Məhkəmə söyüş üstündə dostunu öldürənin cəzasını artırdı

Bakı Apellyasiya Məhkəməsində dostunu öldürməkdə təqsirləndirilən Zaur Kazımovun barəsində olan hökmdən verilən apellyasiya protestinə baxılıb.

Pravda.az-ın əldə etdiyi məlumata görə, hakim İlqar Murquzovun sədrliyi ilə keçirilən prosesdə qərar elan edilib.

Qərara əsasən, dövlət ittihamçısı tərəfindən verilmiş apellyasiya protesti qismən təmin edilib.

Belə ki, Zaur Kazımova qəti olaraq təyin olunmuş 17 il müddətinə azadlıqdan məhrumetmə cəzasının ilk 2 il müddətinin həbsxanada çəkilməsi, qalan hissəsinin ciddi rejimli cəzaçəkmə müəssisəsində çəkilməsi müəyyən olunub.

Qeyd: Hadisə bu ilin yanvarın 7-də Bakının Xəzər rayonunda qeydə alınıb.

Binə qəsəbəsində əvvəllər də məhkum olumuş, 1965-ci il təvəllüdlü Zaur Kazımov münaqişə zəminində Zaur Cəbrayılovu bıçaqlayaraq öldürüb.

Polis əməkdaşlarının keçirdikləri əməliyyat-axtarış tədbirləri nəticəsində o, şübhəli şəxs qismində tutularaq istintaqa təhvil verilib.

İstintaq orqanı tərəfindən Zaur Kazımovun barəsində Cinayət Məcəlləsinin 120.2.2-ci (qəsdən adam öldürmə) maddəsi ilə ittiham elan edilib.

Bakı Ağır Cinayətlər Məhkəməsində təqsirləndirilən şəxs qismində ifadə verən Zaur Kazımov ona elan olunmuş ittiham üzrə özünü təqsirli bilib.

O bildirib ki, uzun illər əvvəl Binə qəsəbəsində qətl törətdib və 9 il müddətinə azadlıqdan məhrum edilib: "2001-ci ildə azadlığa çıxdım. Azadlığa çıxdıqdan sonra fəhləliklə məşğul oldum, ailəmi dolandırdım”.

Təqsirləndirilən şəxsin sözlərinə görə, 2009-cu ildə narkotik vasitələrdən istifadə etdiyinə görə azadlıqdan məhrum olunub, 2010-cu ildə cəzasını çəkdikdən sonra azadlığa çıxıb.

O bildirib ki, mərhum Zaur Cəbrayılovu hadisədən təxminən iki il əvvəl yaşadığı Binə qəsəbəsi ərazisində görüb və daha sonra tanış olub.

Zaur Kazımov qeyd edib ki, hadisə günü saat 16 radələrində məhəlləyə gəlib və “besetka”da oturub: “Zaur Cəbrayılov həmin vaxt öz tanışları ilə həmin yerdə spirtli içkilər qəbul edirdi. Zaur Cəbrayılov heç bir səbəb olmadan oturduğu yerdən mənə söz atmağa başladı. Zaura mənə ilişməməsini söylədim. Hətta həmin vaxt ətrafında olanlar da ona irad tutdular ki, içkilisən, heç kimə ilişmə. Vəziyyət o yerə çatdı ki, Zaurla tutaşma halına çıxdıq. Lakin orda olan şəxslər buna imkan vermədilər. Son olaraq Zaur mənə tərəf baxaraq əxlaqsız söyüş işlətdiyinə görə səbrim tükəndi. Zaura kənara çəkilərək ikilikdə söhbət etməyi təklif etdim. Onunla təxminən 15 metr kənara çəkildik. Kənara çəkildikdən sonra heç bir söz demədən daimi olaraq cibimdə gəzdirdiyim cib bıçağını çıxardım və həmin bıçaqla Zaura sinəsindən vurdum”.

O qeyd edib ki, Zaur Cəbrayılovu vurduqdan sonra bıçağı cibinə qoyub və birbaşa Xəzər rayon Polis İdarəsinin 3-cü polis bölməsinə gedib.

Məhkəmənin hökmü ilə Zaur Kazımov 17 il müddətinə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib. Bu hökmdən dövlət ittihamçısı narazı qalıb və apellyasiya protesti verib.

Kamal Məmmədov

Tarix: 1 Avqust 2022, 11:41

Xəbər lenti