Xırdalanda mənzildə baş verən partlayışa görə kim məsuliyyət daşıyır? - AÇIQLAMA

“Xırdalanda baş verən partlayışda hansısa qurumun – istər “Azəriqaz”ın, istər FHN-nin, yerli icra orqanlarının məsuliyyətinin olub-olmamasını, hadisənin hansı zəmində baş verməsi, səhlənkarlıq olub-olmamasını və s. araşdırmanın sonunda bilmək olar. Öncədən hansısa qurumu ittiham etmək absurddur, doğru yanaşma deyil. Amma yaxşı olar nəzarət tədbirləri gücləndirilsin, bununla bağlı konsepsiya olsun, qaz təsərrüfatına aid olan avadanlıqlara, xətlərə, cihazlara ildə bir dəfə profilaktik texniki baxış keçirilsin, sınaq protokolları tərtib edilsin, hansısa nöqsan, yaxud qeyri-standart cihazlardan istifadə halları varsa, bu barədə istifadəçi məlumatlandırılsın, nöqsanların aradan qaldırılması üçün göstəriş verilsin. Belə bir sistem olsa, həm insanlar məsuliyyətli yanaşarlar, həm də təhlükə riski minimuma enər”.

Bu sözləri Pravda.az-a açıqlamasında təhlükəsizlik məsələləri üzrə ekspert Elmar Nurəliyev deyib.

Yanğınlar təxribatdır?- “Bu, insan faktoru ilə bağlıdır”

Ekpsert bildirib ki, ümumiyyətlə, təkcə yaşayış evlərində deyil, bütün müəssisələrdə, iş yerlərində təhlükəsizlik məsələsi ön planda olmalıdır: “Təhlükəsizlik deyəndə təkcə qazla bağlı məsələlər deyil, elektrik, su təsərrüfatına aid məsələlər, baş verə biləcək təhlükə riskləri də nəzərdə tutulur. Yaşayış evlərində qəzaların qarşısını almaq məqsədilə önləyici tədbirlər görülməlidir. Burada müvafiq qurumların da, vətəndaşların da üzərinə düşən məsuliyyət, öhdəliklər var. Son zamanlar baş verən qaz sızması, dəm qazından zəhərlənmə, partlayış kimi təhlükələr insanların həyatını təhlükəyə atır, həm də əmlaklarına ziyan dəyir. Qaz təsərrüfatı ilə bağlı olan təhlükəsizlik qaydalarına ciddi riayət edilməlidir. Qaz kimyəvi xassəsinə görə yanır, partlayır, düzgün istifadə olunmadıqda zəhərlənməyə gətirib çıxarır. Evlərdə qaz xətlərinə müdaxilə etmək, xətlərin çəklməsini qeyri-peşəkar şəxslərə həvalə etmək, əlbəttə, təhlükə riskini qaçılmaz edir. Mütləq qaz xəttində hansısa nasazlıq baş verərsə, ümumiyyətlə, xətlərin yerini dəyişmək, layihəyə hansısa müdaxilə etmək, bunu fərdi şəxslərə, lisenziyası olmayan, akkreditasiyadan keçməyən müəssisələrə etibar etmək sonda bədbəxt hadisələrin baş vermə riskini qaçılmaz edəcək. Bütün evlərdə qaz sızmasını, dəm qazı riskini aşkar edən detektorlar var. Müasir dövrdə bunların hamısı yüksək səviyyədə təşkil olunub. Evlərdəki qaz xətləri standartlara cavab verən cihazlar olsa belə, yenə də təhlükəsizlik istismarı mütləqdir. Görüləcək kompleks tədbirlər nəticəsində təhlükə riskləri minimuma endirilə bilər”.

Qeyd: Noyabrın 16-da Abşeron rayonu, Xırdalan şəhəri, AAAF Park Yaşayış Kompleksində çoxmərtəbəli yaşayış binasındakı mənzildə baş verən partlayış zamanı 4 nəfər xəsarət alıb. Hadisənin qaz sızmasından baş verdiyi bildirilir.

Aytəkin Qardaşova

Tarix: 18 Noyabr 2022, 08:30

-->

Xəbər lenti