirdiyi əməliyyat-axtarış tədbirləri nəticəsində, Suriya Ərəb Respublikasının ərazisində həmin dövlətin və Azərbaycanın qanunvericiliyi ilə nəzərdə tutulmayan silahlı birləşmələrin fəaliyyətində iştirak etdiyinə görə barəsində Xidmətdə aparılan cinayət işi üzrə axtarış elan edilən Azərbaycan vətəndaşı, 1979-cu il təvəllüdlü Mirismayıllı Mirəhəd Tofiq oğlu Ukrayna ərazisində müəyyən edilərək saxlanılıb və ölkəmizə gətirilib.

Mirəhəd Mirismayıllı Suriyada Hacıyev Aqil Tağı oğlunun başçılıq etdiyi “Cundu Şam” adlı cinayətkar birliyin fəaliyyətində iştirak etmək üçün 20 iyun 2013-cü il tarixdə adıçəkilən ölkəyə gedərək orada aparılan silahlı münaqişələrdə digər Azərbaycan vətəndaşları ilə birgə iştirak etməkdə şübhəli bilinib.

Həmçinin müəyyən edilib ki, Azərbaycan vətəndaşlarının bir qismi həmin bölgələrdə davam edən silahlı münaqişələr zamanı öldürülüb.

Faktla bağlı DTX-də istintaqı aparılan cinayət işi üzrə Mirəhəd Mirismayıllıya Azərbaycan Cinayət Məcəlləsinin 12.1, 279.1-ci (Azərbaycan Respublikasından kənarda qanunvericiliklə nəzərdə tutulmayan silahlı birləşmələrin fəaliyyətində iştirak etmə) maddəsi ilə ittiham elan olunaraq barəsində məhkəmənin qərarı ilə həbs qətimkan tədbiri seçilib.

O, istintaqa verdiyi ifadə zamanı törətdiyi cinayət əməlini etiraf edərək səmimi peşmanlıq hissi keçirdiyini bildirib.

Bildirib ki, Bəşər Əsədə və onun tərəfdarlarına qarşı silahlı mübarizə aparmaq məqsədi ilə Suriya ərazisində fəaliyyət göstərən azərbaycanlılardan ibarət qanunsuz silahlı birləşmələrin tərkibinə daxil olub. Aqil Hacıyevin rəhbərlik elədiyi “Cundu Şam” camaatı təxminən 55-60 nəfərdən ibarət imiş. Onların hər biri öz adları ilə deyil, dini ləqəbləri ilə tanınırlarmış. Mirəhəd Mirismayıllının dini ləqəbi “Huzeyfə” imiş və ona bu ləqəblə müraciət ediblər.

Mirəhəd Mirismayıllının sözlərinə görə, Aqil Hacıyevin rəhbərliyi etdiyi dəstənin üzvlərindən əslən azərbaycanlı olan “Baba” dini ləqəbli Samir Həşimov, İlqar Musayev, “Abu Rüqəyya” dini ləqəbli Mehman Qarayev, dini ləqəbini xatırlamadığı Rövşən Rəhimov adlı şəxsləri xatırlayır:

“Digər qeyri-azərbaycanlı olan dəstə üzvlərini hazırda xatırlamıram. Dəstə üzvlərinin əksəriyyəti hərbi geyim formasında olurdu və hər biri odlu silahlarla - “Kalaşnikov” tipli avtomat və “Makarov” tipli tapança ilə silahlanmışdırlar. Təxminən 7-8 ay orada qaldım və bu müddət ərzində Aqil Hacıyevin rəhbərliyi ilə cihadın kimə və nəyə görə aparıldığını, cihadın aparılma qaydasını, odlu silahlardan necə və hansı şəraitdə istifadə qaydalarını, dini mövzularda müzakirələr aparılırdı. Suriyada qaldığım müddətdə mənə verilən “Kalaşnikov”u üzərimdə saxlayırdım. Daha sonra təxminən 7-8 aya yaxın Mühəndisi şəhərində qaldıqdıq. Bizi “Cəbhətül Nüsra” silahlı birləşməsi əsir götürdü və 4 gün əsirlikdə qaldım. Təxminən 2014-cü ilin yanvar-fevral aylarında Türkiyəyə qayıtdım. 2017-ci ilə kimi Türkiyənin Yalova və İstanbul şəhərlərində qalaraq orada fəhləliklə məşğul oldum. Həmin il Türkiyədən təyyarə ilə Ukraynanın Xerson şəhərinə getdim. Bir-iki gün həmin şəhərdə qaldıqdan sonra Kiyev şəhərinə yollandım. Kiyevdə meyvə-tərəvəz alveri ilə məşğul olurdum və orada kirayə qalırdım. Daha sonra yaşadığım evdə saxlanılaraq Azərbaycana təhvil verildim”.

Sumqayıt Ağır Cinayətlər Məhkəməsin hökmü ilə Mirəhəd Mirismayıllı 10 il müddətinə azadlıqdan məhrum edilib. Daha sonra məhkum apellyasiya şikayəti verib.

Kamal Məmmədov

Tarix: 30 Aprel 2022, 07:20

Xəbər lenti