BURADA REKLAMINIZ OLA
BİLƏR

BURADA REKLAMINIZ OLA
BİLƏR

Elçin Şıxlı: “Sülh müqaviləsi imzalanmadan “xalq diplomatiyası”nın təsiri olmayacaq, hamısı boş söhbətdir”

“30 il ərzində “xalq diplomatiyası”ndan xeyli istifadə ediblər, amma əhəmiyyəti olmayıb. Zənnimcə, “xalq diplomatiyası” bir az sonradan işə düşməlidir. Azərbaycanlılarla ermənilərin yaxınlaşdırılması, bir-birilərinə daha tolerant münasibət bəsləmələri siyasi məqamlar həll olunandan sonrakı işdir. Nə qədər ki sərhəd məsələləri həllini tapmayıb, sülh müqaviləsi imzalanmayıb, məncə, “xalq diplomatiyası” effekt verməyəcək, mənası olmayacaq. Bir şeyi də nəzərə almaq lazımdır ki, ermənilərin “myatsum” ideyalarının mənəvi daşıyıcıları, xalq arasında yayılmasına böyük töhfə verən elə erməni ziyalıları, yazıçıları olub. Təkcə Zori Balayan hamısına bəsdir”.

 

Bu sözləri Pravda.az-a açıqlamasında Azərbaycan Jurnalistlər Birliyinin sədri Elçin Şıxlı deyib.

 

O bildirib ki, sülh müqaviləsi imzalanmadan bu işlərin təsiri olmayacaq, hamısı boş söhbətdir: “Çünki biz jurnalist olaraq 30 il ərzində ermənilərlə müxtəlif xarici ölkələrdə, tədbirlərdə görüşmüşük. Peşə baxımından problemlərimizi rahat müzakirə edirdik, amma Qarabağ məsələsində heç kimin sözü digərinin içindən keçmirdi. Qələbəmizi qazanmışıq, indi də onlara diplomatik yollarla sülh müqaviləsini imzalatdırmalı, sərhədlərimizi təyin etməliyik. Bundan sonra danışarıq...”

 

E.Şıxlı sülh müqaviləsi imzalandıqdan sonra azərbaycanlı diplomatların, ziyalıların İrəvana getmələrinin real görünüb-görünmədiyi sualına isə belə cavab verib: “Hələ bu tezliklə yox. Getmək olar, amma arxanca 25 nəfər cangüdən gələcək. Ermənilər də Azərbaycana gələndə eyni şey olacaq. Bunu birdən-birə həll etmək mümkün olmayacaq. Yavaş-yavaş, illər sonra… Həm də ziyalılardan başlamaq lazım deyil. Zənnimcə, gəncləri bir-birilərinə öyrətmək lazımdır. Düzdür, müharibədən sonra erməni və azərbaycanlı gənclər də bir-birilərinə nifrət edirlər. Amma bizim nəsil gedir, bu, bizdən sonra gələnlərin işidir. Bir-birilərinə nifrət edəcəklərsə, heç bir xeyri yoxdur. Nifrət etməyəcəklərsə, onda nəyəsə ümid bağlamaq olar. Düşünürəm, gənclərin görüşləri daha effektiv ola bilər. Bu misalı dəfələrlə çəkmişəm. Övladlarımın 15-16 yaşları olanda Türkiyədə ömürlərində birinci dəfə canlı erməni görmüşdülər və üstümə qaçmışdılar ki, “ata, nə edək, döyək, əzək, ya nə edək?” Dedim ki, “bala, sözün-söhbətin tutursa, söhbətləş, tutmursa, onlardan aralı gəzin”. Yəni məsələ bundan ibarətdir ki, bizim nəsil erməniləri görüb də, tanıyıb da, bilir də. Amma gənc nəslin, sözün doğrusu, həm onların, həm də bizim təbliğatımızdan başqa ermənilər haqqında heç bir təsəvvürləri, fikirləri yoxdur. İnsanın gərək öz fikri də olsun. Bu mənada, hesab edirəm, müəyyən platformalarda, bəlkə, maraq dairəsi eyni olan gənclərin yavaş-yavaş görüşlərini keçirmək olar”.

 

Aytəkin Qardaşova

Tarix: 3 Oktyabr 2022, 16:53   
-->
Xəbər lenti
Çox oxunanlar

Ən son xəbərləri səhifəmizdən də izləyin