BURADA REKLAMINIZ OLA
BİLƏR

BURADA REKLAMINIZ OLA
BİLƏR

Keyfiyyətsiz dərmanlar satan aptek rəhbəri cinayət məsuliyyətindən azad edildi

Abşeronda keyfiyyətsiz dərmanlar satan aptek rəhbərinə hökm oxundu

 

Abşeron Rayon Məhkəməsində bilə-bilə keyfiyyətsiz, müddəti bitmiş və dövlət qeydiyyatından keçməyən dərman vasitələrinin satmaqda təqsirləndirilən Seymur Quliyevin cinayət işi üzrə məhkəmə istintaqı başa çatıb.

 

Pravda.az-ın etdiyi məlumata görə, hakim Şövkət Nəcəfovanın sədrliyi ilə keçirilən prosesdə hökm oxunub.

 

Məhkəmənin hökmü ilə cinayət işinə xitam verilib və o, cinayət məsuliyyətindən azad edilib. Təqsirləndirilən şəxs barəsində seçilmiş başqa yerə getməmək haqqında iltizam qətimkan tədbiri xitam olunub.

 

Qeyd olunub ki, məhkəmə Seymur Quliyev əməlindən səmimi peşman olduğunu, əməlin böyük ictimai təhlükə törətmədiyini, şəxsin təhlükəliliyinin olmamasını, ictimai təhlükəliliyinin aradan qalxmasını, onun himayəsində iki azyaşlı övladlarının olmasını, ailəyə qazanc gətirən yeganə şəxs olması, məcburi köçkün olduğunu və digər yüngülləşdirən halları nəzərə alaraq Cinayət Məcəlləsinin 74-cü maddəsinin tələbinə əsasən təqsirləndirilən şəxsin cinayət məsuliyyətindən azad edilməsini məqsədəuyğun hesab edir.

 

İttihama görə, Seymur Quliyev bilə-bilə qanunla dövlət qeydiyyatı tələb olunan, lakin dövlət qeydiyyatından keçməyən xeyli miqdarda, yəni ümumi dəyəri 1007,5 manatlıq  dərman vasitələrini istintaqa məlum olmayan mənbədən idxal edib işlədiyi və rəhbəri olduğu Abşeron rayonu, Müşviqabad qəsəbəsi, Bakı-Şamaxı şosesində yerləşən “Reyyan” adlı aptekdə satış məqsədilə saxlayıb. Bu barədə daxil olan məlumat əsasında Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşları tərəfindən 18 fevral 2022-ci il tarixdə həyata keçirilmiş əməliyyat-axtarış tədbiri zamanı təqsirləndirilən şəxs həmin dərmanlardan 1 qutu “Xarelto 15 mg” markalı, 2 qutu “Estrofem 2 mg” markalı, 1 qutu “Femara 2,5 mg” markalı, 3 qutu “Proluton 500 mg/2ml” markalı dərman vasitələrini aptekdə Süleyman adlı şəxsə 224,35 manat müqabilində satdıqdan sonra tutulub. 

 

“Reyyan” aptekə baxış keçirilərkən Seymurun üzərindən qeydiyyatsız dərman preparatlarını satması müqabilində aldığı 224,35 manat pul vəsaiti, Süleymanın üzərindən isə həmin qeydiyyatsız dərman preparatlarının satılmasını təsdiq edən 1 ədəd kassa çeki aşkar edilib götürülüb.

 

Onun barəsində Cinayət Məcəlləsinin 200-1.1-ci (Bilə-bilə keyfiyyətsiz, normativ-texniki sənədlərin tələblərinə cavab verməyən, mənşəyi məlum olmayan, yararlılıq müddəti bitmiş, qanunla dövlət qeydiyyatı tələb olunan, lakin dövlət qeydiyyatından keçməyən dərman vasitələrinin satışı, satış məqsədilə saxlanması və ya idxalı, habelə saxta dərman vasitələrinin istehsalı, satışı, satış məqsədilə saxlanması və ya idxalı, bu əməllər xeyli miqdarda törədildikdə) maddəsi ilə ittiham elan olunub.

 

Məhkəmə baxışında Seymur Quliyev ona elan edilən ittiham üzrə özünü təqsirli bilib. O deyib ki, “Reyyan”  aptekin müdiri işləyib, həmin obyektin yeganə işçisi özü olub. Özü aptekdə həm müdir, həm də aptekdə əczaçı kimi işləyib. Aptekdə satdığı dərmanları müxtəlif tanımadığı adamlardan alıb.

 

Kamal Məmmədov

Tarix: 2 Dekabr 2022, 08:43   
-->
Xəbər lenti
Çox oxunanlar

Ən son xəbərləri səhifəmizdən də izləyin