BURADA REKLAMINIZ OLA
BİLƏR

BURADA REKLAMINIZ OLA
BİLƏR

Deputat Naxçıvanın statusu məsələsindən danışdı: “Əməliyyatlar göstərir ki, Naxçıvanda mövcud sistemdə problemlər var”

“Naxçıvan Muxtar Respublikasının statusu məsələsinə müzakirəyə qapalı məsələ kimi yanaşılmamalıdır. Muxtar Respublikanın yaradıldığı dövrün tarixi şəraiti ilə hazırkı situasiya köklü fərqlənir. O cümlədən son anti-korrupsiya əməliyyatları da göstərir ki, Naxçıvanda mövcud sistemdə problemlər var. Yəni artıq Muxtar Respublikada yeni yanaşma tətbiq etməklə dövlətin ali məqsədləri kimi müəyyən edilən hədəflərə daha tez çatmaq olar…”

 

Bu sözləri Pravda.az-a açıqlamasında Milli Məclisin deputatı Bəhruz Məhərrəmov deyib.

 

Deputat bildirib ki, proses reallaşacaqsa, buna yalnız islahatların növbəti mərhələsi və dövlətin iradə ifadəsi kimi baxılmalıdır: “Hər hansı formada siyasiləşdirmə, şəxslər üzərinə fokuslanma yolverilməzdir. Bizim üçün vacib olan xalq tərəfindən yekdilliklə dəstəklənən cənab Prezidentin iradəsidir. Azərbaycanda, o cümlədən ayrılmaz parçamız olan Naxçıvanda bu iradəyə alternativ yoxdur, ola da bilməz. Yeni reallığın yaradıcısı kimi dövlət başçısı proseslərin davamını hansı formada arzu edəcəksə, o məcrada da davam edəcəyik. Müharibəyə qədərki period, 44 günlük savaş və post-müharibə dövründə dəfələrlə sübut olundu ki, cənab Prezident nəyi nə zaman və necə edəcəyini bilir…”

 

B.Məhərrəmov əlavə edib: “Konstitusiyanın qəbulundan sonrakı dövrə diqqət etsək, təqribən 7 ildən bir konstitusion müddəaların milli maraq və mənafelərimiz rəhbər tutulmaqla yeni hüquq münasibətlərinə, reallıqlara uyğunlaşdırılması üçün referendumlar keçirildiyinin şahidi olarıq. Təbii ki, 7 ildən bir referendum keçirilməsi məcburi qayda kimi müəyyən olunmayıb, amma hazırda konstitusion səviyyədə dəyişikliyi ehtiva edən müəyyən reallıqlar var. Xüsusən Vətən müharibəsindən sonra yaranan yeni reallıq, Prezidentin xüsusi nümayəndəsi institutunun timsalında yeni idarəçilik modellərinə müraciət, habelə çoxpartiyalı sistemin hüquqi bazisinin möhkəmləndirilməsi istiqamətində addımlar müəyyən konstitusion islahatları zərurətə çevirə bilər. Amma referendum keçirmək üçün çoxsaylı amillər nəzərə alınmalıdır. Hələlik, belə şəraitin tam yetişməsi barədə araşdırmalar, təhlillər və sorğular aparmadan danışmaq çətindir…”

 

Aytəkin Qardaşova

Tarix: 1 Dekabr 2022, 16:13   
-->
Xəbər lenti
Çox oxunanlar

Ən son xəbərləri səhifəmizdən də izləyin