Brüssel görüşü ilə bağlı şərh: İndiki məqamda başlıca istiqamət Ermənistana təzyiqlərin edilməsi ola bilər

“Brüsseldə iyul-avqust aylarında eyni formatda növbəti görüşün keçiriləcəyi ilə bağlı razılıq əldə olundu. Düşünürəm ki, indiki məqamda ən başlıca istiqamət Ermənistana təzyiqlərin edilməsi ola bilər. Çünki Ermənistanın yenə də uyğun şərait gördükdə yekun sülh sazişini imzalamaqdan yayınmağa çalışdığı bəllidir. Məsələlər ətrafında müzakirələrin intensivliyi şəraitində Ermənistana mütləq təzyiqlər olunmalıdır. Mövqeyimiz kifayət qədər aydındır. Azərbaycan yekun sülh sazişinin imzalanması üçün hər zaman təşəbbüslərlə çıxış edir və buna uyğun addımlar atır. Budəfəki görüşdə də Azərbaycan bir daha özünün konstruktiv mövqelərini nümayiş etdirdi”.

Bu sözləri Pravda.az-a açıqlamasında Milli Məclisin deputatı Elşad Mirbəşiroğlu deyib.

Deputat bildirib ki, Brüssel görüşü Azərbaycanın diplomatik mövqelərinin güclənməsinə təsir edəcək elementləri formalaşdırıb: “Bundan öncə keçirilmiş görüşlərdə də Moskvanın vasitəçiliyi ilə imzalanmış 3 sənədə istinad olundu. Mahiyyət etibarilə o sənədlərdə yer alan məqamlar Azərbaycanın maraqlarına tam uyğun idi. Kommunikasiyanın açılması, iqtisadi layihələrin həyata keçirilməsi, sərhədlərin müəyyənləşdirilməsi məsələləri məhz Moskvanın vasitəçiliyi ilə imzalanan sənədlərdə əksini tapmışdı. Brüsseldə də oxşar istiqamətdə müzakirələr aparılmaqdadır. Düşünürəm, həm Moskvanın vasitəçiliyi ilə həyata keçirilən proses, həm də Brüssel prosesi bir-birini tamamlayır. Bu baxımdan hələ ki, ziddiyyətli məqam görmürəm”.

E.Mirbəşiroğlu deyib ki, Brüssel görüşü Azərbaycanın haqlı maraqlarına uyğun istiqamətdə aparılıb: “Sərhədlərin müəyyənləşdirilməsi üçün artıq işçi qrupunun görüşünün təşkili ilə bağlı mövqe sərgiləndi. Bir müddət öncə Ermənistanın Təhlükəsizlik Şurasının rəhbəri də komissiyanın tərkibinin müəyyənləşdirildiyini, lakin adların hələ məxfi saxlanıldığını bildirmişdi. Azərbaycan-Ermənistan arasında yekun sülh sazişini bağlamaq üçün məhz sərhədlərin müəyyənləşdirilməsi, eyni zamanda regionda kommunikasiyanın açılması, Azərbaycanın Qərbi ilə Naxçıvan arasında nəqliyyat əlaqələrinin yaradılması məsələsini vacib şərt kimi irəli sürülür. Avropada da məhz bu istiqamətdə müzakirələr aparıldı. Ermənistan Azərbaycanın Qərb rayonları ilə Naxçıvan arasında nəqliyyat əlaqələrinin yaradılması amilindən də təzyiq aləti kimi istifadə etməyə cəhd göstərirdi. Azərbaycan İranla müvafiq razılaşmanı əldə etdikdən sonra Ermənistanın bu təzyiq aləti əhəmiyyətini itirmiş oldu. Artıq Avropada da açıq mətnlə bu mövzuda müzakirələr aparıldı. Ölkə Prezidentimiz prosesləri hər zaman olduğu kimi indi də milli maraqlarımıza tam uyğun şəkildə nəzarətdə saxlamaqda və yönləndirməkdədir”.

Aytəkin Qardaşova

Tarix: 23 May 2022, 13:46

Xəbər lenti